Numeri 15:1-41
15 Jehova okwa popya vali naMoses, a ti:
2 “Popya nOvaisrael u va lombwele kutya, ‘Ngeenge omwa i medu olo handi mu pe mu kale mo,
3 ndele tamu yandje eyambo kuJehova, la yambwa okupitila momundilo la dja meengobe, ile la dja meedi, kutya exwikiloyambo, ile eyambo lokuninga eano le likalekelwa, ile eyambo lehalo liwa, ile eyambo tali yandjwa pefimbo loivilo yeni yokomudo, opo li kale edimba liwa* kuJehova.
4 Oo ta yandje eyambo laye oku na yo okuyandja kuJehova eendjayambo doufila wa nakwa nawa, oshitimulongo shoefa,* wa lumbakanifwa mumwe noshitine sho-hin* shomaadi.
5 Ou na yo okuyamba omaviinyu e li oshikunwayambo, oshitine sho-hin, pamwe nexwikiloyambo, ile eyambo lodjona keshe yondume.
6 Ile ngeenge eyambo lodi yondume, ou na okuyandja eendjayambo doitimulongo ivali yoshiyelekifo shoefa shoufila wa nakwa nawa, wa lumbakanifwa noshititatu sho-hin shomaadi.
7 Ou na okuyandja omaviinyu e li oshikunwayambo, oshititatu sho-hin, e li edimba liwa* kuJehova.
8 “‘Ashike ngeenge oto yandje ongobe yondume i li exwikiloyambo, ile eyambo lokuninga eano le likalekelwa, ile eyambo loukumwe kuJehova,
9 ou na yo oku li yandja pamwe nongobe yondume, i li eendjayambo doitimulongo itatu yoshiyelekifo shoefa shoufila wa nakwa nawa wa lumbakanifwa netata lo-hin yomaadi.
10 Ou na yo okuyamba omaviinyu, e li oshikunwayambo, etata lo-hin e li eyambo la yambwa okupitila momundilo, li li edimba liwa* kuJehova.
11 Osho osho shi na okuningilwa ongobe yomhedi keshe, ile odi keshe yondume, ile eedjona deendume, ile oikombo.
12 Kashi na nee mbudi kutya otamu yandje omayambo oinamwenyo i fike peni, osho osho mu na okuningila keshe shimwe, she likolelela komuvalu wayo.
13 Omuisrael keshe pakudalwa osho e na okuyamba ngaho, eyambo la yambwa okupitila momundilo, li li edimba liwa* kuJehova.
14 “‘Ngeenge omunailongo oo ha di punye, ile umwe oo a kala mokati keni efimbo lile ota yandje yo eyambo la yambwa okupitila momundilo li li edimba liwa* kuJehova, oku na okuninga ngaashi tamu ningi.
15 Nye ovo mu li meongalo nosho yo ovanailongo ovo hava di punye, otamu kala mu na onghedimhango imwe. Oi na okukala onghedimhango yaalushe komapupi eni aeshe. Ovanailongo ove na okukala ngaashi nye koshipala shaJehova.
16 Ope na okukala omhango imwe netokolo limwe kunye nokovanailongo ovo hava di punye.’”
17 Jehova okwa twikila okupopya naMoses, ta ti:
18 “Popya nOvaisrael u va lombwele kutya, ‘Ngeenge omwa i medu omo handi mu twala,
19 ndele tamu li umwe womomungome* womedu olo, omu na okuyandja omayambidido kuJehova.
20 Omu na okuyandja omayambidido omingome, di li ongonga di na ombululu pokati, da ningwa moufila inau nakwa woilya, oyo ya pya tete. Omu na oku di yandja ngaashi omayambidido oposhipale haa yandjwa.
21 Omu na alushe okukala hamu yandje omayambidido kuJehova okudja moufila inau nakwa nawa woilya, oyo ya pya tete fiyo okomapupi eni aeshe.
22 “‘Ngeenge omwa ningi epuko nomwa dopa okudulika koipango aishe, oyo Jehova a lombwela Moses,
23 koinima aishe, oyo Jehova e mu lombwela okupitila muMoses, okudja kefiku olo Jehova a yandja oipango fiyo okomapupi eni,
24 nongeenge osha li sha ningwa papuko nopehe na eshiivo lOvaisrael, Ovaisrael aveshe ove na okuyamba ondumetana imwe i li exwikiloyambo ledimba liwa* kuJehova, pamwe neendjayambo dalo noshikunwayambo shalo, she likolelela kwaasho hashi ningwa nosho yo okakombo kamwe ketimbayambo.
25 Omupristeri ota ka koshola Ovaisrael aveshe, notava ka diminwa po, molwaashi osha li epuko, nova li va eta eyambo lavo, eyambo la yambelwa Jehova okupitila momundilo, nosho yo etimbayambo lavo koshipala shaJehova omolwepuko lavo.
26 Ovaisrael aveshe otava ka diminwa po nosho yo ovanailongo, ovo ve li mokati kavo, molwaashi ovanhu aveshe ova li va ninga epuko.
27 “‘Ngeenge omunhu* okwa nyono papuko, oku na okuyamba okakombo kokandema komudo umwe ketimbayambo.
28 Omupristeri ota ka koshola omunhu,* oo a ninga epuko, eshi a nyona koshipala shaJehova shihe fi oshiningilewina, onghee ota ka kosholwa note ke li diminwa po.
29 Ovaisrael pakudalwa nosho yo ovanailongo ovo hava di mokati kavo, ove na okukala ve na omhango imwe, ngeenge tashi uya pokuninga oshinima shihe fi oshiningilewina.
30 “‘Ashike omunhu* oo ta ningile oshinima owina, kutya nee Omuisrael pakudalwa, ile omunailongo, ota sheke Jehova noku na okudimwa* mo moshiwana shavo.
31 Molwaashi okwa tonda ondjovo yaJehova nokwa nyona oshipango shaye, omunhu* oo oku na okudimwa po filufilu. Ota handukilwa omolwenyono laye.’”
32 Eshi Ovaisrael va li mombuwa, ova li va hanga omulumenhu umwe ta tyava oikuni mefiku lEshabata.
33 Ovo va li va hanga ta tyava oikuni ove mu twala kuMoses naAron nokOvaisrael aveshe.
34 Ove mu tulifa modolongo, molwaashi kakwa li kwa popiwa kondadalunde osho e na okuningilwa.
35 Jehova okwa tya kuMoses: “Omulumenhu oo oku na okudipawa filufilu, nOvaisrael aveshe ove na oku mu denga nomamanya kondje yonhanda.”
36 Ovaisrael aveshe ove mu twala kondje yonhanda, ndele tave mu denge nomamanya fiyo a fya, ngaashi ashike Jehova a li a lombwela Moses.
37 Jehova okwa twikila okupopya naMoses, ta ti:
38 “Popya nOvaisrael u va lombwele kutya, ove na okuningila komingenge doikutu yavo eenyemba fiyo okomapupi avo aeshe, nove na okutula ko ongodi imbulau i li pombada yeenyemba odo di li komingenge doikutu.
39 ‘Omu na okukala mu na eenyemba edi nongodi imbulau, opo ngeenge mwe di mono mu dimbuluke oipango aishe yaJehova nokudulika kuyo. Inamu shikula omitima deni nomesho eni, oyo tai mu ningifa mu haele pamhepo.
40 Osho otashi ke mu kwafela mu dimbuluke oipango yange aishe nomu dulike kuyo, nokukala ovayapuki kuKalunga keni.
41 Aame Jehova, Kalunga keni, oo e mu pitifa mo medu laEgipiti, opo ndi ulike kutya aame Kalunga keni. Aame Jehova, Kalunga keni.’”
Eshangelo lopedu
^ Ile “tali udifa nawa, tali tulumukifa.” Eln., “tali fuwifa.”
^ Oshitimulongo shoefa imwe oshi fike peelita 2,2. Tala Oshiwedelwako B14.
^ O-hin imwe oi fike peelita 3,67. Tala Oshiwedelwako B14.
^ Ile “tali udifa nawa, tali tulumukifa.” Eln., “tali fuwifa.”
^ Ile “tali udifa nawa, tali tulumukifa.” Eln., “tali fuwifa.”
^ Ile “tali udifa nawa, tali tulumukifa.” Eln., “tali fuwifa.”
^ Ile “tali udifa nawa, tali tulumukifa.” Eln., “tali fuwifa.”
^ Ile “oikulya.”
^ Ile “tali udifa nawa, tali tulumukifa.” Eln., “tali fuwifa.”
^ Ile “omwenyo.”
^ Ile “omwenyo.”
^ Ile “omwenyo.”
^ Ile “okudipawa.”
^ Ile “omwenyo.”
