Embo laJohannes 5:1-47
5 Eshi oshivilo shOvajuda sha fika, Jesus okwa li a ya kuJerusalem.
2 Ndele muJerusalem, pomuvelo wokupitila eedi opa li etale hali ifanwa mOshiheberi Betesda, olo la li li na omikala nhano.
3 Momikala omo omwa li hamu kala ongudu inene yovanhu ovo tava vele, ovapofi, oilema nosho yo ovo ve na omake neemhadi da fya omolwoudu wombada.
4 ——
5 Petale opo opa li yo omulumenhu umwe oo a kala ta vele oule womido 38.
6 Eshi Jesus a mona omulumenhu oo a nangala noku shii kutya okwa kala ta vele oule wefimbo lile, okwe mu pula ta ti: “Ino hala okuveluka?”
7 Omulumenhu oo a li ta vele okwa nyamukula ta ti: “Omufimanekwa, kape na ou ta tula nge metale ngeenge omeva tae linyenge, ndele shimha handi i, vamwe ohava piti nge komesho.”
8 Jesus okwa tya kuye: “Fikama! Kufa olutala loye,* ndele to ende.”
9 Opo nee omulumenhu oo okwa veluka diva, ta kufa olutala laye* nokwa hovela okweenda.
Ndele efiku olo ola li Eshabata.
10 Onghee Ovajuda ova tya komulumenhu oo a velulwa: “Nena Eshabata noinashi pitikwa pamhango u humbate olutala.”*
11 Okwa tya kuvo: “Ou a velula nge okwa lombwela nge ta ti, ‘Kufa olutala loye,* ndele to ende.’”
12 Ove mu pula tava ti: “Olyelye e ku lombwela u kufe olutala ndele to ende?”
13 Ashike omulumenhu oo ka li e shii kutya olyelye e mu velula, molwaashi Jesus okwa dja po diva ndele ta i mongudu yovanhu.
14 Konima yaasho, Jesus okwe mu hanga motembeli ndele ta ti kuye: “Paife owa veluka, ndele ino nyona vali opo uha mone oilanduliko ii neenghono.”
15 Opo nee omulumenhu oo okwa ya ndele ta ka lombwela Ovajuda kutya Jesus oye e mu velula.
16 Osho osha li sha ningifa Ovajuda va kale tava pataneke Jesus molwaashi okwa li ta longo oilonga oyo mEshabata.
17 Ndele Jesus okwa tya kuvo: “Tate ota longo fiyo opaife, naame ohandi twikile okulonga.”
18 Okudja opo Ovajuda ova kala va hala oku mu dipaa, molwaashi ova li tava ti kutya ota nyono omhango yEshabata nokwa hala ovanhu va diladile kutya oku fike puKalunga eshi ta ti kutya Kalunga oye Xe.
19 Ndele Jesus okwa tya kuvo: “Oshili ohandi mu lombwele, Omona ita longo sha kuye mwene, ndele ota longo ashike osho a mona Xe ta longo. Osheshi keshe osho Xe a longa, osho tuu Omona ta longo.
20 Shaashi Xe oku hole Omona, ohe mu ulikile oinima aishe oyo a longa, note ke mu ulikila oilonga inene i dule ei, opo shi mu kumwife.
21 Ndele ngaashi ashike Xe ha nyumuna oonakufya, Omona naye oha nyumuna keshe oo a hala okunyumuna.
22 Xe iha tokola nande omunhu, ndele oilonga aishe yokutokola okwe i pa Omona,
23 opo ovanhu aveshe va fimaneke Omona ngaashi hava fimaneke Xe. Keshe ou iha fimaneke Omona, iha fimaneke yo Xe ou e mu tuma.
24 Oshili ohandi mu lombwele, keshe ou ta udu eendjovo dange ndele ta itavele ou a tuma nge oku na omwenyo waalushe; ita ka tokolwa, ndele ota kala ngaashi omunhu oo a li a fya nokwa nyumuka.
25 “Oshili ohandi mu lombwele, efimbo otali uya eshi oonakufya tava ka uda ondaka yOmona waKalunga, ndele ovo va pwilikina nokudulika kuye otava ka kala nomwenyo.
26 Ngaashi ashike Xe e na eenghono dokuyandja omwenyo,* okwa pa yo Omona eenghono dokuyandja omwenyo.
27 Okwe mu pa yo eenghonopangelo dokutokola, molwaashi ye Omona womunhu.
28 Inamu shi kuminwa, osheshi efimbo otali uya eshi aveshe ovo ve li meembiladimbuluko tava ka uda ondaka yaye,
29 ndele tava di mo, ava va longa ouwa otava ka nyumukila omwenyo, naava va longa owii otava ka nyumukila etokolo.
30 Ihandi longo sha pahalo lange. Ashike ohandi tokola ovanhu she likolelela kwaasho Tate ta lombwele nge nohandi tokola pauyuki molwaashi ihandi longo ehalo lange, ndele ehalo laTate ou a tuma nge.
31 “Ngeenge onda hepaulula kombinga yange mwene, ehepaululo lange itali kala loshili.
32 Ndele ope na umwe oo ta hepaulula kombinga yange, nondi shi shii kutya ehepaululo laye olashili.
33 Omwa tumine ovanhu kuJohannes, nokwe va hepaululila oshili.
34 Ashike ame ihandi tambula ko ehepaululo lovanhu, ndele ohandi mu lombwele oinima ei opo mu dule okuxupifwa.
35 Johannes okwa li ngaashi olamba ya tema notai minikile, nomwa li tamu hafele neenghono ouyelele waye oule wokafimbo.
36 Ndele ame ondi na ehepaululo li dule laJohannes, osheshi oilonga ei handi longo onde i pewa kuTate, notai yandje oumbangi kutya onda tumwa kuTate.
37 Tate ou a tuma nge okwa hepaulula kombinga yange. Ndele inamu uda ondaka yaye noinamu mu mona.
38 Eendjovo daye inadi kala mo munye molwaashi inamu itavela ou a tumwa.
39 “Ohamu konakona Omishangwa molwaashi otamu diladila kutya odo tadi ke mu pe fa omwenyo waalushe, ndele Omishangwa odo otadi popi kombinga yange.
40 Ndele nye inamu hala okuuya kwaame opo mu kale nomwenyo.
41 Inandi hala okupewa efimano kovanhu,
42 nondi shi shii kutya kamu hole Kalunga.
43 Onde uya medina laTate, ndele inamu tambula nge. Ndele ngeenge umwe okwe uya pahalo laye mwene, otamu mu tambula.
44 Otamu itavele ngahelipi ngeenge onye vene hamu lipe efimano, noihamu kongo efimano olo hali di kuKalunga aeke?
45 Inamu diladila kutya ohandi ke mu popya kuTate, ndele ou te mu popi oMoses ou mwe lineekela.
46 Kakele kaasho, ngeenge omwa itavela Moses, ngeno omu na yo okukala mwa itavela nge, osheshi okwa shanga kombinga yange.
47 Ndele ngeenge inamu itavela osho a shanga, ongahelipi tamu ka itavela osho handi popi?”
Eshangelo lopedu
^ Ile “okambete koye.”
^ Ile “okambete kaye.”
^ Ile “okambete.”
^ Ile “okambete koye.”
^ Ile “e na oshali yomwenyo.”
