Job 33:1-33
33 “Ashike paife, alikana, Job, pwilikina keendjovo dange;Pwilikina ashishe osho handi popi.
2 Alikana, tala, ondi na okumakula okanya kange;Elaka lange* oli na okupopya.
3 Eendjovo dange otadi holola ouyuki womomutima wange,Nomilungu dange otadi popi filufilu osho ndi shii.
4 Omhepo yaKalunga mwene oyo ya shita nge,Nomufudo wOmunaenghono adishe owa eta nge momwenyo.
5 Nyamukule nge, ngeenge oto dulu;Popya oudjuu woye moipafi yange; kala ofika.
6 Tala, atushe otwa faafana koshipala shaKalunga kashili;Naame yo onda mewa mondwi yedu.
7 Onghee ino kala wa tila omolwange,Noino kala wa wililwa po omolwange.
8 Ashike owa popya momatwi ange,Heeno, onda kala nokupwilikina keendjovo edi,
9 ‘Ondi li omuyuki, ndihe na etimba;Onda koshoka, ndihe na epuko.
10 Ashike Kalunga oku na omatomheno okukondjifa nge;Okwa tala nge ko ndi li omutondi waye.
11 Eemhadi dange okwe di tula meti;Oha konakona omalila ange aeshe.’
12 Ashike ku li mondjila, eshi wa popya ngaho, onghee ohandi ku nyamukula kutya:
Kalunga oku dule kokule omunhu wongaho.
13 Omolwashike to mu ngongotele?
Mbela omolwaashi ina nyamukula eendjovo doye adishe?
14 Osheshi Kalunga oha popi oshikando shotete noshitivali,Ndele kape na oo ha yandje elitulemo,
15 Mondjodi, memoniko loufiku,Eshi ovanhu va hangwa keemhofi didjuu,Ofimbo va kofa peembete davo.
16 Opo nee oha fitulula omatwi avo,Noku va pa* omalombwelo aye,
17 Opo a alule ko omunhu kowii,Nokwaamena omunhu kounhwa.
18 Kalunga okwa xupifa omwenyo waye melambo,*Omwenyo waye uha xulifwe po keongamukonda.*
19 Omunhu oha pewa yo outekuduliko kouyehame mombete yayeNosho yo koupyakadi tau twikile momakipa aye,
20 Opo okukala po kwaye* ku tonde omungome,Noha* anye nokuli noikulya iwa.
21 Ombelela yaye otai ende tai nangatele,Nomakipa aye, oo a li a holekwa, paife oku li kombada.*
22 Omwenyo waye otau ehene popepi nelambo;*Omwenyo waye okwaavo hava eta efyo.
23 Ngeenge ope na omutumwa* waye,Omupopili umwe womeyovi,A lombwele omunhu osho sha yuka,
24 Opo nee Kalunga ote ke mu fila onghenda, ndele ta ti,‘Mu xupifa aha ye melambo.*
Onda mona oikulila.
25 Olutu laye nali nyashuke* li dule lomounyasha;Na kale vali e na eenghono ngaashi a li pomafiku ounyasha waye.’
26 Ota ka indila Kalunga, oo te ke mu uda,Nota ka mona oshipala shaYe nehafo linene,Na Kalunga ota ka alulila omunhu wongaho ouyuki waYe.
27 Omunhu oo ota ka lombwela* ovanhu kutya,‘Onda nyona nonda pengifa osho sha yuka,Ashike inandi pewa osho nde lilongela.*
28 Okwa xupifa omwenyo* wange uha ye melambo,*Nomwenyo wange otau ka mona ouyelele.’
29 Oshoshili, Kalunga oha ningi oinima aishe oyo,Luvali, lwoikando itatu omolwomunhu,
30 Opo e mu kufe mo* melambo,*Opo a minikilwe kouyelele womwenyo.*
31 Job, yandja elitulemo. Pwilikina kwaame.
Kala wa mwena, nohandi ka twikila okupopya.
32 Ngeenge ou na sha shokupopya, nyamukule nge.
Popya, molwaashi onda hala okuulika kutya ou li mondjila.
33 Ngeenge ku na sha shokupopya, ou na okupwilikina kwaame;Kala wa mwena, nohandi ke ku honga ounongo.”
Eshangelo lopedu
^ Eln., “Elaka lange nondakona yange.”
^ Eln., “Nokwa tula oshihakifo.”
^ Ile “mombila.”
^ Ile “koshilwifo.”
^ Eln., “onghalamwenyo yaye.”
^ Ile “Nomwenyo waye.”
^ Ile “oku li koluhaela.”
^ Ile “nombila.”
^ Ile “omweengeli.”
^ Ile “mombila.”
^ Ile “kale li na oukolele.”
^ Eln., “imbila.”
^ Ile tashi dulika, “Noinashi etela nge ouwa.”
^ Ile “onghalamwenyo.”
^ Ile “mombila.”
^ Ile “omwenyo waye.”
^ Ile “mombila.”
^ Ile “a hafele onghalamwenyo.”
