Exodus 23:1-33
23 “Ino tandaveleka* eendjovo doipupulu. Ino popila omunawii mokukala ondombwedi yoipupulu.
2 Ino shikula eemhunga u longe owii, noino pengifa ouyuki mokuyandja oundombwedi,* opo u wapalele eemhunga.
3 Ino kala u na onhondo meenhamanana di na sha nohepele.
4 “Ngeenge owa hange ongobe yomhedi, ile ondongi yomutondi woye ya kana, ou na oku i shunifa kuye.
5 Ngeenge owa mono ondongi yaumwe oo e ku yele ya punda nomitwalo dayo, ku na oku i lidimbika noku i fiya po. Ou na oku mu kwafela mokutumba oshinamwenyo shaye.
6 “Ino pengifa osho sha tokolelwa ohepele oyo i li mokati keni moihokolola yayo.
7 “Ino kufa ombinga momalundilo,* noino dipaa omunhu oo ehe na ondjo nomuyuki, osheshi omukolokoshi itandi ke mu tala ko omuyuki.*
8 “Ino tambula ombubo, molwaashi ombubo ohai twikifa ovanhu, notai dulu okuningifa omunhu a pengife eendjovo dovayuki.
9 “Ino fininika omunailongo. Osheshi omu shi shii nghee omunailongo ha kala,* osheshi nanye omwa li ovanailongo medu laEgipiti.
10 “Ou na okukuna eembuto mepya loye, nou na okwoongela oilikolomwa oule womido hamano.
11 Ashike momudo omutiheyali, ou na oku li efa inali longwa noku li efa li ninge eputu. Neehepele odo di li mokati keni otadi ka lya osho sha mena mo, naasho da xupifa mo otashi ka liwa mo koifitukuti. Osho osho u na okuninga shi na sha noshikunino shoye shomandjebele nosho yo sheemono doye.
12 “Ou na okulonga oilonga yoye oule womafiku ahamano, ndele mefiku etiheyali ou na okufuda po koilonga yoye, opo ongobe yoye yomhedi nosho yo ondongi yoye i dule okufuda po, nomonamati womupiya woye okakadona nomunailongo va dule okutulumukwa.
13 “Ou na okuninga ashishe osho nde ku lombwela, noku na okutumbula omadina ookalunga vamwe; inava udika mo nandenande mokanya koye.
14 “Ou na okudanena nge oshivilo lutatu momudo.
15 Oto ka dana Oshivilo shOmingome inadi ya Efulika. Oto ka lya omungome inau ya efulika oule womafiku aheyali, ngaashi ashike nde ku lombwela, peufwafimbo momwedi waAbib,* osheshi muEgipiti owa dile mo pefimbo olo. Kape na ou e na okuholoka koshipala shange e li eenyala dongaho.
16 Natango, ou na okudana Oshivilo shEteyo* loiimati oyo ya pya tete oyo wa longa, laasho wa kuna mepya nosho yo Oshivilo shOkutuvikila* pexulilo lodula, eshi to ongele oilikolomwa yoilonga yoye mepya.
17 Ovalumenhu vomoshiwana sheni aveshe ove na okuholoka koshipala shOmwene washili, Jehova, lutatu momudo.
18 “Ino yambela nge eyambo lohonde pamwe noshinima keshe sha ya efulika. Omayambo omaadi, oo a yandjwa poivilo yange, kae na okuxupifwa po a kale po oufiku aushe fiyo ongula.
19 “Ou na okweeta oiimati iwa elela, oyo ya pya tete mepya loye, keumbo laJehova, Kalunga koye.
“Ino fulukifa okakombwena momashini aina.
20 “Ohandi tumu omweengeli e ku tetekele komesho yoye, e ku wilike mondjila noku ku twala monhele oyo nda longekida.
21 Pwilikina kuye nokudulika kondaka yaye. Ino mu tukululila oshibofa, osheshi ita ka dima po omatauluko eni, molwaashi edina lange oli li muye.
22 Ashike ngeenge owa dulika filufilu kondaka yaye, nowa ningi ashishe osho handi popi, ohandi ka tonda ovatondi voye, nohandi ka kondjifa ovo tave ku kondjifa.
23 Omweengeli wange ote ke ku tetekela komesho yoye, ndele te ku twala kOvaamori, kOvaheti, kOvaperesi, kOvakaanan, kOvahevi nokOvajebusi, nohandi ke va xulifa po.
24 Ino linyongamena ookalunga vavo, ile u hongaulwe u va longele noino hopaenena oilonga yavo. Ponhele yaasho, ou na oku va hanauna po nokunyanyaula po eengudimanya davo diyapuki.
25 Omu na okulongela Jehova Kalunga, nota ka nangeka noupuna omungome weni nomeva eni. Ohandi ka kufa po omauvela mokati keni.
26 Ovakainhu vomedu loye itava ka wa omadimo, ile va ninge eengadji, nohandi ka lelepeka okukalamwenyo kwoye.*
27 “Ohandi ke va ningifa va tile nge ofimbo nokuli ino fika, nohandi ka ngwangwaneka ovanhu aveshe ovo to shakeneke. Ohandi ka ningifa ovatondi voye aveshe ve ku ye onhapo, eshi we va finda.*
28 Fimbo ino fika, ohandi ka ningifa ovatondi voye va teke omukumo* nohandi ka taataa Ovahevi, Ovakaanan nOvaheti moipafi yoye.
29 Opo oshilongo shiha ninge ofuka, noifitukuti, oyo tai dulu oku mu etela oshiponga, iha hapupale, itandi ke va taataa mo moipafi yoye moule womudo umwe.
30 Ohandi ke va taataa mo moipafi yoye kanini nakanini, fiyo osheshi oludalo loye la hapupala nokukwata ko edu olo alishe.
31 “Ohandi ke ku tulila po eengaba okudja kEfuta Litilyana fiyo okefuta lOvafilisti, nokudja kombuwa fiyo okOmulonga;* ovakalimo vomedu olo ohandi ke va yandja momake oye, noto ke va taataa mo.
32 Ino ninga ehangano navo, ile nookalunga vavo.
33 Kave na okukala medu omo u li, opo vehe ku ningife u nyone kwaame. Ngeenge owa longele ookalunga vavo, otashi ka kala filufilu omwiyo kwoove.”
Eshangelo lopedu
^ Eln., “popya.”
^ Ile “ehokololo olo tali popilwa kuvahapu.”
^ Eln., “meendjovo doipupulu.”
^ Ile “itandi ka yukifa omukolokoshi.”
^ Ile “okukalamwenyo kwomunailongo.”
^ Tala Oshiwedelwako B15.
^ Osho hashi ifanwa yo Oshivilo shOivike, ile shOpentekoste.
^ Osho hashi ifanwa yo Oshivilo shOmatwali.
^ Ile “nohandi ka hapupalifa omafiku oye.”
^ Ile “Ohandi ka ningifa ovatondi voye aveshe ve ku pilamene.”
^ Ile tashi dulika, “va kakame; va kwatwe koumbada.”
^ Sha hala okutya, Eufrat.
