Job 31:1-40
31 “Onda ninga ehangano nomesho ange.
Onghee ongahelipi handi dulu okutala nokahalu okakadona elela?
2 Oshitukulwa shilipi handi ka pewa kuKalunga kopombada,Nefyuululo tali di kOmunaenghono adishe, oo e li pombada, olilipi?
3 Mbela oshiponga inashi teelela omulongi wowii,Noupyakadi mbela inau teelela ovo hava longo osho shii?
4 Mbela iha mono eendjila dangeNokuvalula omanha ange aeshe?
5 Mbela onda enda mondjila yoipupulu?*
Mbela eemhadi dange oda endelela okupukifa?
6 Kalunga na yeleke nge noshiyelekifo sha yuka;Opo nee ota ka mona oudiinini wange.
7 Ngeenge eemhadi* dange oda kanduka mo mondjila,Ile omutima wange owa shikula omesho ange,Ile omake ange okwa kala a nyatekwa,
8 Opo nee nandi kune eembuto, ndele umwe te di li po,Naasho nda twika nashi dudwe mo.*
9 Ngeenge omutima wange owa hongaulwa komukainhu,Nonda kala nda teelela poshivelo sheumbo lamushiinda,
10 Opo nee omukulukadi wange na twile omulumenhu umwe oilya,Novalumenhu vamwe nava nangale naye.*
11 Osheshi osho otashi ka kala elihumbato li fifa ohoni,Epuko olo la pumbwa okuhandukilwa kovatokoli.
12 Otali ka kala ngaashi omundilo tau lungwinifa nokuhanauna,*Tau lungwinifa* nokuli nomidi doilikolomwa yange aishe.
13 Ngeenge onda ungaunga shihe li pauyuki nomupiya wange omulumenhu, ile omukainhu,Eshi va li tava hokololifa nge,*
14 Ohandi ka ninga po shike, ngeenge Kalunga okwe uya kwaame?*
Ohandi ke mu nyamukula ngahelipi, ngeenge okwa hokololifa nge?
15 Mbela oo a shitila nge moshidalelo haye ngoo e va shita?
Mbela haye ngoo oo e tu shita, ofimbo inatu dalwa?*
16 Ngeenge onda anya okupa eehepele osho da li da hala,Ile nda nyemateka omesho omufiyekadi;*
17 Ngeenge onda lile oikulya yange aame andike,Nopehe na okutukulilafana neefiye;
18 (Osheshi okudja kounyasha wange, ofiye* oya kulila pwaame nda fa xe yayo,Nonda kala handi pashukile omufiyekadi* okudja kounona.*)
19 Ngeenge onda mona umwe ta fi outalala, molwaashi ehe na oikutu,Ile ohepele ihe na sha shokulituvikila;
20 Ngeenge ina* nangeka nge noupuna,Eshi e liuvika nolududi leedi dange;
21 Ngeenge onda tumbila ofiye ongonyo,Eshi ya li ya pumbwa ekwafo lange poshivelo shoshilando;*
22 Opo nee okwooko* kwange naku we ko kepepe lange,Nokwooko kwange naku teywe pongolo.*
23 Osheshi onda li nda tila oupyakadi tau di kuKalunga,Nokanda li handi dulu okulididimikila efimano laye.
24 Ngeenge onda tula elineekelo lange moshingoli,Ile nda ti koshingoli elela, ‘Oove eameno lange.’
25 Ngeenge onda mona ehafo memona lange lihapu,Omolwoinima ihapu oyo nde lilikolela;
26 Ngeenge onda mona etango* tali minikile,Ile omwedi tau ende mewapalo lao;
27 Nomutima wange owa hongaulwa meholeko,Nomulungu wange owa xupita eke lange moku i longela;
28 Opo nee osho otashi ka kala epuko, olo la pumbwa okuhandukilwa kovatokoli,Osheshi onde lidimbika Kalunga kashili wopombada.
29 Mbela onda hafela ngoo nale ehanauno lomutondi wange,Ile nda nyakukwa, eshi a hangwa kowii?
30 Inandi efa nande onale omilungu dange di nyoneMokuninga eano ndi mu halele efyo.
31 Mbela ovanhu vometwali lange inava tya,‘Olyelye ta dulu okumona ovo inava kuta oikulya* yaye?’
32 Kape na omweendanandjila* a kala pondje oufiku;Ovaendi onde va yeululila omivelo dange.
33 Mbela onda kendabala nale okuholeka omatauluko ange, ngaashi ovanhu vamwe,Mokuholeka epuko mondjato yoshikutu shange?
34 Mbela onda li nda tila omalinyengo ovanhu vahapu,Ile onda kala nda tila okudinika kovanhu vokomaumbo,Va mweneke nge nokutilifa nge ndiha ye pondje?
35 Ngeno umwe oku pwilikine kwaame.
Ohandi ka tula po edina lange omolwoshinima osho nda popya.*
Omunaenghono adishe na nyamukule nge.
Ngeno omuhokololifi wange okwa shangele omukanda waasho ta tamanekele nge.
36 Ohandi ke u humbata kepepe lange,Nohandi ke u mangela komutwe wange ngaashi oshikoroni.
37 Ohandi ke mu pa ehokololo omolwonghatu keshe nda katuka;Ohandi ka ya kuye ndi na omukumo, ngaashi elenga.
38 Ngeenge edu lange ola kuwile nge,Noinhenga yalo oya lili pamwe;
39 Ngeenge onda lya oiimati yalo inandi i futa,Ile ngeenge onda ningifa oovene valo* va mone oixuna;
40 Opo nee nali menifile nge omakiya ponhele yoilya yo-wheat,Noimbodi hai nyika ponhele yoilya yo-barley.”
Eendjovo daJob opo da xulila apa.
Eshangelo lopedu
^ Ile tashi dulika, “novanhu vehe fi ovanashili?”
^ Ile “omanha.”
^ Ile “Noludalo lange nali dudwe mo.”
^ Eln., “Novalumenhu vamwe nava twe eengolo puye.”
^ Eln., “li (lungwinifa po) shi hanauke po.”
^ Ile “duda mo.”
^ Ile “twala nge koihokolola.”
^ Eln., “okwa fikama?”
^ Eln., “moshidalelo.”
^ Eln., “nda ningifa omesho omufiyekadi aha mone ko.”
^ Eln., “ye.”
^ Eln., “okudja moshidalelo shameme.”
^ Eln., “ye.”
^ Eln., “ekalo laye.”
^ Ile tashi dulika, “Eshi nda mona kutya ohandi dulu okukwafelwa poshivelo shoshilando.”
^ Ile “Oshipepeti.”
^ Ile “ponhele yako; kekipa lako lopombada.”
^ Eln., “ouyelele.”
^ Eln., “ombelela.”
^ Ile “omunailongo.”
^ Ile “Eli eshangelo lange.”
^ Ile “omwenyo woovene valo.”
