Numeri 30:1-16
30 Moses okwa lombwela omitwe domapata Ovaisrael, a ti: “Ondjovo ei oyo Jehova a popya:
2 Ngeenge omulumenhu okwa udanekele sha Jehova, ile okwa ane sha kuye mwene eano lelidiliko, ke na okutauluka ondjovo yaye. Oku na okuninga keshe shimwe osho a ana kutya ote shi ningi.
3 “Ngeenge omukainhu okwa udanekele sha Jehova, ile okwa ane sha kuye mwene eano lelidiliko, ofimbo munini noha di meumbo laxe,
4 na xe ta udu eudaneko laye, ile eano lelidiliko laye, olo e liningila ye mwene,* ndele xe ina popya ko sha, eudaneko laye keshe oku na oku li wanifa po, nakeshe eano lelidiliko, olo e liningila ye mwene, oku na oku li wanifa po.
5 Ashike ngeenge xe okwe mu kelele, eshi a uda kutya okwe liningila ye mwene eudaneko, ile e lianena eano lelidiliko, kae na okuwanifwa po. Jehova ote ke mu dimina po, molwaashi xe okwe mu kelela.
6 “Ndele ngeenge okwa hombolwa, eshi a ninga eudaneko, ile eano losheendelela, olo e liningila ye mwene,
7 nomushamane te li udu, ndele ina popya ko sha, eudaneko laye keshe, ile eano laye keshe lelidiliko, olo e liningila ye mwene, oku na oku li wanifa po.
8 Ndele ngeenge omushamane okwe mu kelele mefiku olo e li uda, ota dulu okuxulifa po eudaneko, ile eano losheendelela, olo omukulukadi e liningila ye mwene, na Jehova ote ke mu dimina po.
9 “Ndele ngeenge omufiyekadi, ile omukulukadi oo a hengwa okwa ningi eudaneko, keshe shimwe osho e lianena ye mwene oku na oku shi wanifa po ye mwene.
10 “Ashike ngeenge omukainhu okwe liningile ye mwene eudaneko, ile eano lelidiliko ofimbo e li meumbo lomushamane waye,
11 ndele omushamane waye te li udu, ashike ina popya ko sha, ile ke li omhinge nalo, eudaneko laye keshe, ile eano keshe lelidiliko, olo e liningila ye mwene, oku na oku li wanifa po.
12 Ashike omushamane waye ngeenge okwa xulifa po filufilu eudaneko keshe, ile eano lelidiliko, olo omukulukadi a ana, mefiku olo e li uda, ite ke li wanifa po. Omushamane waye okwe li xulifa po, na Jehova ote ke mu dimina po.
13 Shi na sha neudaneko keshe, ile eano keshe li na sha nokulidilika,* omushamane waye ota dulu oku li koleka, ile oku li xulifa po.
14 Ndele ngeenge omushamane iha popi ko sha nandenande efiku keshe, naye yo ota koleke eudaneko keshe lomukulukadi, ile eano laye keshe lelidiliko olo e na okuwanifa po. Okwe a koleka, molwaashi ina popya ko sha mefiku olo a uda omukulukadi te a ningi.
15 Ashike ngeenge okwe a xulifa po lwanima, konima yefiku olo e a uda, omushamane ota ka hangwa koilanduliko yenyono lomukulukadi waye.
16 “Aa omaufomhango, oo Jehova a lombwela Moses, e na sha nomushamane nomukulukadi waye nosho yo e na sha naxe nomonakadona munini oo ha di meumbo laye.”
