Job 18:1-21
18 Bildad, Omusuhi, okwa nyamukula a ti:
2 “Onaini to ka efa po okupopya eendjovo di li ngaho?
Ulika kutya ou na eudeko lonhumba, opo tu dule okupopya.
3 Omolwashike tu na okutalika ko twa fa oinamwenyo,Nokutalwa ko omalai* momesho eni?
4 Nonande ou linyanyaule po ove mwene* moinhimbu omolwehandu loye,Mbela edu otali ka haulukwa omolwoye,Ile mbela emanya otali ka dja po ponhele yalo?
5 Heeno, ouyelele wovakolokoshi otau dimwa po,Nomalaka omundilo waye itaa ka minikila.
6 Ouyelele wometwali laye otau ka ninga omilaulu fokofoko,Nolamba, oyo ye mu minikila, otai ka dimwa.
7 Omanha aye okwa ninipala,Nomayele aye mwene otae mu pundukifa.
8 Osheshi eemhadi daye otadi mu twala monete,Ndele ta kala nokunhukauka meembululu dayo.
9 Omwiyo otau mu kwata koshififinwa;Elulo otali mu kwata.
10 Okwa holekelwa ongodi medu,Nomwiyo owa telwa mondjila yaye.
11 Omatilifo otae ke mu dilila keembinga adishe,Notae mu taataa keshe apa ta i.
12 Eenghono daye otadi mu fiye po,Noupyakadi otau mu ningifa a pungauke.*
13 Oshipa shaye otashi nangatele;Omukifi omudipai* otau li po oinhimbu yaye.
14 Okwa kokololwa mo meameno letwali laye,Ndele ta twalwa kohamba yomatilifo.*
15 Ovanailongo* otava ka kala hava di metwali laye;Osulfuri otai ke lihanifilwa meumbo laye.
16 Omidi daye otadi ka kukuta koshi yaye,Noitai yaye otai ka lemba kombada yaye.
17 Edimbulukifo laye otali ka kana ko kombada yedu,Nedina laye itali ka kala vali li shiivike* momapandavanda.
18 Ota ka tewatewa mo mouyelele a ye momilaulu,Nota ka tewatewa mo medu liwa.
19 Ita ka kala e na ovana nosho yo oludalo mokati koshiwana shavo,Noponhele yaye opo ha di* itapa ka xupa nande omunhu.
20 Ngeenge efiku laye ole uya, ovanhu vokOuninginino otava ka haluka,Novanhu vokoushilo otava ka kwatwa koumbada.
21 Eshi osho hashi ningilwa omatwali ovalongi vowii,Nosho yo onhele yaao ina shiiva Kalunga.”
Eshangelo lopedu
^ Ile tashi dulika, “inatu koshoka.”
^ Ile “omwenyo woye.”
^ Ile “shongole.”
^ Eln., “Oshiveli shefyo.”
^ Ile “kefyo linyanyalifa.”
^ Eln., “Oshinima shihe fi shaye.”
^ Eln., “ita ka kala e na edina.”
^ Ile “Nonhele yaye yopakafimbo.”
