Levitikus 8:1-36
-
Aron novanamati vaye tava nangekwa po ve li ovapristeri (1-36)
8 Jehova okwa twikila okupopya naMoses, ta ti:
2 “Kufa Aron pamwe novanamati vaye, oikutu, omaadi okuvaeka, omhedi yetimbayambo, eedi mbali deendume noshimbale shomingome inadi ya efulika.
3 Ndele to ongaleke ongudu yovanhu aveshe poshivelo shetwali lokwoongalela.”
4 Opo nee Moses okwa ninga naanaa ngaashi Jehova e mu lombwela, nongudu yovanhu oya li ya ongala poshivelo shetwali lokwoongalela.
5 Moses okwa tya kongudu yovanhu: “Eshi osho Jehova e tu lombwela tu ninge.”
6 Moses okwa eta Aron novanamati vaye popepi, ndele te va kosho nomeva.
7 Konima yaasho, okwa dika Aron oshikutu, te mu mange elapi, te mu dike okandjafa kehe na omaoko, ndele te mu dike okatetahema noku ka manga nomwiya,* oo wa hondjwa wokatetahema, woku ka mangela ponhele.
8 Opo nee okwe mu djaleka okapapa koponhulo, nokokapapa koponhulo okwa tula ko oumanya voUrim novoTummim.
9 Okwe mu dika elapi lokulimanga komutwe, ndele ta tula komesho yelapi olo okapapa koshingoli taka vema, ke li edidiliko* liyapuki li na sha nokunangekwa po, ngaashi ashike Jehova a li a lombwela Moses.
10 Opo nee Moses okwa kufa omaadi okuvaeka, nokwa vaeka etwalihangano nosho yo oinima aishe oyo ya li mo, ndele te i yapula.
11 Konima yaasho, amwe okwe a shamina luheyali koaltari nokuvaeka oaltari nosho yo oinima yayo aishe noshiyaxa nosho yo oshitenda shasho oko sha tenhekwa, opo e i yapule.
12 Xuuninwa, okwa tila omaadi amwe okuvaeka momutwe waAron, ndele te mu vaeke, opo e mu yapule.
13 Opo nee Moses okwa eta ovanamati vaAron popepi, ndele te va dike oikutu nokwe va tangela omalapi, noku va dika* embale, ngaashi ashike Jehova a li a lombwela Moses.
14 Opo nee okwa eta omhedi yetimbayambo, na Aron novanamati vaye ova tenheka omake avo komutwe womhedi yetimbayambo.
15 Moses okwe i dipaa nokwa kufa ohonde nomunwe waye noku i tula keembinga adishe doaltari, ndele ta koshola oaltari koulunde, ashike ohonde oyo ya xupa mo okwe i tila koshitako shoaltari. Kungaho, okwe i yapula, opo omayambo ediminepo a yandjelwe ko.
16 Konima yaasho, Moses okwa kufa oinghene aishe oyo ya li komandjadja, oinghene oyo ya li kexuli, eefiyo mbali noinghene yado, ndele te i xwikile koaltari.
17 Oinima aishe yomhedi oyo ya xupa po, oshikafa shayo, ombelela yayo noshandja shayo, okwe i xwika po momundilo kondje yonhanda, ngaashi ashike Jehova a li a lombwela Moses.
18 Opo nee okwa eta popepi odi yondume yexwikiloyambo, na Aron novanamati vaye ova tenheka omake avo komutwe wodi oyo.
19 Opo nee Moses okwe i dipaa, ndele ta shamine ohonde keembinga adishe doaltari.
20 Moses okwa teta odi yondume moinhimbu, nokwa xwika po omutwe, oinhimbu noinghene.*
21 Moses okwa kosha omandjadja noitukulwa imwe vali, ndele odi yondume aishe te i xwike po koaltari. Ola li exwikiloyambo ledimba liwa.* Ola li eyambo la yambelwa Jehova okupitila momundilo, ngaashi ashike Jehova a li a lombwela Moses.
22 Opo nee okwa eta odi yondume onhivali, odi yenangekepo, na Aron novanamati vaye ova tenheka omake avo komutwe wodi oyo.
23 Moses okwe i dipaa, ndele ta kufa ohonde yayo imwe noku i vaeka kokutwi kwokolulyo kwaAron nosho yo komunwe wa kula wokeke laye lokolulyo nokomunwe wa kula wokomhadi yaye yokolulyo.
24 Opo nee Moses okwa eta ovanamati vaAron komesho, ndele ta vaeke ohonde imwe komatwi avo okolulyo nosho yo kominwe davo da kula deke lokolulyo nokominwe davo da kula dokeemhadi dokolulyo. Moses okwa shamina ohonde oyo ya xupa mo keembinga adishe doaltari.
25 Opo nee okwa kufa oinghene, oinghene oyo i li komushila, oinghene aishe oyo ya li komandjadja, oinghene oyo i li kexuli, eefiyo mbali noinghene yado nosho yo oshilama shokolulyo.
26 Moshimbale shomingome inadi ya efulika, osho sha li koshipala shaJehova, okwa kufa mo omungome wongonga u na ombululu pokati inau ya efulika, omungome wongonga u na ombululu pokati, wa telekwa momaadi, nosho yo omungome wa pepuka. Opo nee okwe di tula koinhimbu yoinghene nosho yo koshilama shokolulyo.
27 Konima yaasho, aishe okwe i tula momake aAron nomomake ovanamati vaye, ndele ta hovele oku i dungadungifa i li edungadungifwayambo koshipala shaJehova.
28 Moses okwe i kufa mo momake avo, ndele te i xwikile koaltari kombada yexwikiloyambo. Oya li eyambo lenangekepo ledimba liwa.* Ola li eyambo la yambelwa Jehova okupitila momundilo.
29 Opo nee Moses okwa kufa ombadja, ndele te i dungadungifa i li edungadungifwayambo koshipala shaJehova. Ombadja oyo yodi yondume yenangekepo oya ninga oshitukulwa shaMoses, ngaashi ashike Jehova a li a lombwela Moses.
30 Opo nee Moses okwa kufa omaadi amwe okuvaeka nohonde imwe, oyo ya li koaltari, ndele te i shamine kuAron, koikutu yaye, kovanamati vaye nokoikutu yovanamati vaye ovo va li naye. Kungaho, okwa yapula Aron, oikutu yaye, ovanamati vaye noikutu yavo.
31 Opo nee Moses okwa tya kuAron nokovanamati vaye: “Telekeleni ombelela poshivelo shetwali lokwoongalela, naapo opo tamu ke i lila pamwe nomungome, oo u li moshimbale shenangekepo, ngaashi ashike nda li nda popya kutya, ‘Aron novanamati vaye otave ke i lya.’
32 Ombelela oyo ya xupa po nomungome oo wa xupa po omu na oku i xwika po momundilo.
33 Kamu na okudja po poshivelo shetwali lokwoongalela oule womafiku aheyali, fiyo omafiku enangekepo a pwa ko, molwaashi okunangekwa po kweni mu li ovapristeri* otaku kwata omafiku aheyali.
34 Jehova okwa popya tu ninge osho twa ninga nena, opo mu kosholwe.
35 Omu na okukala poshivelo shetwali lokwoongalela omutenya noufiku, oule womafiku aheyali, nomu na okuninga ashishe osho Jehova e mu lombwela mu ninge, opo muha fye, osheshi osho nda lombwelwa.”
36 Aron novanamati vaye ova ninga ashishe osho Jehova a popya okupitila muMoses.
Eshangelo lopedu
^ Ile “nekwamo lomoshiya.”
^ Ile “oshikoroni shiyapuki.”
^ Ile “tangela.”
^ Ile “oinghene oyo ya dingilila eefiyo.”
^ Ile “tali udifa nawa; tali tulumukifa.” Eln., “tali fuwifa.”
^ Ile “tali udifa nawa; tali tulumukifa.” Eln., “tali fuwifa.”
^ Eln., “okuyadifa omake eni.”
