Omapsalme 37:1-40
-
Ovo tave lineekele muJehova otava ka punapala
Epsalme laDavid.
א [Alef]
37 Ino kala wa handuka* omolwovakolokoshi,Ile u twile ondubo ovalongi vowii.
2 Otava lembe diva ngaashi omwiidi,Nokunganya ngaashi omwiidi mutalala.
ב [Bet]
3 Lineekela muJehova nokulonga osho shiwa;Kala kombada yedu,* nokukala omudiinini.
4 Kala wa hafa unene* omolwaJehova,Note ku wanifile po omahalo omutima woye.
ג [Gimel]
5 Ondjila yoye i tula* momake aJehova;Mu lineekela, nota ka katuka ponhele yoye.
6 Oilonga yoye youyuki ote i vemifa, ngaashi eluwa tali tende,Nouyuki woye, ongaashi etango moshanga shomutenya.
ד [Dalet]
7 Kala wa mwena koshipala shaJehova,Nokuteelela nodjuulufi* kuye.
Ino handukifwa komunhu,Oo ha pondola mokuwanifa po eemhangela daye.
ה [He]
8 Efa ehandu, noino kala wa fula onya;Ino handuka, ndele to longo owii.*
9 Osheshi ovalongi vowii otava ka kombololwa po,Ashike ovo tava teelele Jehova otava ka fyuulula edu.
ו [Waw]
10 Konima ashike yokafimbo kanini, ovakolokoshi itava ka kala po vali;Oto ka tala opo va li,Ndele itava ka kala po vali.
11 Ashike ovalidiiniki* otava ka fyuulula edu,Notava ka hafela neenghono ombili pauyadi.
ז [Zayin]
12 Omukolokoshi oha pangelele omuyuki eemhangela;Ohe mu likweshele komayoo.
13 Ashike Jehova ote mu yolo,Molwaashi oku shii kutya efiku laye otali uya.
ח [Het]
14 Ovakolokoshi ohava pweya mo omaongamukonda avo, nohava lukile* omauta avo,Va pundule omufininikwa nosho yo ohepele,Va dipae ovo ve li mondjila ya yuka.
15 Ashike eongamukonda lavo otali ka twa omitima davo vene;Omauta avo otaa ka teyaulwa po.
ט [Tet]
16 Kanini, oko omuyuki e na, oke li xwepoKe dule omamona mahapu ovakolokoshi vahapu.
17 Osheshi omaoko ovakolokoshi otaa ka teyaulwa,Ashike Jehova ota ka yambidida ovayuki.
י [Yod]
18 Jehova oku shii onghalo yaavo vehe na etimba,*Nefyuululo lavo otali ka kala po fiyo alushe.
19 Pefimbo loudjuu, itava ka fifwa ohoni;Pefimbo londjala, otava ka kala ve na shihapu.
כ [Kaf]
20 Ashike ovakolokoshi otava ka xula po;Ovatondi vaJehova otava ka kana po ngaashi omaulifilo mawa;Otava ka kana po ngaashi omwifi.
ל [Lamed]
21 Omukolokoshi oha ehela, ndele iha shunifa,Ashike omuyuki oha yandje nehalo liwa* noku na olukeno.*
22 Ovo va nangekwa noupuna kuYe otava ka fyuulula edu,Ashike ovo va fingwa kuYe, otava ka kombololwa po.
מ [Mem]
23 Jehova oha wilike* eenghatu domunhu,Ngeenge okwa hokwa ondjila yaye.
24 Nonande na punduke, ita ka ekelwa pedu,Osheshi Jehova ohe mu yambidida neke.*
נ [Nun]
25 Onda li omunyasha, ndele paife onda kulupa;Ashike inandi mona nande omuyuki umwe a efiwa,Ile oludalo laye tali ehela omungome.*
26 Oha yandje alushe nehalo liwa,Novana vaye ohava nangekwa noupuna.
ס [Samek]
27 Efa po okulonga owii, ndele to longo ouwa,Noto ka kala fiyo alushe.
28 Osheshi Jehova oku hole ouyuki,Noita efa ovadiinini vaye.
ע [Ayin]
Otava pashukilwa alushe;Ashike oludalo lovakolokoshi otali ka kombololwa po.
29 Ovayuki otava ka fyuulula edu,Notava ka kala ko fiyo alushe
פ [Pe]
30 Okanya komuyuki ohaka popi ounongo,*Nelaka laye ohali popi kombinga youyuki.
31 Omhango yaKalunga kaye oi li momutima waye;Eenghatu daye itadi ponyo.
צ [Tsade]
32 Omukolokoshi oha tale omuyuki,Ta kongo omhito e mu dipae.
33 Ashike Jehova ite mu efele meke lomunhu oo,Ile e mu mone ondjo, ngeenge a tokolwa.
ק [Kof]
34 Teelela kuJehova, nokushikula ondjila yaye,Note ke ku tumbaleka u fyuulule edu.
Ngeenge ovakolokoshi tava kombololwa po, oto ke shi mona.
ר [Res]
35 Onda mona omunhu omukwanyanya ha longo owii,Ta tandavele ngaashi omuti wa kula u li medu lao.
36 Ashike okwa vilola po diva, nokwa ya;Onda kala noku mu konga, ndele ina monika.
ש [Sin]
37 Didilika oo ehe na etimba,*Nokukala to tale omuyuki;Osheshi onakwiiwa yomunhu oo otai ka kala i na ombili.
38 Ashike ovanyoni aveshe otava ka hanaunwa po;Onakwiiwa yovakolokoshi otai ka xulifwa po.
ת [Taw]
39 Exupifo lovayuki ohali di kuJehova;Oye ongulu yavo youhondameno pefimbo loudjuu.
40 Jehova ote va kwafele, noku va xupifa.
Ote va xupifa kovakolokoshi, noku va amena,Molwaashi ohava kongo eameno kuye.
Eshangelo lopedu
^ Ile “wa fula onya.”
^ Ile “moshilongo.”
^ Ile “Kala wa nyakukwa neenghono.”
^ Eln., “Ondjila yoye i undulila.”
^ Ile “nelididimiko.”
^ Ile tashi dulika, “Ino handuka, osheshi otashi twala ashike moshiponga.”
^ Ile “ovalininipiki.”
^ Ile “mange.”
^ Eln., “omafiku aavo vehe na etimba.”
^ Ile “oku na onghenda.”
^ Ile “noha kwafele.”
^ Ile “oha pameke.”
^ Ile “neke laYe.”
^ Ile “oikulya.”
^ Ile “ohaka popi ounongo nondaka yopedu.”
^ Ile “oo ha kanyatele oudiinini.”
