Omapsalme 74:1-23
Omaskil.* Epsalme laAsaf.
74 Kalunga kange, omolwashike we tu liteeka po fiyo alushe?
Omolwashike wa handukila unene eedi doufita* woye?
2 Dimbuluka ovanhu* ovo we lihoololela okudja nale,Epata olo wa kulila li li efyuululo loye.
Dimbuluka Omhunda Sion, oko wa li ho di.
3 Inda konhele yoikulukuma, oyo tai kala po alushe.
Omutondi okwa hanauna po ashishe osho shi li monhele iyapuki.
4 Ovatondi voye otava ingida meni lonhele yoye yokwoongalela.*
Ova dika ko omapandela avo e li omadidiliko.
5 Ova li va fa ovanhu va yelulila omakuva omufitu wa fita.
6 Ova tataula po nomakuva oinima aishe oyo ya hokelwa mo nosho yo oihakifo yoshivela shilaula.
7 Ova xwika po onhele yoye iyapuki.
Ova nyateka etwalihangano lokufimanekifila edina loye, noku li ekela pedu.
8 Vo noludalo lavo ove lipopila momitima davo tava ti:
“Eenhele adishe dokwoongalela daKalunga* domoshitukulwa odi na okuxwikwa po.”
9 Kape na vali omadidiliko oo hatu dulu okumona;Kape na vali nande omuprofeti,Nokape na umwe mokati ketu e shi shii kutya eshi otashi ka kwata efimbo li fike peni.
10 Kalunga kange, fiyo onaini omutondi ta kala nokusheka?
Mbela omutondi ota ka ungaunga nedina loye nokuhe na efimaneko fiyo alushe?
11 Omolwashike wa mweneka eke loye, eke loye lokolulyo?
Li kufa mo monghwapa yoye,* ndele to va xulifa po.
12 Ashike Kalunga oye Ohamba yange okudja nalenale,Oo ta longo oilonga yexupifo kombada yedu.
13 Owe linyengifa efuta neenghono doye;Owa nyanyaulila momeva omitwe doinamwenyo inene yomefuta.
14 Owa nyanyaula omitwe daLeviatan;*Owe di yandja di li oikulya kovanhu, kovakalimo vomombuwa.
15 Owa panuna eefifiya nosho yo omakungulukilo omeva;Owa pwiininika omilonga, odo hadi kunguluka alushe.
16 Omutenya owoye, noufiku owoye.
Owa shita ouyelele* nosho yo etango.
17 Owa tula po eengaba adishe dedu;Owa eta po okwenye nosho yo okufu.
18 Omwene Jehova, dimbuluka omasheko omutondi,Nghee ovanhu omalai hava ungaunga nedina loye nopehe na efimaneko.
19 Onghalamwenyo* yonghuti yoye yetende ino i efela koifitukuti.
Ino dimbwa onghalamwenyo yovafininikwa voye fiyo alushe.
20 Dimbuluka ehangano,Osheshi eenhele domilaulu kombada yedu, oda ninga eenhele dokuhondama ovalongi vominyonena.
21 Omufininikwa ina dja po a nyemata;Omudinwa nosho yo ohepele nava tange edina loye.
22 Kalunga kange, fikama, ndele to lipopile moihokolola.
Dimbuluka nghee omalai a kala tae ku sheke efimbo alishe.
23 Ino dimbwa osho ovatondi voye tava popi.
Omaweelelo aavo ihava dulika kwoove otaa i pombada alushe.
Eshangelo lopedu
^ Tala Omafatululo oitya.
^ Ile “domoulifilo.”
^ Eln., “ongudu yoye.”
^ Ile “lonhele yoye yoshoongalele.”
^ Ile “Eenhele adishe, omo Kalunga ha longelwa.”
^ Ile “moshikutu shoye.”
^ Tala Omafatululo oitya.
^ Ile “omaminikilo.”
^ Ile “Omwenyo.”
