Haggai 1:1-15
1 Momudo omutivali wepangelo lohamba Darius, momwedi omutihamano, mefiku lotete lomwedi, ondjovo yaJehova oya li ye uya kuSerubbabel, omonamati waSalatiel, ngoloneya waJuda, nokuJosua, omonamati waJosadak, omupristeri munene, okupitila momuprofeti Haggai* tai ti:
2 “Jehova womatangakwaita ota ti, ‘Ovanhu ava otava ti, “Efimbo inali fika natango lokutunga* eumbo* laJehova.”’”
3 Ondjovo yaJehova oye uya natango okupitila momuprofeti Haggai, tai ti:
4 “Mbela efimbo ola fika mu kale momaumbo eni a tungikika, ofimbo ongulu ei i li mehalakano?
5 Jehova womatangakwaita ota ti ngaha, ‘Pashukileni* eenghatu deni.
6 Omwa kala tamu kunu eembuto dihapu, ndele omwa teya shinini. Omwa kala tamu li, ndele ihamu kuta. Omwa kala tamu nu, ndele ihamu kumwa. Omwa kala tamu djala oikutu, ndele ihamu di outalala. Naao ta longele ondjabi, okwa fa te i tula mokandjato ke yadi eembululu.’”
7 “Jehova womatangakwaita ota ti ngaha, ‘Pashukileni* eenghatu deni.’
8 “Jehova ota ti, ‘Indeni keemhunda mu ka ete omiti. Tungeni eumbo, opo ndi kale nde li hokwa nondi fimanekwe.’”
9 “‘Omwa li mwa teelela shihapu, ndele omwa mona shinini; naashi mwe shi eta meumbo, onde shi hanauna po. Jehova womatangakwaita ota ti: Omolwetomheno lashike?’ ‘Omolwaashi eumbo lange oli li mehalakano, ofimbo keshe umwe womunye e lipyakidila nokufila oshisho eumbo laye.
10 Onghee eulu inali wilifa omume, nedu inali mu pa oilikolomwa.
11 Onda etifa oshikukuta osho sha kuma edu, eemhunda, oilya, omaviinyu mape, omaadi, oimeno, ovanhu noinamwenyo nosho yo oilonga aishe yomake eni.’”
12 Serubbabel, omonamati waSalatiel, naJosua, omonamati waJosadak, omupristeri munene, nosho yo ovanhu aveshe, ova pwilikina kondaka yaJehova Kalunga kavo nosho yo keendjovo domuprofeti Haggai, molwaashi Jehova Kalunga kavo oye e mu tuma, novanhu ova hovela okukala va tila omolwaJehova.
13 Opo nee Haggai, omutumwa waJehova, okwa lombwela ovanhu etumwalaka e li metwokumwe noshilonga osho a pewa kuJehova, a ti: “Jehova ota ti, ‘Ondi li pamwe nanye.’”
14 Onghee Jehova okwe linyengifa Serubbabel, omonamati waSalatiel, ngoloneya waJuda, naJosua, omonamati waJosadak, omupristeri munene, nosho yo ovanhu aveshe, ndele tave uya nova hovela okutungulula eumbo laJehova womatangakwaita, Kalunga kavo.
15 Osho osha li mefiku eti-24 lomwedi omutihamano, momudo omutivali wepangelo lohamba Darius.
Eshangelo lopedu
^ Tali ti, “a dalwa moshivilo.”
^ Ile “lokutungulula.”
^ Ile “otembeli.”
^ Ile “Diladileni moule.”
^ Ile “Diladileni moule.”
