Omapsalme 60:1-12
Komuwiliki; oli na okwiimbwa mongovela “Eengala dEdimbulukifo.” Miktam.* Epsalme laDavid. Lokuhonga. Eshi a li ta lwifa Aram-naharaim naAram-soba, na Joab okwa shuna, ndele ta dipaele Ovaedom 12 000 mEfilu lOmongwa.
60 Kalunga kange, owe tu efa po; owe tu lihanifa.
Owa li we tu handukila; ashike paife, tu tambula ko vali.
2 Owa kakamifa edu; owe li taula la yeuluka.
Fitika omifya dalo, osheshi otali mbonyouka.
3 Owa ningifa ovanhu voye va mone oixuna.
Owe tu nwefa omaviinyu, oo hae tu pungaukifa.
4 Yandja* edidiliko kwaavo have ku tila,Va ye onhapo nokuyepa outa. (Sela)
5 Opo ovo u hole va dule okwaamenwa,Tu xupifa neke loye lokolulyo, noku tu nyamukula.
6 Kalunga okwa popya mouyapuki waye,* a ti:
“Ohandi hafe; ohandi yandje Sekem e li efyuululo,Nohandi tende ko Efilu laSukkot.
7 Gilead oshange, ngaashi ashike Manasse,Na Efraim embale* lokomutwe wange;Juda odibopangelo yange.
8 Moab oshiyaxa shange shokulikoshela.
Ohandi ka kupula eenghaku dange muEdom.
Ohandi ka ingida nehafo muFilistia omolwefindano.”
9 Olyelye ta eta nge koshilando sha kondekwa?*
Olyelye ta twala nge kokule kuEdom?
10 Kalunga kange, mbela haave oo we tu efa po,Kalunga ketu, ou iho i vali pamwe nomatangakwaita etu?
11 Tu kwafela moudjuu wetu,Osheshi exupifo lovanhu olongaho.
12 Ohatu ka mona eenghono omolwaKalunga,Nota ka lyataula ovatondi vetu.
Eshangelo lopedu
^ Tala Omafatululo oitya.
^ Ile tashi dulika, “Owa yandja.”
^ Ile tashi dulika, “monhele yaye iyapuki.”
^ Eln., “ohotengulu.”
^ Ile tashi dulika, “shomakuma a pama.”
