Omapsalme 45:1-17
Komuwiliki; oli na okwiimbwa mongovela “Eengala.” Epsalme lovanamati vaKora. Maskil.* Eimbilo lohole.
45 Omutima wange owa tunhukwa koshinima shiwa.
Ohandi ti: “Eimbilo lange* oli na sha nohamba.”
Elaka lange nali kale ngaashi oshishangifo* shomushangululi* onghulungu.
2 Ove ou muwa unene movanamati aveshe vovanhu.
Omilungu doye otadi kunguluka eendjovo donghenda.
Nomolwaasho Kalunga e ku nangeka noupuna fiyo alushe.
3 Omunaenghono ove, homata eongamukonda loye moshiya shoye,U ulike efimano netumbalo loye.
4 Nomolwetumbalo loye, inda u ka findane;*Londa u ka lwile oshili, elininipiko nosho yo ouyuki,Neke loye lokolulyo otali ka longa* oinima ikumwifi.
5 Oikuti yoye oya honga, tai li dengifa po ovanhu moipafi yoye;Otai tyuula omitima dovatondi vohamba.
6 Kalunga oye olukalwapangelo loye alushe fiyo alushe;Odibopangelo youhamba woye oyo odibo youyuki.
7 Ou hole ouyuki, nou tonde oukolokoshi.
Nomolwaasho Kalunga, Kalunga koye, e ku vaeka nomaadi oo tae ku etele ehafo linene shi dulife ookaume koye.
8 Oikutu yoye aishe oi na edimba lomirha, lendobo* noloakassia;Oishikomwa yeengodi ohai ku hafifa, okudja mombala inene yomayoo eendjaba.
9 Ovanakadona veehamba ove li mokati kovakainhu va fimana.
Omukulukadi wohamba* okwa kala ofika kolulyo loye, a djala oshingoli shokuOfir.
10 Omonakadona ove, pwilikina, yandja elitulemo nokweendeka okutwi kwoye,Dimbwa oshiwana sheni neumbo laxo.
11 Nohamba otai ka kala ya halelela ouwa woye,Osheshi oyo omwene woye,Onghee i linyongamena.
12 Omonakadona wokuTirus ote ke uya nomulongelo;Novalumenhu oipuna elela otava ka konga ekwafo kwoove.*
13 Mombala* omu na omonakadona wohamba a fewa unene;Oikutu yaye oya fewekwa* noshingoli.
14 Ota etwa kohamba a djala oikutu ya hondjwa nawa.*
Oukadona elela, ovo tave mu landula, ova etwa koshipala shoye.
15 Otava etwa mo va nyakukwa nova hafa;Otava i mombala yohamba.
16 Ovanamati voye otava ka ya ponhele yooxokulululwa.
Oto ke va nangeka po ve li omalenga kombada yedu alishe.
17 Edina loye ohandi ke li shiivifa komapupi aeshe oo tae ke uya.
Nomolwaasho ovanhu tave ke ku tanga alushe fiyo alushe.
Eshangelo lopedu
^ Tala Omafatululo oitya.
^ Eln., “Oilonga yange.”
^ Ile “opena.”
^ Ile “shomushangi.”
^ Ile “pondole.”
^ Eln., “ku hongo.”
^ Edina olo ola yukifwa komuti oo u na edimba liwa, nowa li hau longifwa okuninga omaadi edimba liwa pefimbo lOmbiibeli.
^ Ile “Omumbada.”
^ Ile “pupaleka oshipala shoye.”
^ Eln., “Meumbo.”
^ Eln., “oya tulwa.”
^ Ile tashi dulika, “oikutu ya hondjwa.”
