Genesis 15:1-21
15 Okudja opo, Jehova okwa lombwela Abram memoniko, a ti: “Abram, ino tila. Ame ohandi ku amene.* Oto ka mona ondjabi inene.”
2 Abram okwa nyamukula, a ti: “Jehova Omunamapangelo aeshe, oto ka pa nge shike? Kandi na natango okaana, na Elieser, oo a dja koshilando shaDamaskus, oye ta ka fyuulula po oinima yange aishe.”
3 Abram okwa weda ko, a ti: “Ino pa nge oludalo, naumwe* womeumbo lange oye ta ka pingena nge po e li omufyuululi wange.”
4 Jehova okwe mu nyamukula, a ti: “Omunhu oo ite ke ku pingena po e li omufyuululi woye, ndele omonamati woye* oye te ke ku pingena po e li omufyuululi.”
5 Kalunga okwa twala Abram pondje, ndele ta ti: “Tala keulu, ndele to valula eenyofi, ngeenge oto dulu oku shi ninga.” Okwa weda ko vali a ti: “Oludalo loye nalo osho tali ka hapupala ngaho.”
6 Abram okwa itavela muJehova, nokwe mu tala ko omuyuki.
7 Okwa weda ko a ti: “Aame Jehova, oo nde ku pitifa mo muUr shOvakaldea ndi ku pe edu eli li ninge loye.”
8 Abram okwa tya: “Jehova, Omunamapangelo aeshe, ohandi shiiva ngahelipi kutya edu otali ningi lange?”
9 Kalunga okwe mu nyamukula, a ti: “Etele nge ongobe yondema yomido nhatu, oshikombo shoshikadi shomido nhatu, odi yondume yomido nhatu, onghuti yetende nonghutyona yopovanhu.”
10 Abram okwa kufa oinamwenyo oyo, ndele te i tete pokati, noitukulwa yayo okwe i shaameka,* ashike oudila ka li e va teta.
11 Opo nee eedila, odo hadi li ombelela, oda hovela okuwila kombelela yoinamwenyo oyo ya fya, na Abram okwa kala te di hanyene.
12 Eshi etango la li pokuningina, Abram okwa li a kwatwa keemhofi didjuu nokwa hangwa komulaulu mutilifa.
13 Kalunga okwa lombwela Abram, a ti: “Shiiva kutya oludalo loye otali ka ninga ovanailongo medu lihe fi lalo, novanhu otave ke li ninga ovapika notave ke li hepeka oule womido 400.
14 Ashike ohandi ka tokola oshiwana osho tashi ka longelwa koludalo loye, nokonima yaasho, oludalo loye otali ka dja mo noinima ihapu.
15 Oto ka fya meedula doye doukulupe, noto ka pakwa pooxokulululwa.
16 Oludalo loye otali ka aluka mepupi etine, molwaashi efimbo lOvaamori lokuhandukilwa inali fika natango.”
17 Eshi etango la ningina, nomilaulu de uya, opa li pa holoka ediko lomundilo tali twimaana omwifi, nopokati koitukulwa yombelela opa pita onyika yomundilo.
18 Mefiku olo, Jehova okwa ninga ehangano naAbram, a ti: “Oludalo loye ohandi ke li pa edu eli, okudja komulonga waEgipiti fiyo okomulonga munene, omulonga waEufrat:
19 Edu lOvakeni, lOvakenas, lOvakadmoni,
20 lOvaheti, lOvaperesi, lOvarefaim,
21 lOvaamori, lOvakaanan, lOvagirgas nolOvajebusi.”
Eshangelo lopedu
^ Eln., “Ame oshikelelifo shoye.”
^ Eln., “omonamati.”
^ Eln., “oo a dja mwoove.”
^ Ile “oitukulwa aishe ya taalelafana.”
