Levitikus 18:1-30
18 Jehova okwa popya vali naMoses, a ti:
2 “Popya nOvaisrael u va lombwele kutya, ‘Aame Jehova, Kalunga keni.
3 Inamu lihumbata ngaashi ovanhu vomedu laEgipiti, omo mwa li, noinamu ninga osho tava ningi medu laKaanan, omo handi mu twala. Inamu enda paenghedimhango davo.
4 Omu na okudulika komatokolo ange, nomu na okudiinina eenghedimhango dange nokweenda mudo. Aame Jehova, Kalunga keni.
5 Omu na okudiinina eenghedimhango dange nomatokolo ange; keshe oo ta ningi ngaho ota kala nomwenyo omolwoinima oyo. Aame Jehova.
6 “‘Hamunhu mokati keni ta i komupambele waye wopopepi a ka nangale naye.* Aame Jehova.
7 Ino nangala naxo, noino nangala nanyoko. Oye nyoko, ku na okunangala naye.
8 “‘Ino nangala nomukulukadi waxo. Otashi fifa xo ohoni.*
9 “‘Ino nangala nomumwanyoko okakadona, kutya nee omonakadona waxo, ile omonakadona wanyoko, kutya nee okwa dalwa meumbo, ile okwa dalwa kondje.
10 “‘Ino nangala nomonakadona womonamati woye, ile nomonakadona womonakadona woye, osheshi ove li epenge* loye mwene.
11 “‘Ino nangala nomonakadona womukulukadi waxo, omona waxo, osheshi ye omumwanyoko okakadona.
12 “‘Ino nangala nomumwainakadona waxo. Ye omupambele wopopepi elela naxo.
13 “‘Ino nangala nomumwainakadona wanyoko, osheshi ye omupambele wopopepi elela wanyoko.
14 “‘Ino fifa ohoni omumwainamati waxo* mokunangala nomukulukadi waye. Osheshi oku li onga nyoko.
15 “‘Ino nangala noshitenya shoye shomukainhu. Oshi li omukulukadi womonamati woye, ku na okunangala nasho.
16 “‘Ino nangala nomukulukadi wamumwanyoko omulumenhu, molwaashi otashi fifa ohoni omumwanyoko omulumenhu.*
17 “‘Ino nangala nomukainhu nosho yo omonakadona waye. Ino kufa omonakadona womonamati waye nomonakadona womonakadona waye u nangale navo. Ove li ovapambele vaye vopopepi elela; okuninga ngaho oshinima shitondifa.*
18 “‘Ino kufa omumwainakadona womukulukadi woye a ninge omukulukadi woye omutivali, opo u nangale naye ofimbo omukulukadi woye e li natango momwenyo.
19 “‘Ino ya komukainhu u ka nangale naye pefimbo olo ina koshoka, eshi e li komafimbo.
20 “‘Ino nangala nomukulukadi wamukweni,* opo uhe linyateke ove mwene.
21 “‘Oludalo loye ino li efa nandenade li yandjelwe* Molek. Ino nyateka edina laKalunga monghedi oyo. Aame Jehova.
22 “‘Ino nangala nomulumenhu ngaashi ho nangala nomukainhu. Oshi li oshinima shitondifa.
23 “‘Omulumenhu ke na okunangala noshinamwenyo shi mu nyateke; omukainhu ke na okuliyandja koshinamwenyo a nangalwe kusho. Osho otashi nyonauna eshito.
24 “‘Inamu linyateka nandenande omolwoinima oyo, osheshi oiwana oyo handi te po punye oye linyateka noinima aishe oyo.
25 Nomolwaasho edu lavo inali koshoka, ohandi ka handukila ovakalimo vomedu olo omolwomanyono avo, nedu otali ke va kunga mo.
26 Ashike nye omu na okudiinina eenghedimhango dange nomatokolo ange, nokamu na okuninga oinima aishe oyo itondifa, kutya nee omukalimo, ile omunailongo oo e li mokati keni.
27 Osheshi oinima aishe oyo oya li ya ningwa kovanhu ovo va li hava di medu olo ofimbo inamu uya mo, ndele paife edu inali koshoka.
28 Ngeenge edu omwe linyateke, itali ke mu kunga mo monghedi ya faafana naayo la kunga mo oiwana oyo ye mu tetekela.
29 Ngeenge umwe okwa ningi oinima oyo itondifa, aveshe* ovo tave i ningi ove na okudimwa* mo moshiwana shavo.
30 Omu na okudulika filufilu kwaame mokuhalandula eenghedindjikilile adishe odo ditondifa, odo da li hadi landulwa nale ofimbo inamu uya mo, opo muhe linyateke nye vene nado. Aame Jehova, Kalunga keni.’”
Eshangelo lopedu
^ Eln., “okupenuna epenge.” Ile “okuya momilele,” eshangelo lopedu eli otali longo keshe opo pa holoka ediladilo lokunangala naumwe.
^ Eln., “oshi li epenge laxo.”
^ Ile “ohoni.”
^ Eln., “penuna epenge lomumwainamati waxo.”
^ Eln., “oshi li epenge lamumwanyoko omulumenhu.”
^ Ile “elihumbato lififa ohoni; okuduvila omilele.”
^ Ile “womushiinda shoye; hamu endafana naye.”
^ Ile “li longele; li yambelwe.”
^ Ile “eemwenyo.”
^ Ile “okudipawa.”
