Numeri 24:1-25
24 Eshi Bileam a mona kutya osha li sha hafifa* Jehova okunangeka noupuna Israel, ina ya vali a ka konge oo ha tale momukonda, ndele okwa taalelifa oshipala shaye kombuwa.
2 Eshi Bileam a yelula omesho aye nokwa mona Ovaisrael va onga onhanda pamapata avo, omhepo yaKalunga oya li ya ya muye.
3 Opo nee okwa popya omupopyo wopaitevo, a ti:
“Eendjovo daBileam, omonamati waBeor,Neendjovo domulumenhu, oo omesho aye a pashulwa,
4 Eendjovo daao a uda ondjovo yaKalunga,Oo a mona emoniko lOmunaenghono adishe,Oo e linyongamena omesho aye a pashuka:
5 Akutu Jakob, omatwali oye inaa wapala tuu,Akutu Israel, eenhele doye dokukala!
6 Ngaashi omalufilu oda tamunuka mo fiyo okokule,Ngaashi oikunino i li pomulonga,Ngaashi omandobo oo Jehova a twika,Ngaashi omisederi di li pomeva.
7 Omeva otaa kala taa xunga moikwatelwa yoye ivali ya longwa moipa,Nombuto* yaye oya kunwa pomeva mahapu
Ohamba yaye otai ka kala yo inene i dule AgagNouhamba waye otau ka tumbalekwa.
8 Kalunga ote ke mu kufa mo muEgipiti;Okwa fa eembinga domhedi yomoixwa kuvo.
Ota ka hanauna po oiwana, ovahepeki vaye,Nomakipa avo ote ke a kokota po, note ke va xulifa po noikuti yaye.
9 Okwa nangela, ta hondjaunine ngaashi onghoshi,Nongaashi onghoshi, olyelye te ke mu pendula?
Ovo tave ku nangeke noupuna, ova nangekwa noupuna,Naavo tave ku fingi, ova fingwa.”
10 Opo nee Balak okwa handukila unene Bileam. Balak okwa pandula nomake aye a handuka, ndele ta ti kuBileam: “Onda li nde ku ifana u finge ovatondi vange, ashike paife ku na eshi wa ninga po, ndele owe va nangeka noupuna oikando aishe itatu.
11 Paife inda keumbo meendelelo. Onda li nda hala oku ku tumbalekifa unene, ndele tala, Jehova okwe ku imba etumbalo.”
12 Bileam okwa nyamukula Balak, a ti: “Hano inandi lombwela ovatumwa voye ava wa tumine kutya,
13 ‘Nonande ngeno Balak oku pe nge eumbo laye li yadi oshisilveri noshingoli, itandi ningi sha kehalo* lange mwene shi li omhinge nelombwelo laJehova, kutya nee oshiwa, ile oshii, nonokutya ohandi ka popya ashike osho Jehova ta lombwele nge’?
14 Paife ohandi shuna kovanhu vange. Ila ndi ku lombwele osho ovanhu ava tava ka ningila ovanhu voye monakwiiwa.”*
15 Opo nee okwa popya omupopyo wopaitevo, a ti:
“Eendjovo daBileam, omonamati waBeor,Neendjovo domulumenhu oo omesho aye a pashulwa,
16 Eendjovo daao a uda ondjovo yaKalunga,Naao e na eshiivo lOmukombadambada,Okwa mona emoniko lOmunaenghono adisheOfimbo e linyongamena pedu omesho aye a pashuka:
17 Ohandi ke mu mona, ndele hapaife;Ohandi ke mu tala, ndele hadiva.
Onyofi otai ka dja muJakob,Nodibopangelo otai ka dja muIsrael.
Ota ka teyaula po filufilu ombaba yoshipala shaMoab*Nekolotwe loludalo alishe likolokoshi.
18 Edom otashi ka ninga emona,Seir, emona lovatondi vaye,Ofimbo Israel ta ka ulika ouladi waye.
19 MuJakob otamu ka dja omufindani,Nota ka hanauna po keshe oo a xupa moshilando.”
20 Eshi a mona Amalek, okwa twikila nomupopyo waye wopaitevo, ta ti:
“Amalek osho sha li shotete moiwana,Ndele pexulilo otashi ka hanauka po.”
21 Eshi a mona Ovakeni, okwa twikila nomupopyo waye wopaitevo, ta ti:
“Olukalwa loye ola amenwa, nonhele yoye oya tungilwa kemanya.
22 Ashike umwe ota ka xwika po Kain.
Otashi kwata efimbo li fike peni ofimbo Asiria ine ku twala moukwatwa?”
23 Okwa twikila nomupopyo waye wopaitevo, ta ti:
“Woo! Olyelye ta ka xupa, eshi Kalunga ta ka ninga ngaha?
24 Eeskepa otadi ka dja komunghulofuta waKittim,Notava ka fininika Asiria,Notava ka fininika Eber.
Ashike naye ota ka hanaunwa po filufilu.”
25 Opo nee Bileam okwa fikama, ndele ta i nokwa shuna konhele yaye. Balak naye okwa ya nondjila yaye.
Eshangelo lopedu
^ Eln., “osha li shiwa momesho.”
^ Ile “Noludalo.”
^ Eln., “okudja komutima wange.”
^ Ile “pexulilo lomafiku.”
^ Ile “omutwe waMoab.”
