Genesis 38:1-30
-
Juda naTamar (1-30)
38 Pefimbo olo, Juda okwa dja po povamwaxe, ndele ta ka dika etwali popepi nomulumenhu umwe Omuadullam, wedina Hira.
2 Konhele oko, Juda okwa mona ko okakadona ka dalwa kOmukaanan, wedina Sua. Okwe ka kufa, nokwa nangala nako,
3 ndele taka ningi oufimba. Lwanima, oka dala okaana okamati, na Juda okwe ka luka Er.
4 Natango, okakadona oko oka ninga oufimba, noka dala okaana okamati, ndele te ka luku Onan.
5 Natango, oka dala vali okaana okamati, ndele te ka luku Shela. Eshi Shela a dalwa, Juda okwa li e li muAksib.
6 Mokweendela ko kwefimbo, Juda okwa kongela omonamati waye woshiveli, Er, omukulukadi wedina Tamar.
7 Ndele Er, oshiveli shaJuda, ka li ha longo osho sha yuka koshipala shaJehova, onghee Jehova okwe mu dipaa.
8 Omolwoshinima osho, Juda okwa lombwela Onan, ta ti: “Nangala nomukulukadi wamumwanyoko, ndele to mu hombola po, opo u dalele omumwanyoko ounona.”
9 Ashike Onan okwa li e shi shii kutya ounona ovo ta ka dala itava ka talika ko vaye. Onghee ngeenge ta nangala nomukulukadi wamumwaina, omaxu aye oludalo okwa li he a xuxwile pedu, opo aha dalele mumwaina ounona.
10 Osho a ninga osha li shii momesho aJehova, onghee naye okwa dipawa.
11 Juda okwa lombwela oshitenya, Tamar, a ti: “Ka kale meumbo laxo u li omufiyekadi, fiyo osheshi omonamati wange, Shela, a kula,” osheshi Juda okwe lipopila a ti: ‘Naye otashi dulika a fye ngaashi ovamwaina.’ Opo nee Tamar okwa ya, ndele ta ka kala ha di meumbo laxe.
12 Mokweendela ko kwefimbo, omukulukadi waJuda, omonakadona waSua, okwa ka fya. Eshi efimbo lokulila eefya la pwa ko, Juda okwa ya kovakululi veedi daye kuTimna, a ya nomweendi pamwe naye, Hira, Omuadullam.
13 Tamar okwa li a lombwelwa taku ti: “Xomweno ota i kuTimna a ka kulule eedi daye.”
14 Eshi Tamar e shi uda, okwa dula mo oikutu yaye youfiyekadi, ndele te liuvike nokulidingila oshikaiwa. Opo nee okwa ka kala omutumba poshivelo shaEnaim, osho shi li pondjila yokuya kuTimna, molwaashi okwa li a mona kutya Shela okwa kula, ndele natango ina yandjwa kuye a ninge omukulukadi waye.
15 Eshi Juda e mu mona, okwa li e mu tala ko e li ombwada, shaashi okwa li a uvika oshipala shaye.
16 Molwaashi ka li e shii ngeenge oshitenya shaye, okwa li a ya puye pondjila, ndele ta ti: “Alikana, pitike nge ndi nangale naave.” Ashike Tamar okwa tya: “Ngeenge owa nangala naame, oto pe nge shike?”
17 Opo nee Juda okwa ti: “Ohandi ke ku tumina okakombwena taka di moufita wange.” Tamar okwa tya: “Fimbo to ka tumu, pe nge oshinima osho tashi ulike kutya oto ka wanifa po shili eudaneko loye.”
18 Juda okwa weda ko, a ti: “Oshike osho ndi na oku ku pa?” Tamar okwa nyamukula, a ti: “Olinga yoye yoshihako nongodi yayo nosho yo odibo oyo i li meke loye.” Opo nee okwe mu pa oinima oyo nokwa nangala naye, ndele Tamar ta ningi oufimba.
19 Okudja opo, Tamar okwa fikama nokwa ya, ndele te liuvikulula oshikaiwa shaye, nokwa djala oikutu yaye youfiyekadi.
20 Lwanima, Juda okwa tuma omweendi pamwe naye, Omuadullam, a twale okakombwena, ye a dje ko noinima oyo a li a pa omukainhu, ashike ine mu mona.
21 Omulumenhu oo okwa pula ovanhu vomoshitukulwa omo mu na Tamar, a ti: “Ombwada* yomuEnaim oyo hai kala pondjila oi li peni?” Ova nyamukula va ti: “Moshitukulwa omu inamu kala ombwada nande onale.”
22 Xuuninwa, omulumenhu oo okwa shuna kuJuda, ndele ta ti: “Omukainhu inandi mu mona, kakele kaasho, ovanhu vomoshitukulwa ova ti, ‘Moshitukulwa omu inamu kala ombwada nande onale.’”
23 Juda okwa tya: “Oinima oyo nai ninge po yaye, opo tuha dinike. Onda ninga eenghendabala u mu twaalele okakombwena, ashike ino mu mona.”
24 Opo nee konima yeemwedi nhatu lwaapo, Juda okwa li a lombwelwa taku ti: “Tamar, oshitenya shoye, okwe lininga ombwada, nokwa ninga oufimba moumbwada waye.” Juda okwa nyamukula, a ti: “Mu eteni oku, ndele ta xwikwa po.”
25 Eshi Tamar a li ta twalwa, okwa tumina xemweno etumwalaka, a ti: “Onda pewa oufimba kumwene woinima ei.” Okwa weda ko, a ti: “Alikana, tala kutya oinima ei oyalyelye, olinga yoshihako nongodi yayo nosho yo odibo.”
26 Opo nee Juda okwe i konakona, ndele ta ti: “Tamar omuyuki e dule nge, molwaashi inandi mu pa omonamati wange, Shela.” Okudja opo, ina nangala vali naye nandenande.
27 Tamar okwa li e na ounona vavali medimo, nefimbo laye lokudala ola li la fika.
28 Eshi a li ta dala, okaana kamwe oka pitifa mo eke lako, nomudalifi okwa kufa divadiva ongodi itilyana, ndele te ka mange keke, ta ti: “Aka oko ka dja mo tete.”
29 Diva eshi ka shuna mo eke lako, okamwainamati oka dja mo, ndele omudalifi ta ingida ta ti: “Owe liyeululila oshivelo ove mwene!” Onghee oka lukwa Peres.*
30 Lwanima, omumwaina, oo a li a mangwa keke nongodi itilyana, okwa dja mo, ndele ta lukwa Sera.
Eshangelo lopedu
^ Ile “Ombwada yomotembeli.” Tashi dulika tashi ulike komunhu oo e lininga ombwada onga onghedi yokulongela oikalunga yOvakaanan.
^ Tali ti “Okutauka,” tashi dulika tashi ulike kokutauka kwoshipa.
