Job 16:1-22
16 Job okwa nyamukula, a ti:
2 “Onda uda nale oinima ihapu ngaashi ei.
Nye amushe ovahekeleki vongaho.
3 Mbela eendjovo dahamakasha* otadi ka xula po tuu?
Oshike she ku linyengifa u nyamukule ngaho?
4 Naame ohandi dulu okupopya yo ngaashi ove.
Ngeno owa li monghalo ya fa yange,*Ngeno naame ohandi dulu oku ku popila mowii,Noku ku pukapukila omutwe wange.
5 Ashike ponhele yaasho, ngeno onde ku pameka neendjovo dokanya kange,Nehekeleko lomilungu dange, ngeno ole ku etela epepelelo.
6 Ngeenge onda popi, ouyehame wange itau ka tya po xwepo,Nongeenge onda mwena, mbela ouyehame wange otau ka xwepopala?
7 Ndele paife okwa lolola nge;Okwa piyaaneka ovaneumbo lange aveshe.*
8 Owa kwata nge yo, nosha ninga oumbangi,Opo oungone wange u hokololife nge moipafi yange.
9 Ehandu laye ola nyanyaula nge moinhimbu, nokwa tonda nge.
Ote likweshele nge komayoo.
Omutondi wange ota tyuula nge nomesho aye.
10 Ova ekamekela nge omakanya avo,Nova denga nge keemhanda nomasheko;Ova ongalela nge momuvalu muhapu.
11 Kalunga okwa yandja nge koumatyona,Nokwa ekela nge momake ovakolokoshi.
12 Kanda li ndi na oupyakadi, ashike okwa monifa nge oixuna;Okwa kwata nge kekofi, ndele ta nyanyaula nge.Opo nee okwa ninga nge oshishonekwa shaye.
13 Ovaumbi vaye ova dingilila nge;Okwa twa eefiyo dange, noina kenukila nge;Okwa tilashi onyango yange kombada yedu.
14 Okwa ngumauna nge po lwoikando ya shikulafana;Okwa totela nge ngaashi omukwaita.
15 Onda hondjela kumwe eeshako, opo ndi uvike oshipa shange,Nonda fudika efimano* lange mondwi.
16 Oshipala shange osha tilyana kokulila,Noipa yomesho ange oya laula fokofoko,*
17 Nonande omake ange inaa longa owii,Nomailikano ange okwa yuka.
18 Akutu edu, ino fufila ohonde yange.
Nokulila kwange inaku mona onhele yetulumuko.
19 Nokuli paife, ondombwedi yange oi li meulu;Oo ta dulu okupopila nge oku li pombada.
20 Ookaume kange otava sheke nge,Eshi omesho ange taa pononoka omahodi* koshipala shaKalunga.
21 Umwe na kale omupokati pokati komunhu naKalunga,Ngaashi umwe e li pokati komunhu nomunhu mukwao.
22 Molwaashi eedula di li komesho odinini,Nohandi ka ya nondjila, oyo ihai alukiwa.
Eshangelo lopedu
^ Ile “dongaho.”
^ Ile “Ngeno omwenyo woye owa li ponhele yomwenyo wange.”
^ Ile “ovo hava kala pamwe naame.”
^ Ile “eenghono.” Eln., “oluvinga.”
^ Ile “fa omudidimbe wefyo.”
^ Ile tashi dulika, “taa monika inaa kofa nandenande.”
