Omapsalme 18:1-50
Komuwiliki. La imbwa kuDavid, omupiya waJehova, oo a imbila Jehova eimbilo eli mefiku olo Jehova e mu xupifa meke lovatondi vaye aveshe nomeke laSaul. Okwa ti:
18 Omwene Jehova, ondi ku hole, oove eenghono dange.
2 Jehova oye oshikulundudu shange nohotengulu yange, nOye ta xupifa nge.
Kalunga kange oye emanya lange, omo handi kongo eameno,Oye oshikelelifo shange noluvinga* lange lexupifo,* ouhondameno wange wa amenwa.*
3 Ohandi kongo ekwafo kuJehova, oo a wana okutangwa,Nota ka xupifa nge kovatondi vange.
4 Eengodi defyo oda li da dingilila nge;Ngaashi omeva efundja, ouhapu wovakolokoshi owa li wa tilifa nge.
5 Eengodi dOmbila* oda li da dingilila nge;Eemwiyo defyo oda li da kondeka nge.
6 Moudjuu wange, onda ifana Jehova;Onda kala nokulilila ekwafo kuKalunga kange.
Okwa uda ondaka yange okudja motembeli yaye,Naashi nde mu lilila ekwafo, okwa* pwilikina.
7 Opo nee edu ola hovela okukakama nokulinyenganyenga;Omakanghameno eemhunda okwa dekweta,Nokwa ndjungwandjungwa, molwaashi okwa li a handukifwa.
8 Momayulu aye omwa dja omwifi,Nomokanya kaye omwa dja omundilo wa hanya;Muye omwa dja omakala a xwama omundilo.
9 Eshi a li ta londoloka, okwa lemena eulu pedu,Nokoshi yeemhadi daye okwa li omilaulu fokofoko.
10 Okwe uya ta tuka, a londa komukerubi.
Okwe uya ta endelele e li komavava omweengeli.*
11 Opo nee okwe liuvika nomilaulu,De mu dingilila onga onhele yokuyaama,Oilemo ilaula i yadi omeva.
12 Puye opa li ouyelele wa twa,Nomoilemo omwa dja eemhawe nomakala omundilo.
13 Opo nee Jehova okwa hovela okungunguma meulu;Omukombadambada okwa ningifa ondaka yaye i udikeOkupitila moshikungulu sheemhawe nosho yo momakala omundilo.
14 Okwa umba oikuti yaye, ndele te va halakanifa;Okwa shelifa okashelu kaye, nokwe va ngwangwaneka.
15 Omilonga dokoshi yedu* ode uya kombada;Nomakanghameno edu okwa hololwa kehanyeno loye, Omwene Jehova,Omolwomufudo u na eenghono, oo wa dja momayulu oye.
16 Okwa lovelela nge okudja pombada;Okwa kwata nge, nokwa nana nge mo momeva male.
17 Okwa xupifa nge kovatondi vange ovanaenghono,Kwaavo ve tonde nge, ovo va li ovanaenghono ve dule nge.
18 Ova ponokela nge mefiku loudjuu wange,Ndele Jehova okwa li ta yambidida nge.
19 Okwa twala nge konhele ya amenwa;Okwa xupifa nge, molwaashi okwa li a hokwa nge.
20 Jehova okwa pa nge ondjabi omolwouyuki wange;Okwa pa nge ondjabi omolwomake ange ehe na etimba.*
21 Osheshi onda diinina eendjila daJehova,Noinandi fiya po Kalunga, molwaashi oshi li oshinima shii.
22 Ohandi dimbuluka omatokolo aye aeshe,Noitandi ka efa eenghedimhango daye.
23 Onda tokola okukala ndihe na etimba koshipala shaye,Nohandi likelele ndiha nyone.
24 Jehova na pe nge ondjabi omolwouyuki wange,Nomolwokuhe na etimba kwomake ange koshipala shaye.
25 Kwaao e li omudiinini, oto kala omudiinini;Omunhu oo e li omuyuki, oto ungaunga naye pauyuki;
26 Kovanashili elela, oto kala omunashili,Ashike omukengeleledi oto ke mu enda medu.
27 Oto xupifa ovadinwa,*Ashike oto katukile onghatu ovalinenepeki.*
28 Osheshi, Omwene Jehova, oove ho tema olamba yange,Kalunga kange oha minikile nge, ngeenge ndi li momilaulu.
29 Kekwafo loye, ohandi dulu okulwifa ongudu yovanyeki;Ohandi dulu okulonda ekuma keenghono daKalunga.
30 Ondjila yaKalunga kashili oya wanenena;Omalombwelo aJehova okwa yela.
Oye oshikelelifo kwaaveshe ovo tava kongo eameno kuye.
31 Olyelye vali Kalunga ehe fi ashike Jehova?
Nolyelye vali emanya ehe fi Kalunga ketu?
32 Kalunga kashili oye ha dike nge eenghono,Nota ka lalakanifa omalila ange.
33 Ota ningifa eemhadi dange di kale ngaashi omakondo onyapi;Ota fikameke nge keenhele dokoikulundudu.
34 Omake ange ote a deulile olwoodi;Omaoko ange otaa dulu okulukila outa wongopolo.
35 Owa pa nge oshikelelifo shoye shexupifo,Eke loye lokolulyo ohali yambidida* nge,Nelininipiko loye ola tumbalekifa nge.
36 Owa mbwalangadjeka* ondjila yeemhadi dange,Eemhadi* dange itadi i omufenu.
37 Ohandi ka taataa ovatondi vange, noku va finda;Itandi aluka, fiyo osheshi va kombololwa po sheke.
38 Ohandi ke va nyanyaula, opo vaha dule okupenduka po;Otava ka wila koshi yeemhadi dange.
39 Oto ka pa nge eenghono domolwoodi;Oto ka kwafela nge ndi finde ovatondi vange.
40 Oto ka ningifa ovatondi vange va faduke nge po,*Nohandi ka xulifa po* ovo ve tonde nge.
41 Otava pula ekwafo, ashike kape na ou te va xupifa;Otava lilile nokuli Jehova e va kwafele, ndele ite va nyamukula.
42 Ohandi ke va twa va nyanyauka filufilu, ngaashi ondwi hai i nomhepo;Ohandi ke va umbila pondje ngaashi onhata momapandavanda.
43 Oto ka xupifa nge kwaavo tava konenene omapuko ange.
Oto ka nangeka nge po ndi ninge omuwiliki* woiwana.
Ovanhu, ovo ndihe shii, otava ka longela nge.
44 Otava ka dulika kwaame omolwehokololo longaho;Ovanailongo otava ka twila nge eengolo va tila.
45 Ovanailongo otava ka kanifa ouladi;*Otave ke uya tava kakama okudja keenhele davo deameno.
46 Jehova omunamwenyo! Emanya lange nali tangwe!
Kalunga kexupifo lange na tumbalekwe.
47 Kalunga kashili ote va handukile ponhele yange;Ovanhu ote va tula koshi yewiliko lange.
48 Oha amene nge kovatondi vange va handuka.Oho yelula nge pombada yaavo tava ponokele nge;Owa xupifa nge komunhu, oo ha longifa eenghono.
49 Nomolwaasho, Omwene Jehova, handi ku tumbalekifa mokati koiwana,Nedina loye ohandi ke li imbila omaimbilohambelelo.*
50 Oha xupifa* ohamba yaye meenghedi dikumwifi;Oha ulikile omuvaekwa waye ohole i na oudiinini,David noludalo laye fiyo alushe
Eshangelo lopedu
^ Tala Omafatululo oitya.
^ Ile “omuxupifi wange omunaenghono.”
^ Ile “eameno la shiya ko.”
^ Sha hala okutya, kOufi. Tala Omafatululo oitya.
^ Eln., “omatwi aye.”
^ Ile “e li momhepo.”
^ Ile “Omakungulukilo omeva.”
^ Eln., “e na oukoshoki.”
^ Ile “ovafininikwa.”
^ Eln., “omesho e na elinenepeko.”
^ Ile “pameke.”
^ Ile “nenepeka.”
^ Ile “eemhando.”
^ Ile “Oto ka ningifa ovatondi vange va pilamene nge.”
^ Ile “mweneka.”
^ Ile “omutwe.”
^ Ile “kana po.”
^ Ile “shikila omusika.”
^ Ile “etele efindano linene.”
