Omapsalme 19:1-14
Komuwiliki. Eimbilo laDavid.
19 Eulu* otali hepaulula oshinge shaKalunga;Ewangadjo, olo li li pombada,* otali shiivifa oilonga yomake aye.
2 Ohai kala tai popi efiku nefiku,Nohai holola eshiivo oufiku keshe.
3 Ihai popi, nokape na eendjovo;Ewi layo ihali udika.
4 Ashike ondaka* yayo oya ya kombada yedu alishe,Netumwalaka layo ola ya fiyo okominghulo dedu.*
Meulu okwa dika mo etwali letango;
5 Ola fa omuhomboli ta di monduda yaye;Ola hafa ngaashi omunhu omunaenghono ta tondoka mefiyafanepo.
6 Ohali piti komunghulo umwe weulu,Nohali dingonoka komunghulo mukwao weulu;Nokape na osho sha holekwa oupyu walo.
7 Omhango yaJehova oya wanenena, tai yandje vali eenghono.*
Omadimbulukifo aJehova oku shii okulineekelwa, taa ningifa oo ehe na owino a kale omunaendunge.
8 Omalombwelo, oo a dja kuJehova, okwa yuka, taa hafifa omutima;Oipango yaJehova oya koshoka, tai vemifa omesho.
9 Okutila Jehova okwa yuka, taku kalelele fiyo alushe.
Omatokolo aJehova oku li paushili, aeshe oku li pauyuki.
10 Omawa unene e dulife oshingoli,E dulife oshingoli elela,*Nomanyenye e dulife omaadi eenyiki, omaadi eenyiki oo taa ndoda okudja meshila.
11 Omupiya woye okwa londwelwa kuo;Ota ka mona ondjabi inene, ngeenge okwe a diinine.
12 Olyelye ta dulu okudidilika mo omapuko?
Koshole nge komanyono oo ndihe shii.
13 Nokukelela omupiya woye aha kwatwe koikala yelinenepeko;Ino efa i pangele nge.
Opo nee ohandi ka kala ndihe na etimba,Nondihe na ondjo omolwomanyono a kwata moiti.*
14 Eendjovo domokanya kange nomadilongo omomutima wangeNae ku hafife, Omwene Jehova, Emanya lange nOmukulili wange.
Eshangelo lopedu
^ Ile “Omaulu.”
^ Ile “Evalelwa.”
^ Ile “ongodi yokumeta.”
^ Ile “dedu liwa.”
^ Ile “tai yandje (tai alula) omwenyo.”
^ Ile “sha hemunwa.”
^ Ile “omolwomatauluko mahapu.”