Jona 1:1-17
1 Ondjovo yaJehova oye uya kuJona,* omonamati waAmittai, tai ti:
2 “Fikama u ye kuNinive, oshilando shinene, ndele to ke shi udifila etumwalaka letokolo, osheshi onda didilika oukolokoshi washo.”
3 Ashike Jona okwa fikama a faduke po Jehova a yuka kuTarsis; okwa ya kuJoppa nokwa hanga ko oskepa ya yuka kuTarsis. Okwa futa olweendo, ndele ta i navo kuTarsis, kokule naJehova.
4 Opo nee Jehova okwa pendula omhepo inene mefuta, nopa li oshikungulu sha nyika oshiponga, noskepa oya li pokuteka.
5 Ovaendifuta ova li va tila neenghono, nakeshe umwe okwa li a hovela okupula ekwafo kukalunga kaye. Ova li va hovela okuumbila eendongelwa mefuta, opo va pupaleke oskepa. Ashike Jona okwa ya meni loskepa,* ndele ta nangala nokukofa a pwila mo.
6 Omukulunhu woskepa okwa ya kuye, ndele ta ti: “Omolwashike wa kofa? Penduka, nokupula ekwafo kukalunga koye! Pamwe Kalunga kashili ote tu file onghenda, opo tuha fye.”
7 Opo nee ova lombwelafana tava ti: “Ileni tu umbeni oshihoololifo, opo tu mone kutya olyelye a etifa oudjuu ou.” Onghee ova umba oshihoololifo, nosha kwata Jona.
8 Ova tya kuye: “Alikana, tu lombwela, olyelye a etifa oudjuu ou we tu hanga? Oho longo shike, nowa dja peni? Owa dja koshilongo shilipi, nowa dja moshiwana shilipi?”
9 Okwa nyamukula a ti: “Ame Omuheberi, nohandi tila* Jehova Kalunga komeulu, oo a shita efuta nedu.”
10 Opo nee ovalumenhu ova li va tila unene, nove mu pula, va ti: “Owa ninga shike?” (Ovalumenhu ova uda kutya okwa li ta faduka po Jehova, molwaashi Jona okwe va lombwela.)
11 Onghee ova tya kuye: “Natu ku ningile shike, opo efuta li lotele?” Osheshi efuta ola li tali ende tali pindjala unene.
12 Okwe va nyamukula, a ti: “Tumbei nge nokuumbila nge mefuta, nefuta otali ka lotela, osheshi ondi shi shii kutya oshikungulu eshi shinene osha tukuluka omolwange.”
13 Ashike ovalumenhu ova kondjifa neenghono* okupitifa mo oskepa ve i twale komutunda, ndele inava dula, molwaashi efuta ola enda ashike tali pindjala neenghono.
14 Onghee ova ingida mokule kuJehova tava ti: “Alikana, ohatu ku indile Jehova, tuha fye omolwomulumenhu ou!* Ino tu handukila omolwohonde ihe na etimba, osheshi ove Jehova, owa ninga osho wa hala.”
15 Opo nee ova tumba po Jona, ndele tave mu umbile mefuta, nefuta ola lotela.
16 Ovalumenhu ova li va tila Jehova netilo linene, ndele tava yambele Jehova omayambo, nova ninga eano.
17 Opo nee Jehova okwa tuma oshi inene i pone po Jona, na Jona okwa kala medimo loshi oule womafiku atatu, omutenya noufiku.
Eshangelo lopedu
^ Tali ti “Onghuti.”
^ Ile “medimo lopedu loskepa.”
^ Ile “longele.”
^ Ile “ova kendabala ngaashi tava dulu.”
^ Ile “omolwomwenyo womulumenhu ou!”
