Levitikus 24:1-23
24 Jehova okwa twikila okupopya naMoses, ta ti:
2 “Lombwela Ovaisrael ve ku etele omaadi mawa eemono okutemifa, opo eelamba di kale da tema efimbo alishe.
3 Aron oku na okulongekida eelamba di kale da tema efimbo alishe, okudja konguloshi fiyo ongula, koshipala shaJehova, kondje yetukulifolapi olo li li popepi noshikefa shOipelende yOumbangi metwali lokwoongalela. Oyo onghedimhango yaalushe komapupi eni aeshe.
4 Oku na okutula alushe eelamba melandulafano koshikwatelwalamba shoshingoli elela koshipala shaJehova.
5 “Ou na okukufa oufila wa nakwa nawa, ndele to teleke omingome 12 dongonga di na ombululu pokati. Momungome keshe omu na okuya oitimulongo ivali yoefa.*
6 Ou na oku di tula meengudu mbali, mongudu keshe omu na hamano, poshitaafula shoshingoli elela koshipala shaJehova.
7 Ou na okutula eka ledimba liwa mongudu keshe, notai kala ngaashi omungome oo u lile po eyambo alishe* olo la yambelwa Jehova okupitila momundilo.
8 Meshabata keshe, oku na oku u longekida alushe moipafi yaJehova. Olo ehangano laalushe kOvaisrael.
9 Otau ka ninga waAron novanamati vaye, notave ke u lila monhele iyapuki, molwaashi ou li oshinima shiyapuki elela shaye sha dja momayambo aJehova, oo a yambwa okupitila momundilo, i li onghedimhango yaalushe.”
10 Mokati kOvaisrael omwa li omonamati womukainhu Omuisrael nosho yo omulumenhu Omuegipiti, nopa li pa holoka olwoodi pokati kaye nomulumenhu Omuisrael monhanda.
11 Omonamati womukainhu Omuisrael okwa hovela okulongifa nai Edina* noku li sheka.* Onghee ova li ve mu eta kuMoses. Ina okwa li Selomit, omonakadona waDibri, womepata laDan.
12 Ova li ve mu tula modolongo, fiyo osheshi va lombwelwa etokolo laJehova.
13 Opo nee Jehova okwa tya kuMoses:
14 “Eta omunhu oo a li ta sheke edina lange pondje yonhanda, naaveshe ovo ve mu uda ove na okutenheka omake avo komutwe waye, nongudu aishe yOvaisrael oi na oku mu dipaa nomamanya.
15 Ou na okulombwela Ovaisrael kutya, ‘Ngeenge omunhu okwa sheke Kalunga kaye, ota ka handukilwa omolwenyono laye.
16 Onghee oo a longifa nai edina laJehova oku na okudipawa filufilu. Ongudu aishe yOvaisrael oi na oku mu dipaa nomamanya filufilu. Omunailongo oku na okudipawa monghedi ya faafana nomukalimo omolwokulongifa nai Edina olo.
17 “‘Ngeenge omunhu okwa kufa omunhu mukwao omwenyo,* oku na okudipawa filufilu.
18 Omunhu keshe oo ta ehameke nokudipaa oshinamwenyo shopovanhu,* oku na oku shi futa, omwenyo omomwenyo.
19 Ngeenge omunhu okwa monifa omunhu mukwao oshiponga, osho a ninga osho e na okuningilwa.
20 Okuteka omokuteka, eisho omeisho, eyoo omeyoo, naye oku na okumonifwa oshiponga sha faafana naasho a eta.
21 Omunhu oo a ehameka nokudipaa oshinamwenyo oku na oku shi futa, ashike omunhu oo a ehameka nokudipaa omunhu mukwao oku na okudipawa.
22 “‘Etokolo olo otali longo kunye, kutya okomunailongo, ile okomukalimo, molwaashi aame Jehova, Kalunga keni.’”
23 Opo nee Moses okwa popya nOvaisrael, nova eta oo a li ta sheke edina laKalunga kondje yonhanda, ndele tave mu dipaa nomamanya. Kungaho, Ovaisrael ova ninga naanaa ngaashi Jehova a lombwela Moses.
Eshangelo lopedu
^ Oitimulongo ivali yoefa oi fike peelita 4,4. Tala Oshiwedelwako B14.
^ Ile “oshitukulwa sheyambo osho shi li edimbulukifo.”
^ Sha hala okutya, edina Jehova, ngaashi sha ulikwa movelishe 15 no 16.
^ Ile “oku li popila momutyanai.”
^ Ile “okwa ehameke omwenyo womunhu keshe, ndele ta fi.”
^ Ile “ta ehameke omwenyo woshinamwenyo, ndele tashi fi.”
