Oilonga yOvayapostoli 1:1-26
1 Membo lange lotete olo nde ku shangela Teofilus, onde ku lombwela kombinga yoinima aishe oyo Jesus a ninga nokwa honga
2 fiyo efiku olo a kufwa po, konima eshi a yandja omalombwelo okupitila momhepo iyapuki kovayapostoli ovo a hoolola.
3 Konima eshi a hepekwa fiyo omefyo, okwe ve lihololela luhapu opo va tomhwe filufilu kutya oku na omwenyo. Ove mu mona momukokomoko womafiku 40, nokwa kala ta popi kombinga yOuhamba waKalunga.
4 Eshi a li a ongala pamwe navo, okwe va lombwela ta ti: “Inamu dja mo muJerusalem, ndele kaleni mwa teelela osho nde mu lombwela, osho Tate e mu udanekela.
5 Ndele Johannes okwa ninginifa momeva, ashike nye mafiku otamu ka ninginifwa nomhepo iyapuki.”
6 Fimbo va li va ongala, ova pula Jesus tava ti: “Omwene, ouhamba waIsrael oto u tungulula tuu pefimbo eli?”
7 Okwa tya kuvo: “Tate womeulu oye aeke e na oufemba wokuufa* kutya efimbo peni oinima tai ka ningwa, ndele nye efimbo olo inamu pumbwa oku li shiiva.
8 Ndele otamu ka pewa eenghono ngeenge omwa tililwa omhepo iyapuki, opo nee otamu ka yandja oundombwedi kombinga yange muJerusalem, muJudea nomuSamaria ashishe nosho yo kombada yedu alishe.”
9 Konima eshi a popya ngaho, fimbo va li tave mu tale, okwa yelulwa po nokwa uvikwa koshilemo moipafi yavo.
10 Fimbo va li va tala keulu eshi Jesus ta i, ohaluka puvo ope uya ovalumenhu vavali va djala oikutu itoka,
11 ndele tava ti kuvo: “Ovalumenhu nye Ovagalilea, omolwashike mwa fikama tamu tale keulu? Jesus ou a kufwa po punye a ya meulu, ota ka aluka naanaa ngaashi mwe mu mona eshi ta i meulu.”
12 Opo nee ova shuna kuJerusalem okudja kOmhunda yEemono, opo pe na oshinano shokilometa.*
13 Eshi va fika, ova ya monduda yopombada omo va li hava kala. Monduda oyo omwa li Petrus, Johannes, Jakob, Andreas, Filippus, Tomas, Bartolomeus, Mateus, Jakob omonamati waAlfeus, Simon omuladi naJudas omonamati waJakob.
14 Aveshe ovo ova kala tava ilikana ve na ediladilo limwe, pamwe novakainhu vamwe nosho yo Maria ina yaJesus novamwainamati vaJesus.
15 Ndele efiku limwe fimbo ovanhu 120 lwaapo va li va ongala, Petrus okwa fikama mokati kavo nokwa tya kuvo:
16 “Ovamwatate, eendjovo odo David a li a popya a nwefwa mo komhepo iyapuki oda li di na okuwanifwa. Okwa popya kombinga yaJudas oo a li a kwatela komesho ovakwaita ovo va kwata po Jesus.
17 Okwa li umwe womufye, ha longo pamwe nafye moshilonga eshi.
18 (Omulumenhu oo okwa li a landa epya nondjabi oyo a li a pewa omolwoilonga yaye ihe li pauyuki; okwe lidenga po a fikila po omutwe ndele ta topa pokati, nomandjadja aye okwa wa mo.
19 Osho osha shiivika kOvajerusalem aveshe, nepya olo ove li luka melaka lavo Akeldama, sha hala okutya, “Epya lOhonde.”)
20 Embo lOmapsalme ola ti, ‘Onhele yaye otai ningi eputu, itamu ka kala nande omunhu,’ ‘noshinakuwanifwa shaye shoupashukili otashi pewa umwe e lili.’
21 Onghee otwa pumbwa okuhoolola umwe womovalumenhu ovo va kala pamwe nafye efimbo alishe olo Omwene Jesus a kala ta longo oilonga yaye mokati ketu,
22 okudja eshi a ninginifwa kuJohannes fiyo efiku olo a ya meulu; omulumenhu oo na kale yo e na oumbangi kutya Jesus okwa nyumuka.”
23 Opo nee ova popila ovalumenhu vavali, Matias nosho yo Josef oo ha ifanwa Barsabas noha ifanwa vali Justus.
24 Ndele ova ilikana tava ti: “Jehova, oove u shii omitima dovanhu aveshe, tu ulikila kutya elipipo wa hoolola povalumenhu ava vavali
25 opo a ninge omuyapostoli noku longe oshilonga osho Judas a efa po ndele ta i neendjila daye.”
26 Opo nee ova ninga oshihoololifo pokati kovalumenhu ovo, nova hoolola Matias, nokwa li a valulilwa* pamwe novayapostoli 11.
Eshangelo lopedu
^ Ile “eenghonopangelo dokuufa.”
^ Eln., “oshinano osho hashi endwa mefiku lEshabata.”
^ Sha hala okutya, okwa li a talika ko ngaashi vakwao 11.
