Omapsalme 31:1-24
Komuwiliki. Eimbilo laDavid.
31 Jehova, onda konga eameno mwoove.
Inandi fifwa nande ohoni.
Xupife nge omolwouyuki woye.
2 Pakalekela okutwi kwoye* kwaame.
Ila diva u xupife nge.
Ninga ohotengulu yange yomhunda,Onhele ya dingililwa komakuma a pama, u amene nge.
3 Osheshi oove emanya lange nohotengulu yange;Omolwedina loye, oto pukulula nge nokuwilika nge.
4 Oto mangulula nge mo melulo,* olo va tela nge meholeko,Osheshi oove ouhondameno wange.
5 Omwenyo wange* ohandi u yandje meke loye.
Omwene Jehova, Kalunga koshili,* owa kulila nge.
6 Ondi tonde ovo hava longele oinima ihe na ekwafo lasha, oikalunga yongaho,Ashike ame onde lineekela muJehova.
7 Ohandi hafele unene ohole yoye i na oudiinini,Osheshi owa mona okufininikwa kwange;Ou shii oudjuu womeni lange.*
8 Ino yandja nge komutondi,Ashike owa kaleka nge ofika ponhele ya amenwa.*
9 Omwene Jehova, file nge onghenda, molwaashi ondi li moudjuu.
Oluhodi ola nghundipaleka omesho ange nosho yo olutu lange alishe.*
10 Onda wililwa po koluhodi monghalamwenyo yange,Needula dange, ekemo.
Eenghono dange otadi ninipala omolwepuko lange;Omakipa ange otaa nghundipala.
11 Onda shekwa kovakondjifi vange aveshe,Unene tuu kovashiinda shange.
Nonda tilifwa kwaavo handi kala navo;Ngeenge ova mono nge mepandavanda, ohava faduka nge po.
12 Onda kufwa ko komitima* davo, nonda dimbiwa, nda fa nda fya;Ondi li ngaashi oshiyuma sha tatuka.
13 Onda uda omitotolombo dihapu dii;Oumbada owa dingilila nge.
Ngeenge va ongala pamwe, ve limanga kumwe, va kondjife nge,Ohava pangele omhangela va dipae nge.
14 Ashike onde lineekela mwoove, Omwene Jehova.
Ohandi popi kutya: “Oove Kalunga kange.”
15 Omafiku* ange oku li meke loye.
Xupife nge meke lovatondi vange nokwaavo tava hepeke nge.
16 Oshipala shoye nashi minikile omupiya woye.
Xupife nge omolwohole yoye i na oudiinini.
17 Omwene Jehova, ino efa ndi fifwe ohoni, ngeenge handi ku ifana.
Ovakolokoshi nava fifwe ohoni;Nava mwenekwe mOmbila.*
18 Omilungu di na oipupulu nadi mwenekwe,Omilungu, odo hadi popile omuyuki mowii, di na elinenepeko nosho yo odino.
19 Ouwa woye ouhapu shi fike peni!
Owe u tuvikilila ovo have ku tila,Nowe u ulikila ovo tava kongo eameno mwoove, moipafi yovanhu aveshe.
20 Oto va amene keemhangela dovanhuMonhele ya amenwa moipafi yoye;Oto va holeke monhele yoye yokuyaamaKomaponokelo mai.*
21 Jehova na tangwe,Molwaashi okwa ulikila nge ohole i na oudiinini monghedi ikumwifi, moshilando sha kondekwa.
22 Ame onda haluka, ndele handi ti:
“Ohandi xulu po koshipala shoye.”
Ashike eshi nda konga ekwafo kwoove, nonde ku lilila, owa uda eindilo lange.
23 Kaleni mu hole Jehova, amushe ovo mu li ovadiinini kuye.
Jehova oha amene ovadiinini,Ashike oha handukile neenghono keshe oo e na elinenepeko.
24 Kaleni mu na ouladi, nomitima deni nadi kale da pama,Nye amushe ovo mwa teelela Jehova.
Eshangelo lopedu
^ Ile “Endeka, ndele to pwilikine.”
^ Ile “monete.”
^ Ile “Omhepo yange.”
^ Ile “Kalunga omudiinini.”
^ Ile “oudjuu womwenyo wange.”
^ Ile “monduda.”
^ Ile “omwenyo wange nedimo lange.”
^ Ile “momadiladilo.”
^ Eln., “Omafimbo.”
^ Sha hala okutya, kOufi. Tala Omafatululo oitya.
^ Eln., “Komalaka omatanguno.”
