Omapsalme 106:1-48
106 Tangeni Jah!*
Panduleni Jehova, osheshi ye omuwa;Ohole yaye i na oudiinini otai kala po fiyo alushe.
2 Olyelye ta dulu okushiivifa pauyadi oinenelonga yaJehova,Ile okushiivifa oilonga yaye aishe ya tumbala?
3 Ovo hava longo pauyuki otava kala va hafa,Ovo hava longo alushe osho sha yuka.
4 Omwene Jehova, dimbuluke nge, eshi to file onghenda* ovanhu voye.
File nge oshisho okupitila moilonga yoye yexupifo,
5 Opo ndi hafele ouwa oo wa ulikila ovahoololwa voye,Opo ndi nyakukilwe pamwe noshiwana shoye,Opo ndi ku tange* ndi udite etumba pamwe nefyuululo loye.
6 Otwa nyona, ngaashi ashike ootatekulululwa va ninga;Otwa ninga osho sha puka; otwa longa owii.
7 Ootatekulululwa muEgipiti inava pandula* oilonga yoye ikumwifi.
Inava dimbuluka ohole yoye i na oudiinini inenenene,Ndele ova tukula oshibofa pefuta, pEfuta Litilyana.
8 Ashike okwe va xupifa omolwedina laye,Opo a shiivife eenghono daye dinene.
9 Okwa hanyena Efuta Litilyana, ndele tali pwiinine;Okwe va pitifa koshi elela yalo, va fa tava ende mombuwa;
10 Okwe va xupifa meke lomutondi wavo,Nokwe va amena komutondi.
11 Omeva okwa uvika ovatondi vavo;Nokape na nande oumwe womuvo a xupa po.*
12 Opo nee ova hovela okukala ve na eitavelo meudaneko laye;Ova hovela okwiimba tave mu tange.
13 Ashike ova dimbwa diva osho a ninga;Inava teelela e va pe omayele aye.
14 Ove liyandja komahalo avo okuliholamwene, eshi va li momaluhaela;Ova yeleka Kalunga mombuwa.
15 Okwe va pa osho va pula,Ashike okwe va denga nomukifi, oo we va ningifa* va xule po.
16 Ova twila ondubo Moses monhandaNosho yo Aron, omuyapuki waJehova.
17 Opo nee edu ola makuka,* ndele tali pona po Datan,Nola uvika ovo va li va ongala naAbiram.
18 Omundilo owa xwama mokati kongudu yavo;Omalaka omundilo okwa lungwinifa po ovakolokoshi.
19 Ova ninga onhana muHoreb,Nokulinyongamena oshihongwafano shoshivela;*
20 Ova pingakanifa efimano langeNoshihongwafano shomhedi tai li omwiidi.
21 Ova dimbwa Kalunga, Omuxupifi wavo,Oo a longa oilonga inene muEgipiti,
22 Oinenelonga medu laHam,Oilonga ikumwifi pEfuta Litilyana.
23 Okwa li e li poku va xulifa po,Ashike Moses, omuhoololwa waye, okwe va popila ko kuye,*Opo a loteke ehandu laye, olo ngeno le va hanaunifa po.
24 Opo nee ova tonda edu, olo la li la halika;Kava li ve na eitavelo meudaneko laye.
25 Ova kala tava ngongota momatwali avo;Inava pwilikina kondaka yaJehova.
26 Onghee okwa yelula eke laye ta ane shi na sha navoKutya ote ke va dipaela mombuwa;
27 Ota ka ningifa oludalo lavo li file mokati koiwana,Note ke ve lihanifila moilando aishe.
28 Opo nee ova waimina elongelokalunga* laBaal womuPeor,Nova lya omayambo a yambelwa ovafi.*
29 Eenghatu davo ode mu nyemateka,Nehandukilo ole liteyela mokati kavo.
30 Ashike eshi Pinehas a fikama nokuya mo olunyala,Ehandukilo ola lota.
31 Osho a ninga oshe mu ningifa a talike ko omuyukiKomapupi aeshe fiyo alushe.
32 Ove mu handukifa pomeva opuMeriba,*Noinima inai endela nawa Moses omolwavo.
33 Ova handukifa omhepo yaye,Ndele ta popi ta hanyauka nomilungu daye.
34 Inava hanauna po ovanhu,Ngaashi Jehova a li e va lombwela.
35 Ashike ova lumbakana noiwana,Nova tambula ko* eendjila dayo.
36 Ova kala nokulongela oihongwafano yavo,Naasho osha ninga omwiyo kuvo.
37 Ova li hava yambe ovanamati vavoNovanakadona vavo keendemoni.
38 Ova kala tava tileshi ohonde ihe na etimba,Ohonde yovanamati noyovanakadona vavo,Ovo va yambelwa oikalunga yaKaanan;Nedu ola li la nyatekwa netiko lohonde.
39 Ova kala inava koshoka omolwoilonga yavo;Ova haela pamhepo okupitila moilonga yavo.
40 Onghee Jehova okwa handukila neenghono oshiwana shaye,Nokwa hovela okutonda efyuululo laye.
41 Okwe va yandja koiwana lwoikando,Opo ovo ve va tonde va dule oku va pangela.
42 Ovatondi vavo ove va fininika,Nova li koshi yeenghonopangelo* davo.
43 Okwe va xupifa lwoikando ihapu,Ashike ova kala tava tukula oshibofa noinava kala hava dulika,Onghee okwa kala te va ninipike omolwepuko lavo.
44 Ndele oha mono oudjuu wavo,Nohe va udu, eshi tave mu lilile ekwafo.
45 Okwa kala ta dimbuluka ehangano laye omolwavo,Nohe va kenukile,* te linyengifwa kohole yaye inene* i na oudiinini.
46 Okwa kala te va ningifa va udilwe olukenoKwaaveshe ovo ve va twala moukwatwa.
47 Omwene Jehova, Kalunga ketu, tu xupifa,Noku tu ongela mo moiwana,Opo tu pandule edina loye liyapukiNotu ku tange nehafo.
48 Jehova, Kalunga kaIsrael, na tangweFiyo alushelushe.*
Novanhu aveshe nava tye, “Amen!”*
Tangeni Jah!*
Eshangelo lopedu
^ Ile “Halleluya!” “Jah” exupipiko ledina Jehova.
^ Ile “ningile ouwa.”
^ Ile “litangele.”
^ Ile “uda ko eityo.”
^ Ile “a fyaala po.”
^ Ile “eemwenyo davo.”
^ Ile “edu ola patuluka.”
^ Ile “oshihongwafano sha hemunwa.”
^ Eln., “okwa fikama pokati moipafi yaye.”
^ Ile “ove limanga kumwe.”
^ Sha hala okutya, omayambo a yambelwa, kutya nee ovafi, ile oikalunga ihe na omwenyo.
^ Tali ti “Eemhata.”
^ Ile “Nove lihonga.”
^ Eln., “yeke.”
^ Ile “livele ombedi.”
^ Ile “ihapu.”
^ Ile “Okudja nale fiyo alushe.”
^ Ile “Nashi kale ngaho.”
^ Ile “Halleluya!” “Jah” exupipiko ledina Jehova.
