Levitikus 7:1-38
7 “‘Omhango i na sha nelivelombediyambo oyo ei: Oi li oshinima shiyapuki elela.
2 Ove na okudipaela oshinamwenyo shelivelombediyambo monhele omo hamu dipaelwa oinamwenyo yomaxwikiloyambo, nohonde yasho oi na okushaminwa keembinga adishe doaltari.
3 Ota ka yandja oinghene yasho aishe, mwa kwatelwa oinghene oyo i li komushila, oinghene oyo i li komandjadja,
4 nosho yo eefiyo mbali noinghene oyo i li kudo, oyo i li popepi nekalo. Ota ka kufa ko yo oinghene oyo i li kexuli, pamwe neefiyo.
5 Omupristeri ote ke i xwikila koaltari, i li eyambo la yambelwa Jehova okupitila momundilo. Oli li elivelombediyambo.
6 Omulumenhu keshe womovapristeri ote ke li lya, noli na okulilwa monhele iyapuki. Oli li oshinima shiyapuki elela.
7 Omhango i na sha netimbayambo otai longo yo nokelivelombediyambo. Ombelela yoshinamwenyo osho sha yambwa oi na okuninga yomupristeri, oo e i longifa, eshi ta koshola.
8 “‘Ngeenge omupristeri ta yandje exwikiloyambo laumwe, oshikafa shexwikiloyambo, olo tali yandjwa komupristeri, otashi ningi shaye.
9 “‘Eendjayambo adishe odo tadi telekwa mefiya, ile tadi longekidilwa moshipana shoshivela, ile moshipana shedu odomupristeri ou te di yandje. Otadi ningi daye.
10 Ashike eendjayambo adishe odo da pilulilwa mumwe nomaadi, ile dikukutu otadi ningi dovanamati aveshe vaAron; aveshe otava mono oitukulwa i fike pamwe.
11 “‘Omhango i na sha neyambo loukumwe olo umwe ta dulu okuyandja kuJehova oyo ei:
12 Ngeenge ote li yandje, opo a ulike olupandu, oku na oku li yandja pamwe nepanduloyambo lomingome dongonga di na ombululu pokati, da lungilwa omaadi, inadi ya efulika, omingome da pepuka da xuwa omaadi inadi ya efulika nomingome dongonga di na ombululu pokati da ningwa noufila wa nakwa nawa, wa lumbakanifwa nomaadi noda xuwa omaadi.
13 Ota ka yandja eyambo laye pamwe nomingome dongonga di na ombululu pokati da ya efulika nosho yo omayambo aye oukumwe oo e li epanduloyambo.
14 Oku na okuyandja omungome umwe womoludi keshe lomingome odo ta yandje u li oshitukulwa shiyapuki kuJehova. Otashi ka ninga shomupristeri oo ta shamine ohonde yomayambo oukumwe koaltari.
15 Ombelela yepanduloyambo laye, sha hala okutya, omayambo aye oukumwe, oi na okuliwa efiku te i yambe. Ke na okutuvikila nande oimwe yomuyo fiyo efiku lomongula.
16 “‘Ngeenge eyambo olo ta yandje eano, ile eyambo lehalo liwa, oli na okuliwa mefiku olo ta yandje eyambo laye, naasho sha xupa po otashi dulu yo okuliwa mefiku la landula ko.
17 Ndele ombelela yeyambo aishe oyo ya xupa po mefiku etitatu oi na okuxwikwa po momundilo.
18 Kakele kaasho, ngeenge ombelela yeyambo loukumwe oya liwa mefiku etitatu, ou te ke i yandja ita ka kala a hokiwa nandenande. Ita ka mona mo ouwa washa. Ombelela oyo oi li oshinima inashi koshoka, nomunhu* ou ta li imwe yomuyo, ota ka mona oilanduliko omolwenyono laye.
19 Ombelela oyo ya kuma oshinima keshe inashi koshoka kai na okuliwa. Oi na okuxwikwa po momundilo. Keshe oo a koshoka oku na okulya ombelela oyo ya koshoka.
20 “‘Omunhu* keshe oo ina koshoka, ndele ta li ombelela yeyambo loukumwe laJehova, omunhu* oo oku na okudimwa* mo moshiwana shavo.
21 Ngeenge umwe* okwa kumu sha sha nyata, kutya nee onyata keshe yomunhu, ile oshinamwenyo inashi koshoka, ile oshinima keshe shitondifa inashi koshoka, ndele ta li ombelela yeyambo loukumwe laJehova, omunhu* oo oku na okudimwa* mo moshiwana shavo.’”
22 Jehova okwa twikila okupopya naMoses, ta ti:
23 “Lombwela Ovaisrael, to ti, ‘Inamu lya nande oinghene yongobe yomhedi, ile yodjona, ile yoshikombo.
24 Oinghene yoshinamwenyo osho sha hangwa sha fya nosho yo oinghene yoshinamwenyo osho sha dipawa koshinamwenyo shikwao otai dulu okulongifwa moinima imwe, ashike inamu i lya nandenande.
25 Keshe oo ta li oinghene yoshinamwenyo osho a yandja, shi li eyambo la yambelwa Jehova okupitila momundilo, oku na okudimwa* mo moshiwana shavo.
26 “‘Kamu na okulya ohonde nandenande meenhele deni adishe, kutya nee ohonde youdila, ile ohonde yoinamwenyo.
27 Keshe* oo ta li ohonde oku na okudimwa* mo moshiwana shavo.’”
28 Jehova okwa popya vali naMoses, a ti:
29 “Lombwela Ovaisrael, to ti, ‘Keshe oo ta yandje eyambo laye loukumwe kuJehova na ete oshitukulwa sheyambo laye loukumwe kuJehova.
30 Ota ka eta nomake aye oinghene pamwe nombadja, i li eyambo la yambelwa Jehova okupitila momundilo, note ke i dungadungifa i li edungadungifwayambo koshipala shaJehova.
31 Omupristeri ota ka xwikila oinghene koaltari, ashike ombadja otai ningi yaAron novanamati vaye.
32 “‘Otamu ka yandja komupristeri oshilama shokolulyo shi li oshitukulwa shiyapuki sha dja momayambo eni oukumwe.
33 Omonamati waAron oo ta yandje ohonde yomayambo oukumwe noinghene, oshilama shokolulyo otashi ningi shaye shi li oshitukulwa shaye.
34 Ame ohandi kufa ombadja yedungadungifwayambo noshilama shoshitukulwa shiyapuki, oyo ya dja momayambo oukumwe Ovaisrael, ndele handi i yandje komupristeri Aron novanamati vaye i li onghedimhango yaalushe kOvaisrael.
35 “‘Osho osha li oshitukulwa sha dja momayambo aJehova, oo a yambwa okupitila momundilo, osho shi na okulikalekelwa shi ninge shovapristeri, Aron novanamati vaye, mefiku olo va nangekwa po ve li ovapristeri vaJehova.
36 Jehova okwa yandja elombwelo va pewe oshitukulwa osho sha dja kOvaisrael mefiku olo e va vaeka. Oyo onghedimhango yaalushe komapupi avo aeshe.’”
37 Oyo omhango i na sha nexwikiloyambo, eendjayambo, etimbayambo, elivelombediyambo, eyambo lenangekepo neyambo loukumwe,
38 ngaashi ashike Jehova a lombwela Moses komhunda yaSinai mefiku olo a lombwela Ovaisrael va yandje omayambo avo kuJehova mombuwa yaSinai.
Eshangelo lopedu
^ Ile “nomwenyo.”
^ Ile “Omwenyo.”
^ Ile “omwenyo.”
^ Ile “okudipawa.”
^ Ile “omwenyo.”
^ Ile “omwenyo.”
^ Ile “okudipawa.”
^ Ile “okudipawa.”
^ Ile “Omwenyo.”
^ Ile “okudipawa.”
