Levitikus 2:1-16
-
Eendjayambo (1-16)
2 “‘Ngeenge umwe* ta yandje eendjayambo kuJehova, eyambo laye oli na okukala oufila wa nakwa nawa, noku na oku u tila omaadi nosho yo okutula mo eka ledimba liwa.
2 Opo nee oku na oku di twala kovanamati vaAron, ovapristeri, nomupristeri ota ka kufa eshambekela loufila wa nakwa nawa, omaadi nosho yo eka lao alishe ledimba liwa, ndele te u xwikile koaltari u lile po eyambo alishe,* eyambo lomundilo ledimba liwa,* kuJehova.
3 Keshe osho sha xupa po peendjayambo oshi na okuninga shaAron novanamati vaye, shi li oshinima shiyapuki elela sha dja meyambo laJehova, olo la yambwa okupitila momundilo.
4 “‘Ngeenge oto yandje eendjayambo odo da yofwa mefiya, odi na okukala oufila wa nakwa nawa, omingome dongonga di na ombululu pokati da pilulilwa mumwe nomaadi, ile inadi ya efulika, nomingome da pepuka da xuwa omaadi inadi ya efulika.
5 “‘Ngeenge eyambo loye eendjayambo da dja moshipana shedu, oli na okuningwa noufila wa nakwa nawa, inau ya efulika, wa pilulilwa mumwe nomaadi.
6 Oli na okutukaulwa moupambu, nou na oku li tila omaadi. Odo odo eendjayambo.
7 “‘Ngeenge eyambo loye eendjayambo da longekidilwa moshipana, oli na okukala la longekidwa noufila wa nakwa nawa, wa pilulilwa mumwe nomaadi.
8 Ou na okweeta eendjayambo kuJehova, odo da longekidwa moinima oyo, nodi na okuyandjwa komupristeri, oo te ke di twala popepi noaltari.
9 Omupristeri ota ka kufa dimwe domeendjayambo di lile po eyambo alishe* noku di xwikila koaltari di li eyambo lomundilo ledimba liwa* kuJehova.
10 Keshe osho sha xupa po peendjayambo oshi na okuninga shaAron novanamati vaye, shi li oshinima shiyapuki elela sha dja meyambo laJehova, olo la yambwa okupitila momundilo.
11 “‘Kamu na okuyandja kuJehova eendjayambo da ya efulika, molwaashi itamu dulu okuyambela Jehova okupitila momundilo oinima ya ya efulika, ile omaadi eenyiki.
12 “‘Omu na oku i yandja kuJehova i li eyambo loiimati oyo ya pya tete, ashike kamu na oku i twala koaltari i li edimba liwa.*
13 “‘Meendjayambo adishe odo to yandje omu na okukala mwa ya omongwa. Ino kala ino tula mo omongwa wehangano laKalunga meendjayambo doye. Eyambo keshe to yandje ou na okutula mo omongwa.
14 “‘Ngeenge oto yandje kuJehova eendjayambo doilikolomwa, oyo ya pya tete, ou na okuyandja oilya ipe* ya yofwa pomundilo, eemuma da nyanyaulwa, di li eendjayambo doilikolomwa yoye, oyo ya pya tete.
15 Ou na okutula ko omaadi nosho yo eka ledimba liwa. Oi li eendjayambo.
16 Omupristeri ote ke i xwika i lile po eyambo alishe,* sha hala okutya, dimwe domeemuma doilya, omaadi neka lao alishe ledimba liwa, i li eyambo la yambelwa Jehova okupitila momundilo.
Eshangelo lopedu
^ Ile “omwenyo.”
^ Ile “oshitukulwa sheyambo osho shi li edimbulukifo.”
^ Ile “tali udifa nawa; tali tulumukifa.” Eln., “tali fuwifa.”
^ Ile “oshitukulwa sheyambo osho shi li edimbulukifo.”
^ Ile “tali udifa nawa; tali tulumukifa.” Eln., “tali fuwifa.”
^ Ile “tali udifa nawa; tali tulumukifa.” Eln., “tali fuwifa.”
^ Ile “omitwe doilya oyo inai kukuta.”
^ Ile “oshitukulwa sheyambo osho shi li edimbulukifo.”
