Genesis 20:1-18
-
Abimelek ta kufwa Sara (1-18)
20 Abraham okwa li a tembulila etwali laye koshitukulwa shaNegeb, ndele ta ka kala ha di pokati kaKades naSur. Eshi Abraham a li ha di kuGerar,*
2 okwa kala ha popi ta ti: “Sara omumwameme.” Onghee Abimelek ohamba yaGerar okwa li a tuma a etelwe Sara, ndele te mu kufa po.
3 Lwanima, Kalunga okwa li a holokela Abimelek mondjodi, ndele ta ti kuye: “Ove oto fi paife omolwomukulukadi oo wa kufa po, molwaashi okwa hombolwa, noku na nale omushamane.”
4 Ashike Abimelek ka li a ya pamwe naSara.* Onghee Abimelek okwa tya: “Jehova, oto ka dipaa oshiwana shihe na etimba?*
5 Hamba Abraham ina lombwela nge kutya, ‘Sara omumwaina,’ na Sara ina tya kutya, ‘Abraham omumwaina?’ Inandi shi ningila owina, nokanda li ndi shi shii ngeenge osho handi ningi osha puka.”
6 Opo nee Kalunga kashili okwa tya kuye mondjodi: “Ondi shi shii kutya ino shi ningila owina, onghee onde ku kelela uha nyone kwaame. Nomolwaasho inandi ku efa u nangale naye.
7 Shunifa omukulukadi wovanhu paife, osheshi omushamane waye omuprofeti, note ke ku ilikanena u kale nomwenyo. Ndele ngeenge ito mu shunifa, oto ka fya shili pamwe novanhu voye aveshe.”
8 Abimelek okwa penduka ongula inene, nokwa ifana ovapiya vaye aveshe, ndele te va lombwele oinima aishe oyo, nova li va tila unene.
9 Opo nee Abimelek okwa ifana Abraham nokwe mu pula, ta ti: “Owe tu ninga ngahelipi ngaho? Oshike nde ku ninga, opo u nyonife nge pamwe novanhu vange aveshe? Osho wa ningila nge kashi li pauyuki.”
10 Abimelek okwa weda ko vali, a ti: “Oshinima osho owe shi ninga nelalakano lashike?”
11 Abraham okwa ti: “Omolwaashi onda diladila kutya, ‘Ovanhu vomoshitukulwa eshi kave na etilokalunga, otava ka dipaa nge omolwomukulukadi wange.’
12 Kakele kaasho, Sara omumwameme shili, a dalwa kutate, ashike ina dalwa kumeme; nokwa ninga omukulukadi wange.
13 Eshi Kalunga a lombwela nge ndi dje mo meumbo latate, nondi ka ninge omweendaendi, onda lombwela Sara, nda ti: ‘Ou na okuulikila nge ohole i na oudiinini ngaha: Keshe apa hatu i, ou na okutya, “Abraham omumwameme.”’”
14 Abimelek okwa kufa eedi, eengobe novapiya ovakainhu novalumenhu, ndele te va yandje kuAbraham, nokwe mu shunifila omukulukadi waye Sara.
15 Abimelek okwa ti yo: “Onhele yange oyo ngaho, kala keshe apa wa hala.”
16 Okwa lombwela Sara, a ti: “Mumwanyoko ohandi mu pe oisilveri 1 000. Oisilveri oyo oi li edidiliko olo tali ulikile aveshe ovo ve li pamwe naave nakeshe umwe kutya ino nyona sha noku na etimba.”
17 Opo nee Abraham okwa hovela okwiilikana kuKalunga, na Kalunga okwa li a velula Abimelek, omukulukadi waye novapiya vaye ovakainhu, ndele tava hovele okudala ounona.
18 Jehova okwa li a ninga ovakainhu aveshe vomeumbo laAbimelek eengadji* omolwaSara, omukulukadi waAbraham.
Eshangelo lopedu
^ Ile “omunailongo.”
^ Sha hala okutya, ka li a nangala naye.
^ Ile “oshiyuki.”
^ Ile “fitika oidalelo yovakainhu vomeumbo laAbimelek.”
