Omapsalme 38:1-22
Eimbilo laDavid, li li edimbulukifo.*
38 Omwene Jehova, ino hanyena nge wa handuka,Noino pukulula nge wa fula onya.
2 Osheshi oikuti yoye oya tyuula nge meni mokule,Neke loye ola lyaminina nge.
3 Olutu lange alishe otali ehama* omolwehandu loye.
Momakipa ange kamu na ombili omolwenyono lange.
4 Osheshi omapuko ange, oo taa ingaana kombada yomutwe wange,Omahapu unene kwaame nokulididimikila, ngaashi omutengi mudjuu.
5 Oipute yange otai nyika notai mbwetaOmolwoulai wange.
6 Ondi li moudjuu, nonda wililwa po neenghono;Efimbo alishe ohandi ende nda nyika oluhodi.
7 Ohandi pi meni lange;*Olutu lange alishe otali ehama.
8 Onda fya ombabanghukuta, nonda nyanyaulwa filufilu;Ouyehame womutima wange otau ningifa nge ndi keme mokule.*
9 Omwene Jehova, omahalo ange aeshe ou a wete,Nokutwa omadima kwange inaku ku holekwa.
10 Omutima wange otau denge, kandi na vali eenghono,Nouyelele womesho ange owa fiya nge po.
11 Ookaume kange novakwetu ohava henuka nge omolwouvela wange,Novashiivikile vopopepi elela naame ohava kala nge kokule.
12 Ovo tava kongo omwenyo wange, ohava tele eemwiyo;Ovo tava kendabala okweetela nge oshiponga, ohava kundafana shi na sha nokuhanauna nge po;Ohava popi oinima youkengeleledi efimbo alishe.
13 Ngaashi ombolo, ihandi udu ko;Ngaashi omufitandaka, ihandi makula okanya kange.
14 Onda ninga ngaashi omunhu oo ehe udite ko,Oo omilungu daye itadi dulu okutya sha, e lipopile.
15 Osheshi onda teelela kwoove, Omwene Jehova,Nowa nyamukula nge, Omwene Jehova, Kalunga kange.
16 Osheshi onda ti: “Inava hafa omolwange,Ile ve litumbalekele nge, ngeenge omhadi yange oya i omufenu.”
17 Osheshi onda li pokulidenga po,Nonda li ndi udite ouyehame mwaame mwi.
18 Onda hepaulula epuko lange;Onda li nda wililwa po kenyono lange.
19 Ashike ovatondi vange ova nyatipala* novanaenghono,*Ovo tava tondo nge, nopehe na etomheno lasha, ova hapupala.
20 Ova alulila nge owii, nonande onde va ningila ouwa;Ova li tava kondjifa nge, eshi handi twikile okulonga osho shiwa.
21 Omwene Jehova, ino efa nge.
Kalunga kange, ino kala kokule naame.
22 Endelela, u kwafele nge,Omwene Jehova, omuxupifi wange.
Eshangelo lopedu
^ Ile “li dimbulukife.”
^ Eln., “Kape na apa pe li nawa mombelela yange.”
^ Eln., “Ekalo lange otali pi neenghono.”
^ Ile “ndi ule.”
^ Eln., “mwenyopala.”
^ Ile tashi dulika, “Ashike ovo va ninga ovatondi vange nopehe na etomheno lasha ovahapu.”
