Omapsalme 32:1-11
Epsalme laDavid. Maskil.*
32 Omunhu, oo a diminwa po omatauluko aye, ota kala a hafa, oo omatimba aye a tuvikwa.*
2 Omunhu, oo Jehova a tala ko ehe na etimba, ota kala a hafa,Oo ehe na omhepo youkengeleledi.
3 Eshi nda li nda mwena, omakipa ange okwa pwiinina po, omolwokukema kwange efimbo alishe.
4 Osheshi omutenya noufiku, eke loye* ola li la djuupalela nge.
Eenghono dange oda pwiinina po,* ngaashi omeva opefimbo lokwenye. (Sela)
5 Xuuninwa, onde ku hepaululila enyono lange;Inandi holeka epuko lange.
Onda ti: “Ohandi hepaululile Jehova omatauluko ange.”
Nowa dima po omatimba ange omolwepuko olo. (Sela)
6 Nomolwaashi omudiinini keshe ta ilikana kwoove,Ofimbo natango to monika.
Opo nee nokuli nefundja itali ke mu hanga.
7 Oove onhele yange yokuhondama;Oto ka amena nge koudjuu.
Oto ka dingilila nge nehafo linene omolwexupifo. (Sela)
8 “Ohandi ku pe eendunge, noku ku wilika mondjila, oyo u na okweenda nayo.
Ohandi ku pe omayele, neisho lange otali ku pashukile.
9 Ino kala uhe na eendunge, ngaashi onghambe, ile emwili,Oyo ngeenge inai deuka, hai wilikwa noshitomo, ile nongodi,Opo i dule okuuya popepi naave.”
10 Ouyehame womukolokoshi omuhapu;Ashike oo te lineekele muJehova okwa dingililwa kohole yaye i na oudiinini.
11 Ovayuki nye, hafeni omolwaJehova nokunyakukwa;Amushe ovo muvayuki momitima, hafeni unene.
Eshangelo lopedu
^ Tala Omafatululo oitya.
^ Ile “dimwa po.”
^ Ile “okuhahokiwa.”
^ Ile “Oshimhuke shomwenyo wange osha lunduluka.”
