Omapsalme 30:1-12
-
Oluhodi la lundululilwa mehafo
-
Okuhokiwa kuKalunga oshinima tashi kalelele (5)
-
Eimbilo. Eimbilo leyapulo leumbo. Epsalme laDavid.
30 Omwene Jehova, ohandi ke ku tumbaleka, osheshi owa yambula* nge po;Ino efa ovatondi vange va hafe omolwange.
2 Omwene Jehova, Kalunga kange, onde ku pula u kwafele nge, nowa velula nge.
3 Omwene Jehova, owa kufa nge mo* mOmbila.*
Owa kaleka nge nomwenyo; owa xupifa nge ndiha ningine melambo.*
4 Imbileni Jehova omaimbilohambelelo,* nye ovadiinini vaye,Panduleni edina* laye liyapuki;
5 Molwaashi okuhandukilwa kuye oshinima shopakafimbo,Ashike okukala wa hokiwa* kuye oshinima tashi kalelele.
Oluhodi otali dulu oku ku hanga konguloshi, ashike ongula, ope na ehafo linene.
6 Eshi nda li ndihe na oupyakadi, onda ti:
“Itandi tengauka nandenande.”*
7 Omwene Jehova, ofimbo nda li nda hokiwa* kwoove, owa pameka nge ngaashi omhunda.
Ashike eshi wa holeka oshipala shoye, onda li nda tila.
8 Omwene Jehova, onda kala nokwiilikana kwoove;Nonda kala handi indile kwoove, Jehova, u file nge onghenda.
9 Efyo* lange otali eta ouwa washike, eshi handi i melambo?*
Mbela ondwi otai ke ku tanga tuu? Mbela otai ka popya ngoo kombinga youdiinini woye?
10 Omwene Jehova, pwilikina nokufila nge onghenda.
Omwene Jehova, ninga omukwafi wange.
11 Oluhodi lange owe li lundululila mokudana;Owa dula nge oshako, nowa dika nge ehafo,
12 Opo ndi* dule okwiimba omaimbilohambelelo oye, nondiha kale nda mwena.
Omwene Jehova, Kalunga kange, ohandi ku tange fiyo alushe.
Eshangelo lopedu
^ Ile “kufa.”
^ Ile “omwenyo wange.”
^ Sha hala okutya, kOufi. Tala Omafatululo oitya.
^ Ile “mombila.”
^ Ile “Mu shikileni omusika.”
^ Eln., “edimbulukifo.”
^ Ile “pandika.”
^ Ile “Itandi pungauka nandenande (funga).”
^ Ile “pandika.”
^ Eln., “Ohonde.”
^ Ile “mombila.”
^ Ile “efimano lange.”
