Embo laLukas 14:1-35
14 Pomhito vali imwe, Jesus okwa li ta li meumbo laumwe womovawiliki velongelokalunga lOvafarisai mefiku lEshabata, naavo va li mo ova li tave mu tale noku mu konenena.
2 Ndele tala, komesho yaye okwa li ku na omulumenhu ta vele oudu wodindo.
3 Opo nee Jesus okwa pula ovanongo vomhango nOvafarisai ta ti: “Oshi li ngoo pamhango okuvelula mEshabata?”
4 Ndele inava nyamukula sha. Opo nee Jesus okwa kwata omulumenhu oo, te mu velula nokwe mu lekela a ye.
5 Okwa tya kuvo: “Olyelye womunye e na omonamati ile ongobe yaye ya wila mondungu mefiku lEshabata ndele ta kala ine i kufa mo diva?”
6 Ashike inava nyamukula sha.
7 Eshi a mona nghee ovanhu ovo va shivwa tave lihoololele oipundi yokomesho, okwe va lombwela* ta ti:
8 “Ngeenge wa shivwa kuumwe koshivilohombolo, ino kala omutumba koipundi yokomesho. Otashi dulika ku ka dje umwe a fimana e ku dule, oo naye yo a shivwa.
9 Ndele oo e mu shiva te uya kwoove ta ti, ‘Oshipundi osho u li omutumba oshomulumenhu ou.’ Opo nee oto ka ya koshipundi shokonima wa fya ohoni.
10 Ngeenge wa shivwa, inda ndele to kala koipundi yokonima opo oo e ku shiva eshi te uya, ota ka tya kwoove, ‘Kaume, inda koipundi yokomesho.’ Opo nee oto ka fimanekwa moipafi yovaenda vakweni aveshe.
11 Keshe ou te linenepeke ota ka ninipikwa, nakeshe ou te lininipike ota ka nenepekwa.”
12 Jesus okwa tya yo komulumenhu oo a li e mu shiva: “Ngeenge to ningi oshivilo, ino shiva ashike ookaume koye, ovamwaxo, ovapambele nosho yo ovashiinda shoye oipuna, osheshi ngeenge wa ningi ngaho otashi dulika navo ve ke ku shive u ka lye komaumbo avo.
13 Ndele ngeenge to ningi oshivilo, shiva eehepele, oingudu, oilema novapofi,
14 noto ka kala wa hafa shaashi kave na sha shoku ku alulila. Opo nee oto ka mona ondjabi menyumuko lovayuki.”
15 Eshi umwe womovaenda e shi uda, okwa tya kuJesus: “Ou ta li* mOuhamba waKalunga ota kala a hafa.”
16 Jesus okwa tya kuye: “Opa li omulumenhu umwe oo a li ta ningi oshivilo shinene, nokwa li a shiva ovanhu vahapu.
17 Eshi efimbo loshivilo la fika, okwa tuma omupiya waye a lombwele ovo va shivwa ta ti, ‘Ileni, osheshi oinima aishe paife oya pwa okulongekidwa.’
18 Ndele aveshe ova hovela okuninga omalipopilo. Ou wotete okwa tya kuye, ‘Onda landa epya, nonda pumbwa okuya ko ndi ke li tale; pitike nge ndi ye.’
19 Omutivali okwa ti, ‘Onda landa eenani omulongo, nonda hala ndi ka tale kutya otadi nane ngahelipi, onghee pitike nge ndi ye.’
20 Mukwao vali okwa ti, ‘Opo ashike nda hombola, onghee itandi dulu okuuya.’
21 Ndele omupiya okwe uya, nokwa lombwela omwene waye oinima oyo. Opo nee mwene weumbo okwa handuka unene nokwa tya komupiya waye, ‘Inda diva komapandavanda a kula nokwaao manini oshilando, ndele to eta ko eehepele, oingudu, ovapofi noilema.’
22 Eshi omupiya a aluka okwa ti, ‘Omwene, onda ninga ngaashi wa lombwela nge, ashike natango omu na onhele.’
23 Opo nee omwene okwa lombwela omupiya ta ti, ‘Inda keendjila oko taku ende ovanhu ndele to va lombwele ve uye, opo meumbo lange mu kale mu yadi.
24 Onghee ohandi mu lombwele, mwaavo va shivwa kape na nande oumwe ta ka lya oitendele yange.’”
25 Ndele okwa pungulukila keengudu dinene dovanhu odo a li ta ende pamwe nado, nokwa tya kudo:
26 “Ngeenge ope na ou a hala okuninga omuhongwa wange oku na okukala e hole nge shi dulife xe, ina, omukulukadi waye, ovana vaye, ovamwainamati, ovamwainakadona, nokuli nomwenyo waye. Ngeenge hasho, ita dulu okuninga omuhongwa wange.
27 Keshe ou ita humbata omuti waye womahepeko,* ndele ta shikula nge, ita dulu okuninga omuhongwa wange.
28 Olyelye womunye ngeenge a hala okutunga oshungongulu ita kala omutumba tete ndele ta valula a tale ngeenge oku na oitungifo ya wana?
29 Ngeenge hasho, otashi dulika a tunge ekanghameno layo, ndele ta nyengwa oku i mana, naaveshe ovo ve mu mona otava hovele oku mu sheka,
30 tava ti: ‘Omulumenhu ou okwa hovela okutunga oshungongulu, ndele okwa nyengwa oku i mana.’
31 Ngeenge ohamba tai ka lwifa ohamba ikwao, mbela kai na okukala omutumba tete nokukundafana navakwao ngeenge otai dulu ngoo okuya moita novakwaita 10 000 opo va finde ohamba oyo tai uya novakwaita 20 000?
32 Ndele ngeenge itai dulu olwoodi olo, otai tumu ko ovakalelipo vayo fimbo ohamba ikwao i li kokule opo va pange ombili.
33 Sha faafana, ngeenge ope na ou a hala okuninga omuhongwa wange, na fiye po oinima yaye aishe.
34 “Oshoshili kutya omongwa ouwa. Ndele ngeenge owa tutuka, otau shunwa eenghono kushike?
35 Ovanhu otave u ekeleshi, osheshi itau wapalele okulumbakanifwa nedu ile noushosho. Ou e na omatwi, na ude ko.”
Eshangelo lopedu
^ Eln., “okwa longifa efaneko.”
^ Eln., “ta li omungome.”
^ Tala omafatululo oitya.
