Oilonga yOvayapostoli 24:1-27
24 Konima yomafiku atano, omupristeri munene Ananias novakulunhu vamwe voshiwana nosho yo hahende wedina Tertullus ove uya okulombwela ngoloneya Feliks osho tava hokololifa Paulus.
2 Eshi Tertullus a pewa omhito a popye, okwa hovela okuhokololifa Paulus koshipala shangoloneya ta ti:
“Feliks, ohatu ku pandula eshi tu na ombili naashi oshiwana tashi xumu komesho molwaashi oho pangele nawa.
3 Ohatu pandula alushe neenghono omufimanekwa Feliks omolwoinima aishe oyo ho longo keshe pamwe.
4 Ndele opo ndiha mane po efimbo loye, ohandi ku indile u tu pwilikine pauxupi nelididimiko.
5 Otwa hala oku ku shiivifila kutya omulumenhu ou okwa nyika oshiponga* molwaashi ota xwaxwameke Ovajuda aveshe va twe ondubo nepangelo nota kwatele komesho oshimhanga shOvanasaret.
6 Otwe mu kwata po molwaashi okwa li yo ta kendabala okunyateka otembeli.
7 ——
8 Ngeenge owe mu pula, oto ka mona kutya oinima aishe oyo hatu popi kombinga yaye oyoshili.”
9 Opo nee Ovajuda navo ova yambidida eendjovo odo, tava koleke kutya oinima oyo oyoshili.
10 Eshi ngoloneya a udikila Paulus nomutwe a popye, Paulus okwa ti:
“Ondi shi shii kutya owa kala omutokoli woshiwana eshi oule womido dihapu, onghee ohandi lipopile ndi na omukumo.
11 Oto dulu okupula u shilipaleke ngeenge eshi handi popi oshoshili; opa pita ashike omafiku 12 okudja eshi nda ile kuJerusalem ndi ka longele Kalunga.
12 Ndele inava hanga nge handi tanguna nomunhu motembeli ile handi xwaxwameke ovanhu va twe ondubo nepangelo, kutya nee omoinagoga ile omoshilando ashishe.
13 Onghee kave na oumbangi woinima oyo tava hokololifa nge.
14 Ndele ohandi ku lombwele oshili kutya ame ohandi longele Kalunga kootatekulululwa monghedi oyo tava ti oshimhanga, nonda itavela oinima aishe oyo ya popiwa mOmhango nokOvaprofeti.
15 Ondi na eteelelo olo yo navo ve na kutya Kalunga ota ka nyumuna ovayuki novalunde.
16 Onghee ohandi kendabala alushe okukala ndi na eliudo la yela* koshipala shaKalunga noshovanhu.
17 Ndele konima yomido donhumba, onda twalele oikwafa kuJerusalem noku ka yamba omayambo.
18 Fimbo nda li oko, ova hanga nge motembeli handi liyelifa metwokumwe nOmhango, ndele kapa li ongudu yovanhu ile omapiyaano. Ashike ope na Ovajuda vamwe va dja kuAsia
19 ovo va li ve na ngeno okuuya kwoove va hokololife nge, ngeno ova monene nge epuko.
20 Ovalumenhu ava ve li apa nava popye kutya ova mona nge epuko lashike eshi nda li mOmhangu yoPombada yOvajuda,
21 shapo osheshi nda ingida mokati kavo kutya: ‘Ohandi pangulwa molwaashi nda itavela menyumuko!’”
22 Ndele molwaashi Feliks oku shii oinima ya pamba Ondjila yOmwene, okwe va lekela ta ti: “Ohandi ka ungaunga ashike noinima oyo ngeenge Lisias, omukulunhu wetangakwaita, e uya.”
23 Opo nee okwa lombwela omunambelewa wetangakwaita kutya Paulus na kale modolongo, ashike na pewe emanguluko lonhumba opo ookaume kaye va kale have uya oku mu kwafela.
24 Konima yomafiku onhumba, Feliks okwe uya nomukulukadi waye Drusila, oo a li Omujuda, ndele ta ifana Paulus opo va pwilikine kombinga yeitavelo laye muKristus Jesus.
25 Eshi Paulus a popya kombinga youyuki, elipangelo nosho yo etokolo olo tali ke uya, Feliks okwa li a tila ndele ta ti: “Inda manga; ohandi ke ku ifana vali ngeenge nda mono omhito.”
26 Feliks okwa li yo ta diladila kutya Paulus ote mu pe ombubo. Onghee okwa kala he mu ifana lwoikando nokukundafana naye.
27 Eshi pa pita omido mbali, Feliks okwa pingenwa po kuPorkius Festus; ndele molwaashi Feliks okwa li a hala okukala a hokiwa kOvajuda, okwa fiya Paulus modolongo.
