Omapsalme 71:1-24
71 Omwene Jehova, onda konga eameno mwoove.
Inandi fifwa ohoni nandenande.
2 Amene nge, nokuxupifa nge molwouyuki woye.
Pakalekela okutwi kwoye* kwaame nokuxupifa nge.
3 Kala emanya lange louhondameno,Omo handi dulu alushe okuya.
Yandja elombwelo u xupife nge,Osheshi oove emanya lange nohotengulu yange.
4 Kalunga kange, xupife nge meke lomukolokoshi,Meke laao ta fininike nge shihe li pauyuki.
5 Osheshi Omwene Jehova, Omunamapangelo aeshe, oove elineekelo lange;Okudja kounyasha wange, onda kala nde lineekela mwoove.*
6 Okudja kedalo, onde lineekela mwoove;Oove wa kufa nge moshidalelo shameme.
Ohandi ku tange alushe.
7 Ovanhu vahapu ohava kala va kuminwa nge, eshi va mona osho sha ningilwa nge,Ashike oove ouhondameno wange wa pama.
8 Okanya kange otake ku tange alushe;Efimbo alishe ohandi hepaulula kombinga yewapalo loye.
9 Ino ekela nge shi moukulupe wange;Ino efa nge, ngeenge eenghono dange tadi ninipala.
10 Ovatondi vange otava popi nge,Naavo va hala okudipaa nge* otave likundu
11 Tava ti: “Kalunga okwe mu efa po.
Mu taataeni noku mu kwata po, osheshi kape na oo te mu xupifa.”
12 Kalunga kange, ino kala nge kokule.
Omwene Kalunga kange, endelela u kwafele nge.
13 Ovo tava kondjifa nge*Nava fifwe ohoni nokuxula po.
Ovo va hala okweetela nge oupyakadiNava tuvikilwe nelengwa nosho yo nohoni.
14 Ashike ame, ohandi twikile okuteelela;Ohandi weda ko koku ku tanga.
15 Okanya kange otaka ka hokolola ouyuki woye,Nefimbo alishe oilonga yoye yexupifo,Nonande oihapu kwaame okukoneka.*
16 Ohandi uya, nokupopya kombinga yoinenelonga yoye,Omunamapangelo aeshe, Omwene Jehova;Ohandi ka tumbula ouyuki woye, woye auke.
17 Kalunga kange, owa honga nge okudja kounyasha wange,Nofiyo opaife ohandi twikile okuhepaulula oilonga yoye ikumwifi.
18 Kalunga kange, nokuli nongeenge onda kulupa, nokuninga eenghwakutoka, ino efa nge.
Nandi lombwele epupi tali shikula ko kombinga yeenghono* doye dinene,Nosho yo aveshe ovo tave uya kombinga younene woye.
19 Kalunga kange, ouyuki woye owa twa pombada;Owa longa oinima inene;Kalunga kange, olyelye e ku fa?
20 Nonande owa efa ndi hangwe koupyakadi muhapu nokoudjuu,Alulile nge vali eenghono;Kufe nge mo moule* wedu.
21 Hapupalifa etumbalo langeNokudingilila nge, nou hekeleke nge.
22 Opo nee ohandi ke ku tanga noshishikomwa sheengodi,Omolwoudiinini woye, Kalunga kange.
Ohandi ku imbile omaimbilohambelelo* nokaxumbafeta,Omuyapuki waIsrael.
23 Omilungu dange otadi ke ku tanga nehafo, eshi handi ku imbile omaimbilohambelelo,Osheshi owa xupifa omwenyo wange.*
24 Elaka lange otali ka popya kombinga* youyuki woye efimbo alishe,Osheshi ovo va hala okuhanauna nge po, otava ka fifwa ohoni nokulengaifwa.
Eshangelo lopedu
^ Ile “Endeka, ndele to pwilikine.”
^ Ile “oove elineekelo lange.”
^ Ile “tava kongo omwenyo wange.”
^ Ile “omwenyo wange.”
^ Ile “okuvalula.”
^ Eln., “okwooko.”
^ Ile “momeva male.”
^ Ile “shikile omusika.”
^ Ile “kulila omwenyo wange.”
^ Ile “dilonga.”
