Embo laMateus 8:1-34
8 Konima eshi Jesus a londoloka komhunda, ongudu yovanhu oya li ye mu shikula.
2 Ndele tala, kuye okwe uya omunashilundu nokwe linyongamena puye,* ta ti: “Omwene, ngeenge owa hala, oto dulu okuvelula nge.”
3 Okwa yelula eke laye, nokwe mu kuma, ndele ta ti: “Onda hala! Veluka.” Opo nee okwa veluka diva koudu waye woshilundu.
4 Ndele Jesus okwa tya kuye: “Tala, ino lombwela nande oumwe, ashike inda u ke liulike komupristeri nokuyandja omayambo ngaashi sha popiwa mOmhango yaMoses, shi ninge oumbangi kuvo.”
5 Eshi Jesus a fika muKapernaum, kuye okwe u ya omukulunhu wetangakwaita, te mu indile,
6 ta ti: “Omufimanekwa, ondi na omupiya wange a nangala keumbo ta vele ombada, ndele ota vele neenghono.”
7 Okwa tya kuye: “Ohandi uya paife ndi mu velule.”
8 Omukulunhu wetangakwaita okwa nyamukula ta ti: “Omufimanekwa, ame inandi wana oku ku tambula meumbo lange; popya ashike ondjovo ndele omupiya wange ta veluka.
9 Ame naame omupangelwa, nondi na yo ovakwaita handi va wilike; ngeenge nda ti kuumwe, ‘Inda!’ ota i, nongeenge onda ti kumukwao, ‘Ila!’ ote uya, ile ngeenge onda ti komupiya wange, ‘Ninga shonhumba!’ ote shi ningi.”
10 Ndele Jesus eshi e shi uda, okwa li a kumwa, ndele ta ti kwaavo ve mu shikula: “Ohandi mu lombwele oshili, muIsrael inandi mona mo nande oumwe e na eitavelo la kola la tya ngaho.
11 Ndele ohandi mu lombwele kutya vahapu otava ka dja koushilo nokouninginino, ndele tava ka kala omutumba poshitaafula naAbraham, Isak naJakob mOuhamba womeulu;
12 ofimbo ovana vOuhamba tava ka umbilwa pondje momilaulu, omo tava ka kala tava lilaana nokulikwesha komayoo.”
13 Opo nee Jesus okwa tya komukulunhu wetangakwaita: “Inda keumbo loye. Molwaashi owa ulika eitavelo, osho wa popya osho tashi ningwa.” Nomupiya okwa veluka pefimbo opo tuu opo.
14 Ndele eshi Jesus e uya keumbo laPetrus, okwa hanga inamweno yaPetrus a nangala e kwetiwe koshidu.
15 Okwa kwata eke laye, ndele ta veluka, opo nee omukainhu oo okwa fikama, nokwa hovela oku mu yakula.
16 Ndele konguloshi, kuye okwa etwa ovanhu vahapu ve na eendemoni; ndele eemhepo odo okwe di ta mo nondjovo, nokwa velula aveshe ovo va li tava vele,
17 opo ku wanifwe osho sha popiwa okupitila momuprofeti Jesaja, oo a ti: “Okwa kufa po omauyahame etu nokwa humbata omikifi detu.”
18 Eshi Jesus a mona ongudu yovanhu ye mu dingilila, okwa lombwela ovahongwa vaye opo va ye pamwe naye kombinga ikwao yefuta.
19 Ndele umwe womovanongo vomishangwa okwe uya kuye, ndele ta ti: “Omuhongi, ohandi ke ku shikula keshe apa to i.”
20 Jesus okwa tya kuye: “Ookavandje ove na omikwena, needila dokeulu odi na oihadi, ndele Omona womunhu ke na apa ta tenheke omutwe waye.”
21 Ndele omuhongwa umwe okwa tya kuye: “Omwene, pitike nge manga ndi ye ndi ka pake tate.”
22 Jesus okwa tya kuye: “Twikila okushikula nge, efa ovafi va pake ovafi vavo.”
23 Opo nee Jesus okwa londa mowato ndele ta i pamwe novahongwa vaye.
24 Ndele tala, oshikungulu shinene osha tukuluka mefuta, nowato oya li pokutuvikwa komakufikufi; ashike Jesus okwa li a kofa.
25 Opo nee ove uya nove mu pendula, tava ti: “Omwene, tu xupifa, otu li pokufya!”
26 Ndele okwa tya kuvo: “Omolwashike mwa tila?* Kamu na tuu eitavelo linini!” Opo nee okwa fikama nokwa hanyena omhepo nefuta, ndele oya lota filufilu.
27 Ovahongwa ova li va kumwa, ndele tava ti: “Ou omunhu a tya ngahelipi eshi omhepo nefuta tai dulika kuye?”
28 Eshi e uya kombinga imwe moshitukulwa shOvagadara, okwa shakenekwa kovalumenhu vavali va dja momaendo ve na eendemoni. Ova li ve na eenghono nova tilifa, onghee kapa li oo ta dulu okweenda pondjila oyo.
29 Ndele tala, ova ingida tava ti: “Oto kongo shike apa Omona waKalunga? Owe uya oku tu hepeka, omanga efimbo olo la ufwa inali fika?”
30 Opa li oufita woingulu ihapu, i li kokule navo, tai li.
31 Ndele eendemoni ode mu indila tadi ti: “Ngeenge oto tu te mo, tu tumina moufita woingulu.”
32 Okwa tya kudo: “Djei mo!” Opo nee oda dja mo noda ya moingulu, ndele tala, oufita aushe owa lotokela komunghulo womhunda, ndele tau wile mefuta.
33 Opo nee ovafita ova ya onhapo, eshi va fika moshilando, ova hepaulula aishe, mwa kwatelwa ehokololo li na sha novalumenhu ovo va li ve na eendemoni.
34 Ndele tala, ovanhu aveshe vomoshilando ova ka shakeneka Jesus, naashi ve mu mona, ove mu lombwela a dje mo moshitukulwa shavo.
