Omapsalme 77:1-20
Komuwiliki; Jedutun.* Epsalme laAsaf. Eimbilo.
77 Ohandi ka lilila Kalunga nondaka yange;Ohandi ka lilila Kalunga, nota udu nge.
2 Mefiku loudjuu wange, ohandi kongo Jehova.
Oufiku ohandi yelula omake ange nde a yukifa kuye, nopehe na okuloloka.*
Itandi* dulu okuhekelekwa.
3 Ohandi keme, ngeenge nda dimbuluka Kalunga;Onda piyaanekwa nohandi kanifa eenghono.* (Sela)
4 Ou kwete oipa oyo hai tuvike omesho ange;Ondi li moudjuu noitandi dulu okupopya.
5 Omadiladilo ange ohaa shuna komafiku onalenale,Komido odo da ka dilongela.
6 Oufiku ohandi dimbuluka eimbilo* lange;Ohandi dilonga momutima wange;Ohandi* konakona noukeka.
7 Mbela Jehova ote ke tu ekelashi fiyo alushe?
Mbela ita ka kala vali e tu hokwa?
8 Mbela ohole yaye i na oudiinini oya xula po fiyo alushe?
Mbela omapupi aeshe itaa ka mona ewanifo leudaneko laye?
9 Mbela Kalunga okwa dimbwa okuulika onghenda yaye,Ile mbela ehandu laye ola xulifa po onghenda yaye? (Sela)
10 Mbela nandi twikile ngoo okupopya kutya: “Eshi osho tashi udifa nge nai:*
Omukombadambada okwa lundulula onghedi* omo ha ungaunga nafye”?
11 Ohandi dimbuluka oilonga yaJah;Ohandi dimbuluka oilonga yoye ikumwifi, oyo wa longa nalenale.
12 Nohandi dilonga koilonga yoye aishe,Nokudiladila moule koilonga yoye.
13 Kalunga kange, eendjila doye odiyapuki.
Okalunga elipi munene ngaashi ove, Kalunga kange?
14 Oove Kalunga kashili, oo ha ningi oinima ikumwifi.
Owa hololela ovanhu eenghono doye.
15 Owa xupifa* ovanhu voye neenghono* doye,Ovanamati vaJakob novaJosef. (Sela)
16 Kalunga kange, omeva okwe ku mona;Omeva okwe ku mona, nokwa li a kakama.
Nomeva male okwa pindjala.
17 Oilemo oya tilashi omeva.
Ewangadjo, la pwipwikwa koilemo, ola ngunguma,Noikuti yoye oya tuka apa naapenya.
18 Ewi lomungungumo woye ola li la fa omalola etemba;Okushela kwokashelu koye okwa minikila ovakalimo vokombada yedu;*Edu ola dekweta nola kakama.
19 Ondjila yoye oya li ya enda mefuta,Elila loye ola pita momeva mahapu;Ashike eemhadi doye inadi dula okumonika.
20 Owa wilika ovanhu voye ngaashi oufita,Mewiliko* laMoses naAron.
Eshangelo lopedu
^ Tala Omafatululo oitya.
^ Eln., “omake ange nde a yukifa kuye, ndele itaa fi.”
^ Ile “Omwenyo wange.”
^ Eln., “nomhepo yange ohai ngabuka.”
^ Ile “omusika tai danwa koshishikomwa sheengodi.”
^ Eln., “Omhepo yange ohai.”
^ Ile “tyuula nge.”
^ Eln., “eke lokolulyo.”
^ Eln., “kulila.”
^ Eln., “nokwooko.”
^ Tashi dulika “edu liwa okukala, ile hali imike.”
^ Eln., “Meke.”
