Omapsalme 69:1-36
Komuwiliki; oli na okwiimbwa mongovela “Eengala.” Epsalme laDavid.
69 Kalunga kange, xupife nge, osheshi omeva otaa tilifa omwenyo wange.*
2 Onda ningina monhata ile, omo muhe na edu la pama.
Onda ya momeva male,Nomakungulukilo omeva taa endelele okwa kombolola nge po.
3 Onda loloka kokwiifana;Omunino wange otau ehama.
Omesho ange okwa loloka, ofimbo nda teelela Kalunga kange.
4 Ovo ve tonde nge, nopehe na etomheno lasha,Ovahapu unene ve dule eexwiki dokomutwe wange.
Ovo tava dulu okuhanauna nge po,Ovatondi vange ovakengeleledi,* ova ninga vahapu.
Onda li nda fininikwa ndi yandje osho inandi vaka.
5 Kalunga kange, ou shii oulai wange,Nenyono lange inali ku holekwa.
6 Ino efa ovo ve lineekela mwoove va fifwe ohoni omolwange,Omwene Omunamapangelo aeshe, Jehova womatangakwaita.
Ino efa ovo tave ku kongo va lengaifwe omolwange,Omwene Kalunga kaIsrael.
7 Onda mona oixuna kokushekwa omolwoye;Oshipala shange oshi yadi ohoni.
8 Onda ninga omweendanandjila kovamwameme,Omunailongo kovanamati vameme.
9 Ouladi omolweumbo loye owa fa omundilo tau xwike meni lange,Nomasheko aavo tave ku sheke okwa hanga nge.
10 Eshi nde lininipika ame mwene* mokulidilika,*Onda li nda shekwa omolwoshinima osho.
11 Eshi nda ninga oshako oshikutu shange,Onda ninga omuyolwa* kuvo.
12 Aame oshipopiwa shaavo ve li omutumba poshivelo shoshilando,Neengholwe aame hadi tumbula momaimbilo ado.
13 Ashike eilikano lange nali uye kwoove,Omwene Jehova, pefimbo la wapala.
Omolwohole yoye inene i na oudiinini, Kalunga kange,Nyamukule nge nokuulika kutya ou li omuxupifi omudiinini.
14 Xupife nge monhata;Ino efa ndi ningine.
Xupife nge kwaavo ve tonde ngeNomomeva male.
15 Ino efa omeva efundja taa endelele a kombolole nge po,Ile oule u pone nge po,Ile ondungu* i mbonyokele nge.
16 Omwene Jehova, nyamukule nge, osheshi ohole yoye i na oudiinini oiwa.
Omolwonghenda yoye inene, taalela kwaame,
17 Noino holeka omupiya woye oshipala shoye.
Nyamukule nge diva, osheshi ondi li moudjuu.
18 Ehena popepi naame, ndele to xupifa nge;*Kulile nge omolwovatondi vange.
19 Ou shii okushekwa kwange, nohoni yange nosho yo elengwa lange.
Ou wete ovatondi vange aveshe.
20 Okushekwa okwa teyaula omutima wange, noshipute itashi dulu okuvelulwa.*
Onda li nda teelela okuudilwa oukwao wananghali, ndele kapa li oo e u ulikila nge,Novahekeleki, ndele inandi mona nande oumwe.
21 Ashike ponhele yoikulya ova pa nge oudiyo,*Naashi nda li nda fya enota, ova pa nge oasheina* ndi nwe.
22 Oshitaafula shavo nashi ninge omwiyo kuvo,Nemona lavo nali ninge elulo.
23 Omesho avo naa twikifwe, opo vaha mone ko,Neenho davo nadi kakamifwe alushe.
24 Va tila ehandu loye,Noupyuhandu woye nau va hange.
25 Onhanda* yavo nai ninge eputu;Momatwali avo namu kale muhe na nande omunhu.
26 Osheshi ohava taataa oo wa monifa oshiponga,Nohava twikile okupopya kombinga youyehame waavo wa ehameka.
27 Weda ko etimba ketimba lavo,Noinava kala ve na oshitukulwa mouyuki woye.
28 Nava dimwe mo membo lovanamwenyo,*Noinava shangwa pamwe novayuki.
29 Ashike onda fininikwa, nondi li mouyehame.
Kalunga kange, eenghono doye dokuxupifa nadi amene nge.
30 Ohandi ka imbila edina laKalunga omaimbilohambelelo,Nohandi ke mu fimanekifa nomapandulo.
31 Eshi otashi ka hafifa Jehova, shi dulife ongobe yomhedi,Shi dulife ondumetana i na eembinga nomakondo.
32 Ovalidiiniki* otave ke shi mona, ndele tava hafe.
Nye ovo tamu kongo Kalunga, omitima deni nadi pepelelwe.
33 Osheshi Jehova ota pwilikine keehepele,Noita tondo ovanhu vaye ovo ve li moukwatwa.
34 Eulu nedu nai mu tange,Omafuta noinima aishe oyo i li mo tai linyenge.
35 Osheshi Kalunga ota ka xupifa Sion,Nota ka tungulula oilando yaJuda,Notava ka kala mo, noku li nangala.*
36 Oludalo lovapiya vaye otali ke li fyuulula,Naavo ve hole edina laye otava ka kala mulo.
Eshangelo lopedu
^ Ile “okwe uya komwenyo wange.”
^ Ile “Ovatondi nopehe na etomheno lasha.”
^ Eln., “omwenyo wange.”
^ Ile tashi dulika, “Eshi nda lila nokulidilika.”
^ Eln., “oshitevo.”
^ Ile “elambo.”
^ Ile “Ehena popepi nomwenyo wange, ndele to u xupifa.”
^ Ile “nondi li pokukanifa eteelelo.”
^ Ile “oshimeno shi na oudiyo.”
^ Ile “o-vinegar.”
^ Ile “Ekuma lonhanda.”
^ Ile “membo lomwenyo.”
^ Ile “Ovalininipiki.”
^ Sha hala okutya, “edu.”
