Levitikus 1:1-17
-
Exwikiloyambo (1-17)
1 Jehova okwa ifana Moses, ndele ta popi naye metwali lokwoongalela, ta ti:
2 “Popya nOvaisrael,* u va lombwele kutya, ‘Ngeenge ope na umwe womunye ta yambele Jehova omayambo oinamwenyo yopovanhu, oku na okuyandja omayambo aye, eengobe, eedi, ile oikombo.
3 “‘Ngeenge eyambo laye oli li exwikiloyambo longobe, oku na okuyandja omhedi ya koshoka. Oku na oku i yandja nehalo liwa moipafi yaJehova poshivelo shetwali lokwoongalela.
4 Ota ka tenheka omake aye komutwe woshinamwenyo shexwikiloyambo, na Kalunga ota ka tambula ko omayambo aye noku mu dimina po omatimba aye.
5 “‘Ondumetana oi na okudipawa moipafi yaJehova, novanamati vomupristeri Aron otava ka yandja ohonde yondumetana oyo, nokushamina ohonde yayo keembinga adishe doaltari, oyo i li poshivelo shetwali lokwoongalela.
6 Oshinamwenyo shexwikiloyambo oshi na okuyuvwa nokutetaulwa moinhimbu.
7 Ovanamati vomupristeri Aron ove na okushakala omundilo koaltari nokutula oikuni pediko.
8 Ovanamati vomupristeri Aron otava ka tula oinhimbu yeyambo, nomutwe nosho yo oinghene* kombada yoikuni oyo i li pediko koaltari.
9 Omandjadja ayo noitukulwa yayo aishe oi na okukoshwa momeva, nomupristeri oku na oku i xwika po aishe koaltari i li exwikiloyambo, eyambo lomundilo ledimba liwa,* koshipala shaJehova.
10 “‘Ngeenge eyambo laye lexwikiloyambo odjona yondume, ile oshikombo, oku na okuyandja oshindume sha koshoka.
11 Oshi na okudipaelwa kombinga yokolundume loaltari moipafi yaJehova, novanamati vomupristeri Aron otava ka shamina ohonde yasho keembinga adishe doaltari.
12 Omupristeri ote ke shi tetaula moinhimbu, ndele te i tula kombada yoikuni, oyo i li pomundilo koaltari pamwe nomutwe washo noinghene yasho.*
13 Omupristeri oku na okukosha omandjadja noitukulwa yasho aishe momeva, ndele te i yandje aishe noku i xwika po koaltari. Olo exwikiloyambo, eyambo lomundilo ledimba liwa,* koshipala shaJehova.
14 “‘Ashike ngeenge ota yandje oudila ve li exwikiloyambo kuJehova, oku na okuyandja eyambo laye leenghuti domatende, ile leenghutyona dopovanhu.
15 Omupristeri ote ke di twala koaltari nokuteta ko omitwe dado, ndele te di xwikile koaltari, ashike ohonde yado oi na okutilwashi kombinga imwe yoaltari.
16 Oku na okukufa ko oikutunino yado nomalududi ado, ndele te a umbile kombinga ikwao yoaltari, koushilo, konhele oko haku ekelwa omute.*
17 Ote ke di tanda popepi nomavava, ndele ite di tukula moitukulwa ivali. Opo nee omupristeri ote ke di xwikila koaltari kombada yoikuni oyo i li pomundilo, di li exwikiloyambo, eyambo lomundilo ledimba liwa,* koshipala shaJehova.
Eshangelo lopedu
^ Eln., “novanamati vaIsrael.”
^ Ile “oinghene oyo i li keefiyo.”
^ Ile “tali udifa nawa, tali tulumukifa.” Eln., “tali fuwifa.”
^ Ile “noinghene oyo i li keefiyo.”
^ Ile “tali udifa nawa, tali tulumukifa.” Eln., “tali fuwifa.”
^ Ile “omute womaadi,” sha hala okutya, omute oo wa ndodelwa komaadi omaxwikiloyambo.
^ Ile “tali udifa nawa, tali tulumukifa.” Eln., “tali fuwifa.”
