Omapsalme 88:1-18
Eimbilo. Epsalme lovanamati vaKora. Komuwiliki; pamushingo waMahalat,* oli na okwiimbwa pamalufo. Omaskil* yaHeman, Omuesrahi.
88 Omwene Jehova, Kalunga kexupifo lange,Omutenya ohandi kwena,Noufiku ohandi uya koshipala shoye.
2 Eilikano lange nali uye kwoove,Pakaleka okutwi kwoye,* eshi handi ku lilile ekwafo.
3 Osheshi omwenyo* wange ou yadi omaupyakadi,Nonghalamwenyo yange oi li komungenge wOmbila.*
4 Onda valulilwa nale mokati kaavo tava i melambo;*Onda ninga omunhu oo ehe na ekwafo lasha,*
5 Nda fyaala mokati kovafi,Ngaashi oonakudipawa, ovo va nangala mombila,Ovo iho dimbuluka vali,Naavo ihava mono ouwa mefiloshisho* loye.
6 Owa tula nge melambo lokoshi elela,Meenhele dilaula, mombwili inene.
7 Ehandu loye ola lyaminina nge po neenghono,Nowa wilila nge po nomakufikufi oye taa teyaula. (Sela)
8 Owa taataelashi ookaume kange kokule naame;Owa ninga nge oshinima shitondifa kuvo.
Onda kondekwa, noitandi dulu okuya onhapo.
9 Omesho ange okwa loloka omolwokufininikwa kwange.
Omwene Jehova, ohandi ku ifana efimbo alishe;Omake ange ohandi a yelulile kwoove.
10 Mbela ovafi oto ke va longela ngoo oinenelonga?
Mbela ovo va fya otava ka fikama ngoo ve ku tange? (Sela)
11 Mbela ohole yoye i na oudiinini otai ka hepaululwa ngoo mombila,Oudiinini woye monhele yehanauno?*
12 Mbela oinenelonga yoye otai ka shiivika ngoo momilaulu,Ile ouyuki woye medu laavo va dimbiwa?
13 Ashike natango, Omwene Jehova, ohandi lilile ekwafo kwoove.Ongula keshe, eilikano lange otali uya koshipala shoye.
14 Omwene Jehova, omolwashike wa ekela nge shi?*
Omolwashike to holeke nge oshipala shoye?
15 Okudja kounyasha wange,Onda kala nokufininikwa, nondi li pokuxula po;Onda mongoshoka omolwoinima ii, oyo wa efa i hange nge.
16 Ehandu loye linene ola wilila nge po;Omatilifo oye otaa hanauna nge po.
17 Okwa dingilila nge, ngaashi omeva, efimbo alishe;Okwa kondeka nge okudilila keembinga adishe.*
18 Owa taataelashi ookaume kange noovakwetu kokule naame;Omilaulu oda ninga kaume kange.
Eshangelo lopedu
^ Tala Omafatululo oitya.
^ Tala Omafatululo oitya.
^ Ile “Endeka, ndele to pwilikine.”
^ Tala Omafatululo oitya.
^ Sha hala okutya, kOufi. Tala Omafatululo oitya.
^ Ile “mombila.”
^ Ile “ngaashi omunhu ehe na eenghono.”
^ Eln., “meke.”
^ Ile “muAbadon.”
^ Ile “omwenyo wange.”
^ Ile tashi dulika, “pefimbo limwe.”
