Omapsalme 34:1-22
Epsalme laDavid, eshi a li te liningifa a fa omupwidi moipafi yaAbimelek, oo e mu taataa, ndele ta i.
א [Alef]
34 Ohandi tange Jehova alushe;Onda hala oku mu hambelela efimbo keshe.
ב [Bet]
2 Ohandi* litangele Jehova;Ovalidiiniki* otave shi udu nokunyakukwa.
ג [Gimel]
3 Fimanekeni Jehova pamwe naame;Atusheni natu tumbalekife edina laye.
ד [Dalet]
4 Onda ilikana Jehova, nokwa nyamukula nge.
Okwa xupifa nge momaudjuu ange aeshe.
ה [He]
5 Ovo tave lineekele muye otava kala va hafa,Noitava ka fifwa ohoni.
ז [Zayin]
6 Omudinwa okwa kuwa, na Jehova okwe mu uda.
Okwe mu xupifa momaudjuu aye aeshe.
ח [Het]
7 Omweengeli waJehova oha ongo onhanda a dingilila ovo have Mu tila,Nohe va xupifa.
ט [Tet]
8 Makeleni, nye mu tale kutya Jehova omuwa;Ou ta kongo eameno kuye ota kala a hafa.
י [Yod]
9 Tileni Jehova, ovayapuki nye amushe;Osheshi aveshe ovo have mu tila itava pumbwa sha.
כ [Kaf]
10 Nokuli neenghoshi deenyasha* di na eenghono otadi fi ondjala;Ashike ovo tava kongo Jehova itava pumbwa sha.
ל [Lamed]
11 Ileni, ovamwange, pwilikineni kwaame;Ohandi mu hongo okutila Jehova.
מ [Mem]
12 Olyelye womunye a hala okuhafela onghalamwenyo,Nokwa hala okumona omafiku mahapu mawa?
נ [Nun]
13 Onghee hano, lungamena elaka loye liha popye eendjovo dii,Nomilungu doye diha popye eendjovo doukengeleledi.
ס [Samek]
14 Efa po okulonga owii, ndele to longo ouwa;Panga ombili noku i kaleka po.
ע [Ayin]
15 Omesho aJehova ohaa tale ovayuki,Nomatwi aye ohaa pwilikine kuvo, eshi tave mu lilile ekwafo.
פ [Pe]
16 Ndele Jehova oha pungulula ko oshipala shaye kwaavo hava longo owii;Ote va dimi ko filufilu kombada yedu, noitava dimbulukiwa vali.
צ [Tsade]
17 Ovayuki ova kuwa, na Jehova okwe va uda;Okwe va xupifa mo momaudjuu avo aeshe.
ק [Kof]
18 Jehova oku li popepi naavo ve na omitima da teyauka;Oha xupifa ovo va teka omukumo.*
ר [Res]
19 Omaudjuu* omuyuki omahapu,Ndele Jehova ote mu xupifa mo muo aeshe.
ש [Shin]
20 Ota amene omakipa aye aeshe;Kape na nande olimwe lomuo la teka.
ת [Taw]
21 Owii otau twala omukolokoshi mefyo;Ovo ve tonde ovayuki otava ka monika ondjo.
22 Jehova ota xupifa eemwenyo dovapiya vaye;Kape na oo ta kongo eameno kuye ta ka monika ondjo.
Eshangelo lopedu
^ Ile “Omwenyo wange otau.”
^ Ile “Ovalininipiki.”
^ Ile “eenghoshi deendume eenyasha.”
^ Eln., “ve na omhepo ya teyauka.”
^ Ile “Omaupyakadi.”
