Exodus 31:1-18
31 Jehova okwa twikila okupopya naMoses, ta ti:
2 “Tala, onda hoolola* Besaleel, omonamati waUri, omonamati waHur, womepata laJuda.
3 Ohandi ke mu yadifa nomhepo yaKalunga, handi ke mu pa ounongo, eendunge neshiivo lokulonga oilonga keshe yokomake,
4 lokuduta oinima nounghulungu, lokulonga noshingoli, oshisilveri nongopolo,
5 lokuteta nokufeweka nomamanya nolokulonga oshinima keshe hashi longwa moiti.
6 Natango, onda nangeka po Oholiab, omonamati waAhisama, womepata laDan, e mu kwafele, nohandi tula ounongo momitima daaveshe ovo ve na ounghulungu,* opo va dule okuninga keshe shimwe osho nde ku lombwela:
7 etwali lokwoongalela, oshikefa shOipelende yOumbangi noshituviko osho shi li kusho, noilongifo aishe yometwali,
8 oshitaafula noilongifo yasho, oshikwatelwalamba shoshingoli elela noilongifo yasho aishe, oaltari yomatwiminoyambo,
9 oaltari yomaxwikiloyambo noilongifo yayo aishe, oshiyaxa noshitenda shasho oko tashi tenhekwa,
10 oikutu ya hondjwa nawa, oikutu iyapuki yomupristeri Aron, oikutu yovanamati vaye, opo va longe ve li ovapristeri,
11 omaadi okuvaeka noitwimifo yedimba liwa yomonhele iyapuki. Otava ka ninga oinima aishe oyo nde ku lombwela.”
12 Jehova okwa popya vali naMoses, a ti:
13 “Popya nOvaisrael u va lombwele kutya, ‘Omu na okudiinina filufilu eshabata lange, osheshi oli li edidiliko pokati ketu nanye okudja kepupi fiyo okepupi, opo mu shiive kutya ame, Jehova, ohandi mu yapulifa.
14 Omu na okudiinina Eshabata, osheshi oli li oshinima shiyapuki kunye. Keshe oo te li nyateke oku na okudipawa, keshe oo ta longo sha mefiku olo, omunhu* oo oku na okudimwa* mo moshiwana shavo.
15 Oilonga oi na okulongwa moule womafiku ahamano, ashike efiku etiheyali efiku leshabata lokufuda po filufilu. Oli li oshinima shiyapuki kuJehova. Keshe oo ta longo sha mefiku lEshabata oku na okudipawa.
16 Ovaisrael ove na okudiinina Eshabata; ove na okudimbuluka Eshabata okudja kepupi fiyo okepupi. Oli li ehangano tali kalelele.
17 Oli li edidiliko tali kalelele pokati kange novanhu vomuIsrael, osheshi Jehova okwa shita eulu nedu moule womafiku ahamano, nomefiku etiheyali okwa fuda po nokwa tulumukwa.’”
18 Diva eshi Kalunga a mana okupopya naMoses komhunda yaSinai, okwe mu pa oipelende youmbangi ivali, oipelende yomamanya ya shangwa nomunwe waKalunga.
Eshangelo lopedu
^ Eln., “onda ifana kedina.”
^ Eln., “omutima u na eendunge.”
^ Ile “omwenyo.”
^ Ile “okudipawa.”
