Numeri 3:1-51
3 Ou omusholondodo woludalo* laAron naMoses pefimbo opo Jehova a li a popya naMoses komhunda yaSinai.
2 Omadina ovanamati vaAron oo aa: oshiveli oNadab, Abihu, Eliaser naItamar.
3 Oo omadina ovapristeri, ovanamati vaAron, ovo va vaekwa nova nangekwa po* va longe ve li ovapristeri.
4 Nadab naAbihu ova fila koshipala shaJehova, eshi va yambela Jehova omundilo inau pitikwa mombuwa yaSinai, nokava li ve na ovanamati nandenande. Ndele Eliaser naItamar ova twikila okulonga ve li ovapristeri pamwe naxe Aron.
5 Jehova okwa lombwela Moses, a ti:
6 “Eta epata laLevi komesho, ndele to li fikameke koshipala shomupristeri Aron, notave ke mu kwafela.
7 Ove na okuwanifa po oinakuwanifwa yavo moku mu yakula nosho yo ongudu aishe yOvaisrael komesho yetwali lokwoongalela mokuwanifa po oilonga yavo i na sha netwalihangano.
8 Ove na okufila oshisho oilongifo aishe yometwali lokwoongalela, nokuwanifa po oinakuwanifwa yavo oyo tava longo ponhele yOvaisrael, mokufila oshisho oilonga i na sha netwalihangano.
9 Ou na okuyandja Ovalevi kuAron nokovanamati vaye. Ova yandjwa va ninge vaKalunga, ve mu pewa okudja mOvaisrael.
10 Ou na okunangeka po Aron novanamati vaye, nove na okuwanifa po oinakuwanifwa yavo youpristeri, nomunhu keshe oo ina pitikwa,* oo ta ehene popepi, oku na okudipawa.”
11 Jehova okwa twikila okupopya naMoses, ta ti:
12 “Tala, ame ohandi kufa Ovalevi mokati kOvaisrael ponhele yoiveli aishe* yOvaisrael, nOvalevi otava ningi vange.
13 Oshiveli keshe oshange. Mefiku olo nda dipaa oiveli aishe yomuEgipiti, onde liyapulila oiveli aishe yomuIsrael, okudja komunhu fiyo okoshinamwenyo. Yo otai ningi yange. Aame Jehova.”
14 Jehova okwa popya vali naMoses mombuwa yaSinai, a ti:
15 “Shanga ovanamati vaLevi pamaukwaneumbo omapata avo nopamaludi avo. Ou na okushanga omulumenhu keshe e na omwedi umwe okuyuka pombada.”
16 Onghee Moses okwe va shanga palombwelo laJehova, ngaashi naanaa e mu lombwela.
17 Omadina ovanamati vaLevi oo aa: Gerson, Kohat naMerari.
18 Omadina ovanamati vaGerson pamaludi avo oo aa: Libni naSimei.
19 Ovanamati vaKohat pamaludi avo ovo: Amram, Ishar, Hebron naUsiel.
20 Ovanamati vaMerari pamaludi avo ovo: Mahli naMushi.
Oo omaludi Ovalevi pamaukwaneumbo omapata avo.
21 MuGerson omwa dja epata lOvalibni nepata lOvasimei. Oo omapata Ovagerson.
22 Omuvalu wovalumenhu vavo aveshe, ovo ve na omwedi umwe okuyuka pombada, ovo va shangwa, owa li 7 500.
23 Omapata Ovagerson oku na okwoonga onhanda konima yetwalihangano, kombinga yokouninginino.
24 Elenga lomaukwaneumbo omapata Ovagerson oEliasaf, omonamati waLael.
25 Oinakuwanifwa yovanamati vaGerson metwali lokwoongalela oyo okufila oshisho etwalihangano, elapi, ofaila yalo yoku li uvika, oshiidilifoyata* shoposhivelo shetwali lokwoongalela,
26 omalapi oshihale, oo a endjelela, oshiidilifoyata* shoposhivelo shoshihale, osho sha dingilila etwalihangano, nosho yo oaltari, eengodi dalo noilonga aishe yamo.
27 MuKohat omwa dja epata lOvaamram, epata lOvaishar, epata lOvahebron, nepata lOvausiel. Oo omapata Ovakohat.
28 Omuvalu wovalumenhu aveshe, ovo ve na omwedi okuyuka pombada, owa li 8 600; oshinakuwanifwa shavo okufila oshisho onhele iyapuki.
29 Omapata ovanamati vaKohat oku na okwoonga onhanda kombinga yokolukadi letwalihangano.
30 Elenga lomapata Ovakohat oElisafan, omonamati waUsiel.
31 Oshinakuwanifwa shavo okupashukila Oshikefa, oshitaafula, oshikwatelwalamba, eealtari, oilongifo oyo hai longifwa okuyakula monhele iyapuki, oshiidilifoyata* nokupashukila oilonga aishe yamo.
32 Elenga ekulunhu lOvalevi oEliaser, omonamati womupristeri Aron, oo ta pashukile ovo tava wanifa po oinakuwanifwa yomonhele iyapuki.
33 MuMerari omwa dja epata lOvamahli nepata lOvamushi. Oo omapata Ovamerari.
34 Omuvalu wovalumenhu aveshe, ovo ve na omwedi okuyuka pombada, ovo va shangwa, owa li 6 200.
35 Elenga lomaukwaneumbo omapata aMerari oSuriel, omonamati waAbihail. Ova li va onga onhanda kolundume letwalihangano.
36 Ovanamati vaMerari ove na oshinakuwanifwa shokupashukila eelama detwalihangano, eenghambo dalo, eengudi dalo, oikwatelwamhadi yalo, oilongifo yalo aishe, noilonga aishe yamo
37 nosho yo eengudi adishe odo da dingilila oshihale ashishe noikwatelwamhadi yado, outenda vasho neengodi dasho.
38 Ovo tava ongo onhanda komesho yetwalihangano, kombinga yokoushilo, komesho yetwali lokwoongalela, oko haku piti etango, oMoses, Aron novanamati vaye. Ove na oshinakuwanifwa shokupashukila onhele iyapuki, shi li oshiteelelwa shavo ponhele yOvaisrael. Omunhu keshe oo ina pitikwa* ta ehene popepi, oku na okudipawa.
39 Ovalumenhu aveshe Ovalevi, ovo ve na omwedi umwe okuyuka pombada, ovo Moses naAron va shanga pamaludi avo palombwelo laJehova ova li 22 000.
40 Opo nee Jehova okwa lombwela Moses, ta ti: “Shanga ovalumenhu aveshe Ovaisrael, oiveli, ovo ve na omwedi okuyuka pombada, va valula, ndele to shange omusholondodo womadina avo.
41 Ou na okulikalekelela nge Ovalevi ponhele yoiveli aishe yOvaisrael, aame Jehova, nou na okukufa oinamwenyo yopovanhu yOvalevi ponhele yoinamwenyo yopovanhu aishe oyo ya dalwa tete yOvaisrael.”
42 Moses okwa shanga oiveli aishe oyo i li mokati kOvaisrael, ngaashi naanaa Jehova e mu lombwela.
43 Omuvalu wovalumenhu aveshe voiveli, ovo va shangwa komadina ve na omwedi okuyuka pombada, owa li 22 273.
44 Jehova okwa twikila okupopya naMoses, ta ti:
45 “Kufa Ovalevi ponhele yoiveli aishe oyo i li mokati kOvaisrael, ndele to kufa oinamwenyo yopovanhu yOvalevi ponhele yoinamwenyo yopovanhu yOvaisrael, nOvalevi ove na okuninga vange. Aame Jehova.
46 Shi na sha noiveli yOvaisrael 273, oyo inai dula okupingenwa po nOvalevi, ou na oku i futila oikulila,
47 to i yandjele eesekeli* nhano momunhu keshe, she likolelela kosekeli yomonhele iyapuki.* Osekeli imwe oi fike peegera* 20.
48 Oimaliwa yoikulila yaavo inava dula okupingenwa po ou na oku i yandja kuAron nokovanamati vaye.”
49 Onghee hano, Moses okwa ongela oimaliwa yoikulila yokukulila ovo inava dula okupingenwa po nOvalevi.
50 Okwa kufa oimaliwa koiveli yOvaisrael, eesekeli 1 365, she likolelela kosekeli* yomonhele iyapuki.
51 Opo nee Moses okwa yandja oimaliwa yoikulila kuAron nokovanamati vaye she likolelela kondjovo* yaJehova, ngaashi naanaa Jehova a li a lombwela Moses.
Eshangelo lopedu
^ Eln., “womapupi.”
^ Eln., “ovo omake avo a yadifwa.”
^ Eln., “omunailongo keshe,” sha hala okutya, omunhu oo ehe fi womeumbo laAron.
^ Eln., “keshe osho sha yeulula oshidalelo tete.”
^ Ile “elapi.”
^ Ile “elapi.”
^ Ile “elapi.”
^ Eln., “Omunailongo keshe,” sha hala okutya, omunhu oo ehe fi Omulevi.
^ Osekeli imwe oi fike peegrama 11,4. Tala Oshiwedelwako B14.
^ Ile “yosekeli iyapuki.”
^ Ogera imwe oi fike peegrama 0,57. Tala Oshiwedelwako B14.
^ Ile “koshiyelekifo osho sha li tashi longifwa pefimbo opo.”
^ Eln., “kokanya.”
