Embo laMateus 6:1-34
6 “Kaleni mwa lungama opo muha kale tamu limonikifa kovanhu kutya omuvayuki, osheshi ngeenge omwa ningi ngaho, Xo yeni womeulu ite ke mu pa ondjabi.
2 Onghee hano, ngeenge to yandje oikwafa,* ino shika enghuma tete ngaashi ovanaihelele hava ningi moinagoga nomomapandavanda opo va fimanekwe kovanhu. Oshili ohandi mu lombwele, vo ova mona nale ondjabi yavo aishe.
3 Ndele ove ngeenge to yandje oikwafa, ino efa eke loye lokolumosho li shiive osho eke lokolulyo tali ningi,
4 opo oikwafa yoye i kale meholeko, naXo, ou ha mono meholeko, ote ke ku pa ondjabi.
5 “Natango, ngeenge tamu ilikana, inamu ninga ngaashi ovanaihelele, osheshi ove hole okwiilikana ve li ofika meeshinagoga nopomashakeneno eendjila opo va monike kovanhu. Oshili ohandi mu lombwele, vo ova mona nale ondjabi yavo aishe.
6 Ngeenge to ilikana, inda monduda yoye ndele to idile omuvelo, opo nee to ilikana kuXo womeulu. Kungaho, Xo ou ha mono meholeko ote ke ku pa ondjabi.
7 Ndele ngeenge to ilikana, ino endulula oinima ya faafana ngaashi ovanhu vomoiwana imwe hava ningi, osheshi ohava diladila kutya otava ka udika ngeenge ova ilikana omailikano malemale.
8 Onghee hano, inamu va fa, osheshi Xo yeni oku shii osho mwa pumbwa ofimbo nokuli inamu mu indila.
9 “Hano omu na okwiilikana ngaha:
“‘Tate yetu ou u li meulu, edina loye nali yapulwe.*
10 Ouhamba woye nau uye. Ehalo loye nali wanifwe yo kombada yedu ngaashi meulu.
11 Tu pa nena omungome wefiku keshe;
12 tu dimina po omatimba etu ngaashi nafye hatu dimine po ovo va nyona kufye.
13 Ino efa tu ye momayeleko,* ndele tu xupifa komunawii.’
14 “Ngeenge ohamu dimine po ovanhu omanyono avo, Xo yeni womeulu naye ote ke mu dimina po yo,
15 ndele ngeenge ihamu dimine po ovanhu omanyono avo, Xo yeni naye ite ke mu dimina po.
16 “Ngeenge tamu lidilike oikulya, inamu kala mu na oipala ya nyemata ngaashi ovanaihelele, shaashi ohava lulike oipala yavo* opo va monike kovanhu kutya ove lidilika. Oshili ohandi mu lombwele, ova mona ondjabi yavo aishe.
17 Ndele ove ngeenge to lidilike oikulya, likosha moshipala nokulivaeka omaadi momutwe,
18 opo uha monike kovanhu kutya owe lidilika, ndele okuXo ashike ou ha mono meholeko. Opo nee Xo ou ha mono meholeko ote ke ku pa ondjabi.
19 “Ino liongelela omamona kombada yedu, oko eenhwishi nolushu hali nyonauna, naako eembudi hadi teya nokuvaka.
20 Ponhele yaasho, liongelela omamona meulu, omo muhe na eenhwishi nolushu olo hali nyonauna, nomuhe na eembudi odo hadi teya nokuvaka.
21 Osheshi oko ku na emona loye oko yo ku na omutima woye.
22 “Eisho olo ouyelele wolutu. Ngeenge eisho loye ola tala koshinima shimwe ashike,* olutu loye alishe otali ka kala mouyelele.
23 Ndele ngeenge eisho loye otali tale koinima ii,* olutu loye alishe otali ka kala momilaulu. Ngeenge osho shi li mwoove kashi fi ouyelele ndele omilaulu, ito ka kala tuu momilaulu fokofoko!
24 “Kape na ou ta dulu okulongela oovene vavali, osheshi ota tondo umwe ndele ta kala e hole mukwao, ile ta kanyatele kuumwe ndele ta dini mukwao. Itamu dulu okulongela Kalunga pamwe nemona.
25 “Onghee hano, ohandi mu lombwele: Inamu kala mu noshisho shi na sha nokukalamwenyo kweni,* kutya otamu li shike, ile otamu nu shike, ile kutya otamu djala shike. Mbela omwenyo inau fimana u dule oikulya, nolutu inali fimana li dule oikutu?
26 Taleni nokukonenena eedila dokeulu; ihadi kunu, ihadi teya noihadi tuvikile momaanda, ndele Xo yeni womeulu ohe di palula. Mbela inamu fimana unene mu di dule?
27 Olyelye womunye ta dulu okuweda ko nande okanini* koule wokukalamwenyo kwaye mokukala e na oshisho?
28 Natango, omolwashike mu na oshisho shoikutu? Lihongeni keengala domoixwa nghee hadi kulu; ihadi hodile noihadi hondjo,
29 ndele ohandi mu lombwele, nokuli naSalomo moshinge shaye ashishe ka djalele ngaashi imwe yomudo.
30 Ngeenge Kalunga oha dike oimeno yomoixwa oyo i li po ashike nena ndele mongula oya ekelwa mediko, mbela ite ke mu dika, nye ovo mu na eitavelo linini?
31 Onghee hano, inamu kala mu na oshisho, mu tye, ‘Ohatu li shike?’ ile, ‘Ohatu nu shike?’ ile, ‘Ohatu djala shike?’
32 Osheshi ovanhu vomoiwana imwe i lili ohava lalakanene oinima aishe oyo. Ndele Xo yeni womeulu oku shii kutya omwa pumbwa oinima aishe oyo.
33 “Hano kaleni tamu kongo tete Ouhamba nouyuki waye, noinima aishe ikwao otamu ke i wedelwa ko.
34 Onghee, inamu kala noshisho shefiku lomongula, osheshi nalo otali ka kala noisho yalo. Efiku keshe oli na oudjuu walo.
Eshangelo lopedu
^ Ile “oikwafa yeehepele.” Tala omafatululo oitya.
^ Ile “nali talike ko liyapuki.”
^ Eln., “Ino tu twala momayeleko.”
^ Ile “ihava file oshisho eholokepo lavo.”
^ Ile “oli wete ko nawa.” Eln., “oli na ondjele.”
^ Eln., “ngeenge eisho loye olii.”
^ Ile “shi na sha neemwenyo deni.”
^ Eln., “oludimbo.”
