Levitikus 11:1-47
-
Oinamwenyo oyo ya koshoka naayo inai koshoka (1-47)
11 Opo nee Jehova okwa lombwela Moses naAron, ta ti:
2 “Lombweleni Ovaisrael kutya, ‘Ei oyo oinamwenyo yokombada yedu oyo tamu dulu okulya:
3 Oshinamwenyo keshe shi na omakondo a pandjuka, e na omwaka pokati nohashi alula, otashi dulu okuliwa.
4 “‘Kamu na okulya oinamwenyo oyo hai alula, ile oyo i na omakondo a pandjuka: ngaashi ongamelo, ohai alula, ashike kai na omakondo a pandjuka. Inai koshoka kunye.
5 Kamu na okulya okahelemani, molwaashi ohaka alula, ashike kake na omakasha a pandjuka. Inaka koshoka kunye.
6 Kamu na okulya okandiba, osheshi nako ohaka alula, ashike kake na omakasha a pandjuka. Inaka koshoka kunye.
7 Kamu na okulya oshingulu, molwaashi oshi na omakondo a pandjuka, e na omwaka pokati, ashike ihashi alula. Inashi koshoka kunye.
8 Inamu lya ombelela yayo noinamu i kuma, ngeenge ya fya. Inai koshoka kunye.
9 “‘Apa otapa shikula oinamwenyo yomomeva aishe oyo tamu dulu okulya. Oinamwenyo aishe oyo hai kala momeva i na omilenge nosho yo omapeta, kutya nee omomafuta, ile omomilonga, oyo mu na okulya.
10 Ashike oinamwenyo aishe oyo i li momafuta nomomilonga, oyo ihe na omilenge nomapeta, mokati koipuka aishe noinamufudo* aishe ikwao, oyo i li momeva, inai koshoka kunye.
11 Molwaashi inai koshoka kunye, inamu lya nande ombelela yayo, noinamu linyateka naayo ya fya.
12 Oinamwenyo aishe yomomeva oyo ihe na omilenge nomapeta inai koshoka kunye.
13 “‘Ei oikwamavava oyo mu na okutonda; kai na okuliwa, molwaashi inai koshoka: onhwa, oshikodinhwa, onghombenhwa,
14 ookaimbi voluvala lediya, oludi keshe lookaimbi valaula,
15 oludi keshe lookola,
16 omho, exuvi, kakwaya, oludi keshe lookakodi,
17 kakulu, onghukuti, eshikiti, olo li na omatwi male,
18 hangolokanyanga, onyundu, onhwa, oyo ihe na omalududi komutwe,
19 exuwashi, oludi keshe lookandoko, depupu nelimalima.
20 Oipuka aishe oyo i na omavava, oyo hai endifa omaulu ane, oi li oshinima inashi koshoka kunye.
21 “‘Moipuka oyo i na omavava nohai endifa omaulu ane, omu na ashike okulya oyo i na omaulu avali male e dule makwao, oo hae i kwafele i nhukanhuke kedu.
22 Imwe yomuyo oyo tamu dulu okulya oyo ei: omaludi oshipaxu osho hashi tembuka, oshipaxu osho hashi liwa, ookashenye nosho yo ooshanghana.
23 Oipuka ikwao aishe oyo i na omavava noi na omaulu ane, oi li oshinima inashi koshoka kunye.
24 Ngeenge omwe i li, itamu kala mwa koshoka. Keshe oo te i kumu ya fya, ota kala ina koshoka fiyo okonguloshi.
25 Keshe oo te i humbata ya fya oku na okukosha oikutu yaye, nota kala ina koshoka fiyo okonguloshi.
26 “‘Oinamwenyo aishe oyo i na omakondo a pandjuka, ashike kae na omwaka pokati, noihai alula, inai koshoka kunye. Keshe oo te i kumu ota kala ina koshoka.
27 Oinamwenyo aishe oyo hai endifa omakasha mokati koinamwenyo oyo hai endifa omaulu aeshe ane, inai koshoka kunye. Keshe oo te i kumu ya fya, ota kala ina koshoka fiyo okonguloshi.
28 Keshe oo te i humbata ya fya oku na okukosha oikutu yaye, nota kala ina koshoka fiyo okonguloshi. Inai koshoka kunye.
29 “‘Ei oipuka yokombada yedu oyo inai koshoka kunye: onghwi, omhuku, oludi keshe loinyengele,
30 okakoko, shikangala, shinyengele wokomamanya, sheshele nosho yo fimbi.
31 Oipuka oyo inai koshoka kunye. Keshe oo te i kumu ya fya, ota kala ina koshoka fiyo okonguloshi.
32 “‘Koshinima keshe oko tai wile, ngeenge ya fya otashi kala inashi koshoka, kutya nee okoilongifo oyo ya longwa moiti, okoshikutu, okoshipa, ile okoshako. Oshilongifo keshe sha longifwa oshi na okutulwa momeva, notashi kala inashi koshoka fiyo okonguloshi; opo nee otashi ka kala sha koshoka.
33 Ngeenge osha wile koshiyuma shedu, ou na oku shi tataula po, nakeshe osho shi li mo otashi kala inashi koshoka.
34 Oikulya keshe tai kumwa komeva a dja moshiyuma osho otai kala inai koshoka, noshikunwa keshe shi li moshiyuma omo otashi kala inashi koshoka.
35 Oshinima keshe osho sha wilwa koshinima osho sha fya otashi kala inashi koshoka. Kutya nee omefiya, ile okefiya linini, oli na okutataulwa po moitandu. Inai koshoka, notai kala inai koshoka kunye.
36 Ofifiya nondungu oyo hai kala omeva oyo ashike tai kala ya koshoka, ashike keshe oo ta kumu osho sha fya ota kala ina koshoka.
37 Ngeenge oshinamwenyo osho sha fya osha wile kombuto yoshimeno, oyo tai ka kunwa, otai kala ya koshoka.
38 Ngeenge ombuto oya tekelwa, ndele tai wilwa koinima oyo ya fya, ombuto oyo otai kala inai koshoka kunye.
39 “‘Ngeenge oshinamwenyo osho hashi liwa oshe lifile, keshe oo te shi kumu ota kala ina koshoka fiyo okonguloshi.
40 Keshe oo ta li ombelela yoshinamwenyo she lifila oku na okukosha oikutu yaye, nota kala ina koshoka fiyo okonguloshi. Keshe oo ta humbata oshinamwenyo she lifila oku na okukosha oikutu yaye, nota kala ina koshoka fiyo okonguloshi.
41 Oipuka aishe yokombada yedu oi li oshinima inashi koshoka. Kai na okuliwa.
42 Kamu na okulya oinamwenyo aishe oyo hai endifa edimo, oinamwenyo oyo hai endifa omaulu ayo aeshe ane, ile oipuka aishe yokombada yedu oyo i na omaulu mahapu, molwaashi inai koshoka.
43 Inamu* lininga mu kale muvatondifa omolwoipuka oyo, noinamu linyateka nye vene, ndele tamu kala inamu koshoka omolwayo.
44 Aame Jehova, Kalunga keni, nomu na okuliyapula nye vene nokukala ovayapuki, molwaashi ame omuyapuki. Onghee inamu* linyateka noipuka oyo tai linyenge kombada yedu.
45 Aame Jehova, oo e mu pitifa mo medu laEgipiti, opo ndi mu ulikile kutya aame Kalunga keni, nomu na okukala ovayapuki, molwaashi ame omuyapuki.
46 “‘Ei omhango i na sha noinamwenyo, oikwamavava, oshinamwenyo* keshe tashi linyenge momeva nosho yo oshinamwenyo* keshe osho shi li kombada yedu,
47 opo pa kale eyooloko pokati kaayo inai koshoka naayo ya koshoka, nopokati kaayo i na okuliwa naayo ihe na okuliwa.’”
Eshangelo lopedu
^ Ile “omwenyo.”
^ Ile “Eemwenyo deni.”
^ Ile “eemwenyo deni.”
^ Ile “omwenyo.”
^ Ile “omwenyo.”
