Omapsalme 44:1-26
Komuwiliki. Epsalme lovanamati vaKora. Maskil.*
44 Kalunga kange, otwa uda nomatwi etu vene;Ootatekulululwa ove tu hokololelaOilonga oyo wa longa pefimbo lavo,Pomafimbo onale.
2 Owa taataa oiwana neke loye,Nowa tula mo ootatekulululwa.
Owa nyanyaula oiwana, nowe i taataa mo.
3 Inava kufa ko edu keongamukonda lavo vene,Nokwooko kwavo hako kwe va etela efindano.
Ponhele yaasho, okeke loye lokolulyo nokokwooko kwoye nosho yo kouyelele woshipala shoye,Osheshi owa li we va hokwa.
4 Kalunga kange, oove Ohamba yange;Pa* Jakob efindano linene.*
5 Ohatu ka taataa ovakondjifi vetu keenghono doye;Omedina loye hatu ka lyataula ovo tava fikama ve tu kondjife.
6 Osheshi inandi lineekela mouta wange,Neongamukonda lange itali dulu okuxupifa nge.
7 Oove wa li we tu xupifa kovakondjifi vetu,Oove ou wa fifa ohoni ovo ve tu tonde.
8 Ohatu ka tanga Kalunga efimbo alishe,Nohatu ka yandja olupandu kedina loye fiyo alushe. (Sela)
9 Ashike paife owe tu ekelashi nowe tu fifa ohoni,Noiho i pamwe netangakwaita letu.
10 Owa kala to tu ningifa tu faduke po ovakondjifi vetu;Ovo ve tu tonde ohava kufa keshe osho va hala.
11 Owe tu yandja tu xwakwe po ngaashi eedi;Owe tu lihanifila mokati koiwana.
12 Owa landifa po oshiwana shoye kombilixa elela;Ino mona mo sha, eshi we shi landifa po.*
13 Owe tu dinifa kovashiinda shetu,Twa ninga oshinima shokushekwa nokulengaifwa kwaaveshe, ovo ve tu dingilila.
14 Owe tu ninga oshinima shokuumbwa omishe* mokati koiwana,Oshinima osho ovanhu tava pukaapukile omitwe davo.
15 Efimbo alishe ohandi kala nda fya ohoni,Nohandi kala nda wililwa po kelengwa lange.
16 Omolwondaka yomasheko nomatukano avo,Omolwomutondi wetu oo te tu kwatele onghone.
17 Aishe oyo oye tu hanga, ashike inatu ku dimbwa,Noinatu nyona ehangano loye.
18 Omitima detu inadi amuka ko kwoove;Eenghatu detu inadi dja mo melila loye.
19 Ashike owe tu nyanyaulila opo hapa kala ookavandje;Owe tu tuvikila nomudidimbe mulaula.
20 Ngeenge otwa dimbwa edina laKalunga ketu,Ile ngeenge otwa yelula omaoko etu, tu ilikane kukalunga wokoilongo,
21 Mbela Kalunga ita ka mona oshinima osho?
Oku shii oiholekwa yomutima.
22 Osheshi efimbo alishe ohatu dipawa omolwoye;Otwa talika ko ngaashi eedi tadi ka dipawa.
23 Penduka! Omwene Jehova, omolwashike wa kofa natango?
Kala oupafi! Ino tu ekelashi fiyo alushe.
24 Omolwashike wa holeka oshipala shoye?
Omolwashike wa dimbwa omafininiko etu nomahepeko etu?
25 Osheshi fye* otwa tulwa pedu mondwi;Omalutu etu okwa findilwa pedu.
26 Fikama onga omukwafi wetu!
Tu xupifa* omolwohole yoye i na oudiinini.
Eshangelo lopedu
^ Tala Omafatululo oitya.
^ Ile “Yandja.”
^ Ile “exupifo linene.”
^ Ile “mondado yavo.”
^ Eln., “oshitevo.”
^ Ile “eemwenyo detu.”
^ Eln., “kulila.”
