Omapsalme 68:1-35
Komuwiliki. Epsalme laDavid. Epsalme. Eimbilo.
68 Kalunga, na fikame, ovatondi vaye nave lihanifwe,Naavo ve mu tonde nava ye onhapo koshipala shaye.
2 Ngaashi ashike omwifi hau i nomhepo, va taataa;Ngaashi ashike eshila lomaadi eenyiki hali hengumuka komundilo,Novakolokoshi yo nava xule po koshipala shaKalunga.
3 Ashike ovayuki nava hafe;Nava nyakukwe koshipala shaKalunga;Nava nyakukwe unene.
4 Imbileni Kalunga; edina laye li imbileni omaimbilohambelelo.*
Imbileni Oo ta tavakana momaluhaela omombuwa.*
Jah* olo edina laye. Nyakukweni koshipala shaye.
5 Xe yaavo vehe na ooxe nomwaameni* wovafiyekadiOKalunga, oo e li monhele yaye iyapuki.
6 Kalunga oha pe eumbo ovo vehe na ekwafo lasha va kale mo;Oha mangulula ovanadolongo, noku va twala mehepuluko.
Ashike ovatangalali* ove na okukala medu la notelwa.
7 Omwene Kalunga, eshi wa kwatela komesho* ovanhu voye,Eshi wa endaenda mombuwa, (Sela)
8 Edu ola kakama;Eulu ola lokifa odula* omolwaKalunga;Sinai ou okwa kakama omolwaKalunga, Kalunga kaIsrael.
9 Omwene Kalunga, owa lokifa odula inene;Owa pameka ovanhu* voye, ovo va li va loloka.
10 Ova li hava di momatwali oye omoshitukulwa;Omwene Kalunga, omolwouwa woye, owa fila oshisho eehepele.
11 Jehova okwa yandja elombwelo;Ovakainhu, ovo tava udifa onghundana iwa, ove li etangakwaita linene.
12 Eehamba domatangakwaita oda ya onhapo, da ya onhapo.
Omukainhu oo ha fyaala meumbo oha mono oixuulwa.*
13 Nonande ovalumenhu nye omwa li mwa nangala pomundilo mokati keenhanda,*Otapa ka kala omavava onghuti a vaekwa noshisilveri,Neexulo domavava oshingolielela.*
14 Eshi Omunaenghono adishe e lihanifa eehamba dasho,Olumi* ola wila muSalmon.*
15 Omhunda yaBasan oyo omhunda yaKalunga;*Omhunda yaBasan oyo omhunda i na eexulo.
16 Nye eemhunda di na eexulo, omolwashike hamu tale nonduboOmhunda yaKalunga, oyo a hoolola* i li olukalwa laye?
Oshoshili, Jehova ota kala oko fiyo alushe.
17 Omatemba oita aKalunga oku li omayovi omilongo, omayovi lwomayovi.
Jehova okwa dja kuSinai, ndele ta i monhele iyapuki.
18 Owa londa pombada;*Owa ya neenghwate;Owa kufa ovalumenhu ve li eeshali,Heeno, nokuli novatangalali, va kale mokati kavo, Omwene Jah Kalunga.
19 Jehova na tangwe, oo ha humbata omitengi detu efiku keshe,Kalunga kashili oye exupifo letu. (Sela)
20 Kalunga kashili oKalunga oo he tu xupifa;Na Jehova, Omwene Omunamapangelo aeshe, ohe tu mangulula mefyo.
21 Heeno, Kalunga ota ka nyanyaula omitwe dovatondi vaye,Kombada yomutwe* wakeshe oo ta twikile* okunyona.
22 Jehova okwa ti: “Ohandi ke va alula mo muBasan;Ohandi ke va alula mo moule mefuta,
23 Opo omhadi yoye i koshwe mohonde,Nomalaka eembwa doye a mone oshitukulwa shao kovatondi.”
24 Ove wete oyeendo yovanhu voye, Kalunga kange,Oyeendo yovanhu vaKalunga kange, Ohamba yange, ya yuka monhele iyapuki.
25 Ovaimbi otava ende ve li komesho, ovashiki vomusika tava shiki oishikomwa yeengodi ve va shikula;Nopokati, ovakainhu ovanyasha tava denge oungoma.
26 Tangeni Kalunga meongalo linene;*Tangeni Jehova, nye ovo mwa dja mOdjo yaIsrael.
27 Benjamin, oo munini, ote va findi, ofimbo ve li oko,Nomalenga yo aJuda neengudu dao tadi weelele,Omalenga aSebulon nomalenga aNaftali.
28 Kalunga koye okwa popya kutya oto ka kala wa pama.
Kalunga kange, ulika eenghono doye, ove ou wa katuka ponhele yetu.
29 Omolwotembeli yoye, oyo i li kuJerusalem,Eehamba otadi ke ku etela eeshali.
30 Hanyena oifitukuti yomeembungu,Ongudu yeemhedi nosho yo outana vado,Fiyo osheshi ovanhu tave linyongamene, eshi tava yandje* oisilveri.
Ashike ota ka halakanifa ovanhu ovo ve hole oita.
31 Oinima ya longwa moshikushu otai ka kufwa* muEgipiti;Kus ota ka endelela a yandje eeshali kuKalunga.
32 Akutu, omauhamba okombada yedu, imbileni Kalunga,Jehova mu imbileni omaimbilohambelelo,* (Sela)
33 Kwaao a londa keulu olo la kala po okudja nale.
Tala! Ota ngunguma nondaka yaye, ondaka inaenghono.
34 Dimineni eenghono daKalunga.
Etumbalo laye oli li muIsrael,Neenghono daye odi li mewangadjo.*
35 Kalunga omukumwifi okudja monhele yaye* inene iyapuki.
Oye Kalunga kaIsrael,Oo a yandja eenghono nomafa kovanhu.
Tangeni Kalunga.
Eshangelo lopedu
^ Ile “shikileni omusika.”
^ Ile tashi dulika, “a londa oilemo.”
^ “Jah” exupipiko ledina Jehova.
^ Eln., “nomutokoli.”
^ Ile “ovanashibofa.”
^ Eln., “wa tetekela.”
^ Eln., “omata.”
^ Eln., “efyuululo.”
^ Ile “omaliko oo a xupa po konima yolwoodi.”
^ Ile tashi dulika, “moyuunda yeedi.”
^ Ile “a twima oshunga.”
^ Ile “O-snow.”
^ Ile “MuSalmon omwa li mwa fa mwa wila olumi.”
^ Ile “omhunda inene.”
^ Ile “hala.”
^ Ile “meulu.”
^ Ile “Pokati komutwe.”
^ Ile “endaenda.”
^ Eln., “moyoongalele.”
^ Ile tashi dulika, “tava lyataula.”
^ Ile tashi dulika, “Ovatumwa otava ka dja.”
^ Ile “shikileni omusika.”
^ Eln., “moilemo.”
^ Eln., “yoye.”
