Omapsalme 143:1-12
Eimbilo laDavid.
143 Omwene Jehova, uda eilikano lange;Pwilikina, eshi handi ku lilile ekwafo.
Nyamukule nge omolwoudiinini woye nouyuki woye.
2 Ino tokola omupiya woye,Osheshi kape na oo e na omwenyo ta dulu okukala omuyuki moipafi yoye.
3 Osheshi omutondi ota taataa nge;*Okwa nyanyaulila omwenyo wange pedu.
Okwa ningifa nge ndi kale handi kala momilaulu, ngaashi ovo va fya nale.
4 Omhepo* yange otai ninipala;Omutima wange owa fya meni lange.
5 Ohandi dimbuluka omafiku onale;Ohandi dilonga koilonga yoye aishe;Onda halelela okudilonga* koilonga yomake oye.
6 Onda yelulila omake ange kwoove;Onda* fa edu likukutu olo le ku fila enota. (Sela)
7 Omwene Jehova, nyamukule nge diva;Eenghono* dange odi li pokukana po.
Ino holeka nge oshipala shoye,Opo ndiha kale ngaashi ovo tava i melambo.*
8 Ongula nandi ude kombinga yohole yoye i na oudiinini,Osheshi onde lineekela mwoove.
Shiivifile nge ondjila oyo ndi na okweenda,Osheshi okwoove nda tala.*
9 Omwene Jehova, xupife nge kovatondi vange.
Ohandi kongo eameno kwoove.
10 Honge nge ndi longe ehalo loye,Osheshi oove Kalunga kange.
Omhepo yoye oiwa;Nai twale nge kedu la lalakana.*
11 Omwene Jehova, omolwedina loye, kaleke nge nomwenyo.
Omolwouyuki woye, xupife nge* moudjuu.
12 Omolwohole yoye i na oudiinini, xulifa po* ovatondi vange;Hanauna po aveshe ovo tava hepeke nge,*Osheshi ame omupiya woye.
Eshangelo lopedu
^ Ile “omwenyo wange.”
^ Ile “Eenghono.”
^ Ile “okukonakona.”
^ Ile “Omwenyo wange.”
^ Eln., “Omhepo.”
^ Ile “mombila.”
^ Ile “Osheshi kwoove oko handi yelulile omwenyo wange.”
^ Ile “medu lovayuki.”
^ Ile “omwenyo wange.”
^ Eln., “mweneka.”
^ Ile “omwenyo wange.”
