Josua 8:1-35
8 Jehova okwa lombwela Josua, ta ti: “Ino kala wa tila, ile u mbadapale. Inda pamwe nomatangakwaita aeshe, ndele tamu ka lwifa Ai. Tala, onde ku pa ohamba yaAi, ovanhu vayo, oshilando shayo nedu layo.
2 Ningileni Ai nohamba yasho, ngaashi mwa ningila Jeriko nohamba yasho, ashike otamu dulu okukufa ko oixuulwa* yasho noimuna yasho i ninge yeni. Nangeleni oshilando osho konima yasho.”
3 Onghee Josua nomatangakwaita aeshe ova ya va ka lwife Ai. Josua okwa hoolola ovakwaita ovanaenghono 30 000, ndele te va tumu oufiku.
4 Okwe va pa elombwelo eli tali ti: “Taleni, omu na okunangela konima yoshilando. Inamu ya unene kokule noshilando osho, nomu na okukala mwe lilongekida amushe.
5 Ame novanhu aveshe ovo ndi li pamwe navo ohatu ka ya moshilando, nongeenge ove uya oku tu lwifa ngaashi shito, ohatu ke va faduka po.
6 Ngeenge ove tu taataa, ohatu ke va twala kokule noshilando, osheshi otava ka tya: ‘Otave tu faduka po ngaashi shito.’ Ohatu ke va faduka po.
7 Opo nee omu na okudja po opo mwa nangela, ndele tamu kwata ko oshilando; Jehova, Kalunga keni, ote ke shi mu pa.
8 Diva ngeenge mwa kwata ko oshilando, omu na oku shi tomeka omundilo. Omu na okuninga ngaashi Jehova a popya. Taleni, onde mu pa omalombwelo eni.”
9 Opo nee Josua okwe va lekela, ndele tava i konhele oko tava ka nangela; ova ka kala pokati kaBetel naAi, kouninginino waAi, ofimbo Josua a kala oufiku oo pamwe novakwaita vamwe.
10 Konima eshi Josua a penduka ongula inene, ndele ta ongele omatangakwaita, ye novakulunhu vaIsrael ove va kwatela komesho va finda kuAi.
11 Omatangakwaita aeshe oo a li puye okwa ya, ndele taa ehene komesho yoshilando. Okwa onga onhanda kolundume laAi, nopokati kao naAi opa li pe na olufilu.
12 Mokweendela ko kwefimbo, Josua okwa kufa ovalumenhu 5 000 lwaapo, ndele te va tula pokati kaBetel naAi, kouninginino woshilando, ve shi nangele.
13 Onghee ovanhu ova dika onhanda, oyo ya kula, kolundume loshilando, netangakwaita likwao olo la li konima, okouninginino woshilando. Josua okwa ya oufiku oo pokati kefilu.
14 Diva eshi ohamba yaAi ye shi mona, yo novalumenhu vomoshilando ova endelela ongula inene va ka shakeneke Ovaisrael molwoodi ponhele yonhumba oyo i li popepi noluhaela. Ashike ohamba oyo kaya li i shi shii kutya ope na vamwe ve i nangela konima yoshilando ve i lwife.
15 Eshi ovalumenhu vomuAi ve va ponokela, Josua nOvaisrael aveshe ova faduka po nondjila oyo ya finda mombuwa.
16 Ovanhu aveshe ovo va li moshilando ova li va lombwelwa ve va taatae; eshi va li tava taataa Josua, ova li va twalwa kokule noshilando.
17 Ovanhu aveshe muAi nomuBetel ova li va ka taataa Ovaisrael. Ova fiya oshilando sha yeuluka, ndele tava ka taataa Ovaisrael.
18 Jehova okwa lombwela Josua, a ti: “Yelula eonga olo li li meke loye we li taalelifa kuAi, osheshi ohandi ke shi yandja meke loye.” Onghee Josua okwa yelula eonga olo la li meke laye e li taalelifa koshilando osho.
19 Eshi a yelula eke laye, ovo va li va nangela ova dja po diva ponhele opo va li, ndele tava tondoka va finda moshilando noku shi kwata ko. Ove shi tomeka omundilo meendelelo.
20 Eshi ovalumenhu vomuAi va keuka, ova mona omwifi tau lundumuka moshilando wa finda mombada, nokava li tava dulu okuya onhapo keembinga adishe. Ovaisrael, ovo va li tava faduka po va finda mombuwa, ova pilukila po ovo va li tave va taataa.
21 Eshi Josua nOvaisrael aveshe va mona kutya ovo va li va nangela oshilando ove shi kwata ko nova mona omwifi tau lundumuka moshilando osho, ova piluka, ndele tava ponokele ovalumenhu vomuAi.
22 Ovo va kwata ko oshilando ova dja mo moshilando ve va shakeneke, onghee ovalumenhu vomuAi ova li va kondekelwa pokati, Ovaisrael vamwe ova li kombinga imwe, navamwe okombinga ikwao, nova li ve va dipaa, nokape na oo a li a xupa po, ile a faduka po.
23 Ashike ohamba yaAi ove i kwata i na omwenyo, ndele tave i twala kuJosua.
24 Eshi Ovaisrael va mana okudipaa ovakwaita aveshe vomuAi ovo ve va taataela mombuwa, nova dipaa keshe umwe neongamukonda, Ovaisrael aveshe ova shuna kuAi, ndele tave shi hanauna po neongamukonda.
25 Ovanhu aveshe vomuAi ovo va fya efiku olo, okudja komulumenhu fiyo okomukainhu, ova li 12 000.
26 Josua ka li a shunifa eke laye pedu olo a li a yelulifa eonga fiyo osheshi a hanauna po* ovakalimo aveshe vomuAi.
27 Ashike Ovaisrael ova kufa oimuna noixuulwa yomoshilando osho i ninge yavo, she likolelela komalombwelo oo Jehova a li a yandja kuJosua.
28 Opo nee Josua okwa xwika po Ai, nopa xupa ashike onduba yomamanya oyo i li ko fiyo okunena eli.
29 Josua okwa dipaa ohamba yaAi nokwe i endjelelifa komuti fiyo okomatango, naashi etango la li pokuningina, okwa yandja elombwelo oshimhu shayo shi kufwe ko komuti. Opo nee ove shi ekela poshivelo shoshilando, nokusho ova ongela ko onduba yomamanya inene, oyo i li ko fiyo okunena.
30 Konima yaasho, Josua okwa tungila Jehova, Kalunga kaIsrael, oaltari komhunda yaEbal,
31 ngaashi ashike Moses omupiya waJehova a li a lombwela Ovaisrael, nongaashi sha shangwa membo lOmhango yaMoses kutya: “Oaltari ya tungwa nomamanya oo inaa tetwa noshilongifo keshe sha longwa moshivela shilaula.” Ova yambela Jehova omaxwikiloyambo nosho yo omayambo oukumwe koaltari oyo.
32 Konhele oko, Josua okwa shangela ko omamanya ta tape mOmhango, oyo Moses a li a shanga moipafi yOvaisrael.
33 Ovaisrael aveshe, ovakulunhu vavo, ovaleli novatokoli vavo ova li va fikama keembinga adishe dOshikefa, osho shi li komesho yovapristeri Ovalevi, ovo va li va humbata oshikefa shehangano laJehova. Ovanailongo navo opo va li nosho yo ovadalelwamo. Etata lomuvo ola li la fikama popepi nomhunda yaGerisim, netata likwao opopepi nomhunda yaEbal (ngaashi ashike Moses, omupiya waJehova, a li e va lombwela), va nangeke noupuna ovanhu vomuIsrael.
34 Konima yaasho, Josua okwa lesha mokule eendjovo adishe domOmhango, omanangeko noupuna nomafingo, she likolelela kwaashishe osho sha shangwa membo lOmhango.
35 Meendjovo adishe odo Moses a popya kape na nande ondjovo imwe yomudo Josua ina lesha mokule moipafi yeongalo alishe lOvaisrael, mwa kwatelwa ovakainhu nounona nosho yo ovanailongo ovo va li hava di* mokati kavo.
Eshangelo lopedu
^ Ile “omaliko oo a xupa po konima yolwoodi.”
^ Ile “a yapulila ehanauno.”
^ Eln., “ende.”
