Omapsalme 78:1-72
Maskil.* Epsalme laAsaf.
78 Ovanhu vange, pwilikineni komhango* yange;Pakalekeleni okutwi kweni keendjovo dokanya kange.
2 Ohandi popi oshitevo.
Ohandi tomona eetumbutumbu donale.
3 Oinima oyo twa uda notu i shii,Oyo ootate ve tu lombwela,
4 Itatu i holeke ovanamati vetu;Ohatu i hokololele epupi tali ke uya,Oilonga ya tumbala yaJehova neenghono daye,Oinima ikumwifi oyo a ninga.
5 Okwa tula po edimbulukifo muJakob,Nokwa dika po omhango muIsrael;Okwa lombwela ootatekulululwaVa shiivifile ovana vavo oinima oyo,
6 Opo epupi tali shikula ko,Ounona ovo tava ka dalwa, va dule oku i shiiva.
Opo navo va dule oku i lombwela ovana vavo.
7 Opo nee otave ke lineekela Kalunga.
Itava ka dimbwa oilonga yaKalunga,Ndele otava ka diinina oipango yaye.
8 Onghee itava ka kala ngaashi ooxekulululwa,Epupi litangalali nolinashibofa,Epupi olo la li hali tengauka*Noli na omhepo yokuhakala lidiinini kuKalunga.
9 Ovaefraim ova li va homata outa,Ashike ova faduka po mefiku lolwoodi.
10 Inava diinina ehangano laKalunga,Nova anya okweenda momhango yaye.
11 Ova dimbwa yo osho a ninga,Oilonga yaye ikumwifi oyo e va ulikila.
12 Okwa ninga oinima ikumwifi momesho ooxekulululwa,Medu laEgipiti, oshitukulwa shaSoan.
13 Okwa tukula efuta, opo va pite mo,Nokwa kangheka omeva ngaashi ondama.*
14 Omutenya, okwe va kwatela komesho noluudi loshilemo,Noufiku aushe, onouyelele womundilo.
15 Okwa tataula omamanya mombuwa;Okwe va efa va nwe fiyo va kumwa, va fa tava nu poima pe na omeva male.
16 Okwa kungulukifa omeva okudja memanya,Nokwa ningifa omeva a kunguluke ngaashi omilonga.
17 Ashike ova twikila okunyona kuyeMokutukululila oshibofa Omukombadambada mombuwa;
18 Ova shonga* Kalunga momitima davoMokupula kefininiko oikulya oyo va hala.*
19 Onghee ova popya ve li omhinge naKalunga,Tava ti: “Mbela Kalunga ota dulu ngoo okuyala oshitaafula mombuwa?”
20 Tala! Okwa denga emanya,Onghee omeva okwa ndwafuka mo, nomakungulukilo okwa yada neenghono.
“Mbela ota dulu yo oku tu pa omungome,Ile ota dulu okuyandja ombelela koshiwana shaye?”
21 Eshi Jehova e shi uda, okwa li a fula onya;Omundilo owa lungwinifa po Jakob,Nehandu laye linene ola hanga Israel,
22 Molwaashi kava li va itavela muKalunga;Inave lineekela meenghono daye doku va xupifa.
23 Onghee okwa yandja elombwelo kewangadjo olo la pwipwikwa koilemo,Nokwa yeulula omivelo dokeulu.
24 Okwa twikila oku va lokifila omana va lye;Okwe va pa oilya yokeulu.
25 Ovanhu ova lya omungome wovanaenghono;*Okwe u yandja wa wana, opo u va kutife.
26 Okwa tukulula omhepo yokoushilo meulu,Nokwa ningifa omhepo yokolukadi i pepe keenghono daye.
27 Nokwe va lokifila ombelela ngaashi ondwi,Eedila ngaashi ehekedu lopomunghulofuta.
28 Okwe di wilifa mokati konhanda yaye,Da dingilila omatwali aye.
29 Nova lya, ndele tave likutifa vo vene sha pitilila;Okwe va pa osho va li va hala.
30 Ashike ofimbo inava kuta ngaashi va li va hala,Ofimbo oikulya ya li natango momakanya avo,
31 Kalunga okwa li e va handukila neenghono.
Okwa dipaa ovalumenhu vavo ovanaenghono;Nokwa xulifa po ovanyasha vomuIsrael.
32 Nonande ongaho, ova twikila okunyona neenghono,Noinava itavela oilonga yaye ikumwifi.
33 Onghee okwa ninipika omafiku okukalamwenyo kwavo, ngaashi omufudo wongaho,Needula dokukalamwenyo kwavo onoumbada wombadilila.
34 Ashike shimha a hovele oku va dipaa, ohave mu kongo;Ohava shuna, nokukonga Kalunga,
35 Tava dimbuluka kutya Kalunga oye a li Emanya lavo,Nonokutya Kalunga Omukombadambada oye a li Omukulili* wavo.
36 Ndele ova kendabala oku mu kengelela nokanya kavo,Noku mu fufya nelaka lavo.
37 Omitima davo kada li da tokola toko oku mu longela;Nokava li ovadiinini kehangano laye.
38 Ashike okwa li e na onghenda;Okwa kala ha dimi po* omapuko avo, noihe va hanauna po.
Oha shunifa mo ehandu laye lwoikando,Ponhele yokukufa mo onya yaye aishe.
39 Osheshi okwa dimbuluka kutya vo ombelela,Omhepo, oyo hai piti mo, noihai aluka.*
40 Ove mu tukululila oshibofa lwoikando ihapu momaluhaela,Nove mu udifa nai mombuwa.
41 Ova yeleka Kalunga lwoikando noikando,Nova nyikifa oluhodi* Omuyapuki waIsrael.
42 Inava dimbuluka eenghono* daye,Efiku, olo e va xupifa* komutondi,
43 Nghee a holola omadidiliko aye muEgipitiNoikumwifilonga yaye moshitukulwa shaSoan.
44 Nanghee a shitukifa omakungulukilo aNil a ninge ohonde,Opo vaha dule okunwa momakungulukilo ao.
45 Okwa tuma oihomo yomawashe* i va lye po,Nomafuma e va hepeke.
46 Okwa yandja oikunomwa yavo koshipaxu sha nyika oshiponga,Oiimati yoilonga yavo okoshipaxu osho hashi ende meengudu.
47 Okwa hanauna po omiti davo domandjebele neemhawe,Nosho yo omiti davo da fa omikwiyu* neemhawe dinene.
48 Okwa denga neemhawe oinamwenyo yavo oyo hai humbata eendongelwaNosho yo oinamwenyo yavo nomundilo wokashelu.*
49 Okwe va tumina ehandu laye linene,Onya, ehandu noudjuu,Eengudu dovaengeli tadi twala oupyakadi.
50 Ina kelela ehandu laye.
Ine va* xupifa kefyo;Nokwe va* etela oudu wolutapo.
51 Xuuninwa, okwa dipaa oiveli aishe yomuEgipiti,Ehovelo leenghono davo, eshi va li momatwali aHam.
52 Opo nee okwa pitifa mo oshiwana shaye ngaashi oufita,Nokwe va kwatela komesho mombuwa ngaashi oufita munene.
53 Okwe va kwatela komesho ve li meameno,Nokava li ve na oumbada washa;Efuta ola tuvikila ovatondi vavo.
54 Nokwe va eta moshitukulwa shaye shiyapuki,Oshitukulwa eshi shokeemhunda, osho eke laye lokolulyo la kufa ko.
55 Okwa taataa mo oiwana moipafi yavo;Okwe va pa efyuululo la metwa nongodi;Okwa tula omapata aIsrael momaumbo avo.
56 Ashike ova kala nokushonga* Kalunga Omukombadambada, noku mu tukululila oshibofa;Inava yandja elitulemo komadimbulukifo aye.
57 Ova pilamena ko yo, nova li ovakengeleledi ngaashi ooxekulululwa.
Kava li ve shii okulineekelwa, ngaashi ashike outa wa yululuka.
58 Ova kala noku mu udifa nai neenhele davo dokoikulundudu,Nove mu handukifa* neenghono noihongwafano yavo.
59 Kalunga okwe shi uda, nokwa li a fula onya,Onghee okwa li e liteeka po filufilu Israel.
60 Xuuninwa, okwa li a efa po etwalihangano lokuSilo,Etwali omo a li ha kala mokati kovanhu.
61 Okwa efa edidiliko leenghono daye li ye moukwatwa;Ewapalo laye momake omutondi.
62 Okwa yandja oshiwana shaye keongamukonda,Nokwa li a handukila neenghono efyuululo laye.
63 Omundilo owa lungwinifa po ovalumenhu vaye ovanyasha,Noukadona elela vaye kava li va imbilwa omaimbilo oivilohombolo.*
64 Ovapristeri vaye ova fya keongamukonda,Novafiyekadi vavo inave va lila.
65 Opo nee Jehova okwa penduka a fa ta di meemhofi,Ngaashi omukwaita omunaenghono a dja meemhofi, konima eshi a nwa omaviinyu mahapu.
66 Nokwa taataa ovatondi vaye va shune;Okwe va fifa ohoni fiyo alushe.
67 Okwe liteeka po etwali laJosef;Ina hoolola epata laEfraim.
68 Ashike okwa hoolola epata laJuda,Omhunda Sion, oyo e hole.
69 Okwa ninga onhele yaye iyapuki i kale po fiyo alushe ngaashi eulu,*Ngaashi edu, olo a tula po, li kale po fiyo alushe.
70 Okwa hoolola omupiya waye, David,Nokwe mu kufa mo moyuunda yeedi,
71 Kokufila oshisho eedi odo tadi nyamifa;Okwe mu ninga omufita waJakob, oshiwana shaye,NowaIsrael, efyuululo laye.
72 Okwe va lifa nomutima u na oudiinini,Nokwe va kwatela komesho nounghulungu womake.
Eshangelo lopedu
^ Tala Omafatululo oitya.
^ Ile “kelombwelo.”
^ Eln., “inali lilongekida momutima.”
^ Ile “ekuma.”
^ Eln., “yeleka.”
^ Ile “oikulya yokomwenyo wavo.”
^ Ile “wovaengeli.”
^ Ile “Omupopili.”
^ Eln., “tuvike.”
^ Ile tashi dulika, “Omhepo, oyo hai i, ndele ihai aluka.”
^ Ile “ehameka.”
^ Eln., “eke.”
^ Eln., “kulila.”
^ Oludi leedi odo hadi li ovanhu.
^ Omiti domisikamore.
^ Ile tashi dulika, “noshidu shidjuu.”
^ Ile “Eemwenyo davo.”
^ Eln., “eemwenyo davo.”
^ Ile “nokuyeleka.”
^ Ile “twifa ondubo.”
^ Eln., “Noukadona elela vaye kava li va tangwa.”
^ Eln., “Okwa tunga onhele yaye iyapuki ngaashi eulu.”
