Josua 20:1-9
-
Oihondamenolando (1-9)
20 Jehova okwa lombwela Josua, ta ti:
2 “Lombwela Ovaisrael kutya: ‘Lihoololeleni oihondamenolando oyo nda li nde mu lombwela okupitila muMoses,
3 opo omunhu oo a dipaa umwe* shihe fi oshiningilewina, ile ombadilila a dule oku ka hondama oko. Otai ke mu amena kovapuli vohonde.
4 Oku na okuya onhapo kushimwe shomoilando oyo nokufikama poshivelo shoshilando osho, ndele ta popi oshibofa shaye moipafi yovakulunhu voshilando osho. Ove na oku mu tambula moshilando noku mu pa onhele nota kala navo.
5 Ngeenge omupuli wohonde okwe mu shikula, kave na okuyandja omudipai oo meke laye, osheshi mukwao ine mu dipaela owina noina kala e mu tonde.
6 Oku na okukala ha di moshilando osho fiyo osheshi a tokolwa moipafi yongudu yovanhu, noku na okukala omo fiyo osheshi omupristeri munene oo ta yakula pefimbo olo a fya. Opo nee omudipai oo oku na okushuna koshilando oko a dile, ndele ta i moshilando shavo nomeumbo lavo.’”
7 Onghee ove likalekelela Kalunga oihondamenolando kuKedes muGalilea, oshitukulwa shokeemhunda shaNaftali, Sekem, oshitukulwa shokeemhunda shaEfraim, naKiriat-arba, sha hala okutya, Hebron, oshitukulwa shokeemhunda shaJuda.
8 Moshitukulwa shokeemhunda shokomulonga waJordan, koushilo waJeriko, ova hoolola ko Beser, osho shi li mombuwa komhunda ya lalakana, mepata laRuben, mepata laGad, oRamot, osho shi li muGilead, nomepata laManasse, oGolan, osho shi li muBasan.
9 Oilando oyo oyo ya hoololelwa Ovaisrael aveshe novanailongo ovo hava di mokati kavo, opo keshe umwe oo ta dipaa umwe* shihe fi oshiningilewina a dule oku ka hondama oko, nokuha dipawe komupuli wohonde ofimbo ina pangulwa moipafi yongudu yovanhu.
